திருப்பதி ஏழுமலையான் கோவிலில் வருடாந்திர பவித்ரோற்சவம் வரும் 8 ஆம் தேதி தொடங்க உள்ளது.
ஆந்திர மாநிலத்தில் உள்ள திருப்பதி கோவில், உலகப் பிரசித்திப் பெற்றது. இந்தக் கோவிலுக்கு, உள்ளூர் மாவட்டத்தில் இருந்தும், வெளி மாவட்டங்களில் இருந்தும், மற்ற மாநிலங்களில் இருந்தும், வெளி நாடுகளிலும் இருந்தும் தினசரி லட்சக் கணக்கான பக்தரகள் வந்துச் செல்வர். கொரோனா தொற்று காரணமாக கடந்த இரண்டு ஆண்டுகளாக அமலில் இருந்த கட்டுப்பாடுகள் தற்போது 90 சதவீதம் அளவுக்கு விலக்கிக் கொள்ளப்பட்டு உள்ளன.
கோவிலில் ஆண்டு முழுவதும் நடந்த அர்ச்சனைகள், திருவிழாவின் போது பக்தர்கள், கோவில் ஊழியர்கள் தெரிந்தும், தெரியாமலும் செய்த சில தவறுகளால் ஏற்படுகின்ற தோஷத்தால், கோவிலின் புனிதம் பாதிக்கப்படாமல் இருக்க பவித்ரோற்சவம் நடத்தப்படுகிறது.
இந்நிலையில், திருப்பதியில், வரும் 8 ஆம் தேதி முதல் 10 ஆம் தேதி வரை 3 நாட்கள் பவித்ரோற்சவம் நடக்கிறது. இதனையொட்டி கோவிலில் உள்ள சம்பங்கி பிரகாரத்தில் காலை 9 மணியில் இருந்து பகல் 11 மணி வரை 3 நாட்கள் திருமஞ்சனம் நடக்கிறது. மாலை கோவிலின் நான்கு மாட வீதிகளில் மலையப்பசாமி சிறப்பு அலங்காரத்தில் ஸ்ரீதேவி, பூதேவியுடன் எழுந்தருளி உலா வந்து பக்தர்களுக்கு அருள்பாலிக்கிறார்.
8 ஆம் தேதி பவித்ர பிரதிஷ்டை, 9 ஆம் தேதி பவித்ர சமர்ப்பணம், 10ஆம் தேதி பூர்ணாஹுதி நிகழ்ச்சிகள் நடக்கின்றன. பவித்ரோற்சவத்தையொட்டி 7 ஆம் தேதி அங்குரார்ப்பணம் நடப்பதால் சஹஸ்ர தீபலங்கார சேவை, 9 ஆம் தேதி அஷ்டதள பாத பத்மாராதன சேவை, 8 ஆம் தேதியில் இருந்து 10 ஆம் தேதி வரை கல்யாண உற்சவம், ஊஞ்சல் சேவை, ஆர்ஜித பிரம்மோற்சவம், சஹஸ்ர தீபலங்கார சேவைகள் ஆகியவை ரத்து செய்யப்பட்டுள்ளதாக தேவஸ்தானம் சார்பில் அறிவிக்கப்பட்டு உள்ளது.