மாணவிகளுக்கு 1,000 ரூபாய் உதவித் திட்டத்திற்காக 698 கோடி ரூபாயை தமிழக அரசு நிதியாக ஒதுக்கி உள்ளது.
தமிழகத்தில் அரசுப் பள்ளிகளில் பயிலும் மாணவிகளின் உயர் கல்வி சேர்க்கையினை அதிகரிக்கும் பொருட்டு, சமூக நலன் மற்றும் மகளிர் உரிமைத் துறையின் மூலம் செயல்படுத்தப்படும் மூவலூர் இராமாமிர்தம் அம்மையார் உயர்கல்வி உறுதித் திட்டத்தின் கீழ் அரசுப் பள்ளிகளில் 6 ஆம் வகுப்பு முதல் 12 ஆம் வகுப்பு வரை பயின்று மேற்படிப்பில் சேரும் அனைத்து மாணவிகளுக்கும், சான்றிதழ் படிப்பு / பட்டயப்படிப்பு | பட்டப்படிப்பு / தொழிற்கல்வி ஆகியவற்றில் இடைநிற்றல் இன்றி கல்வி பயின்று முடிக்கும் வரை, மாதம் 1,000 ரூபாய் அவர்களின் வங்கிக் கணக்கிற்கு நேரடியாக செலுத்தப்படும் என்று அறிவிக்கப்பட்டது.
இந்த மாணவிகள் ஏற்கனவே பிற கல்வி உதவித்தொகை பெற்று வந்தாலும் இத்திட்டத்தில் கூடுதலாக உதவி பெறலாம் என்று தமிழக அரசு கூறியது. இதற்கான, விண்ணப்பங்கள் கடந்த ஜூலை 10 ஆம் தேதி வரை பெறப்பட்டன. இதைத் தொடர்ந்து விண்ணப்பங்களில் திருத்தம் செய்யவும் கால அவகாசம் வழங்கப்பட்டது.
இந்நிலையில் மாணவிகளுக்கு 1,000 ரூபாய் வழங்கும் உதவி திட்டத்தின் வழிகாட்டு நெறிமுறைகள் தமிழக அரசால் வெளியிடப்பட்டு உள்ளன. அதில், மாணவிகள் கல்லூரி மேல் படிப்பை பயில்கின்றனரா என்பதை ஒவ்வொரு ஆறு மாதமும் உயர் கல்வித் துறை சார்பில் உறுதி செய்ய வேண்டும்.
மாணவிகளின் வங்கிக் கணக்கில் ஒவ்வொரு மாதமும் 7 ஆம் தேதி 1,000 ரூபாய் வரவு வைக்கப்படும். இத்திட்டத்திற்காக நடப்பாண்டுக்கு மட்டும் 698 கோடி ரூபாய் ஒதுக்கீடு செய்யப்பட்டு உள்ளது. இத்திட்டத்தின்படி ஓர் ஆண்டுக்கு 6 லட்சம் மாணவிகள் பயனடைவர் என கணக்கிட்டு தமிழக அரசு அரசாணையை வெளியிட்டு உள்ளது.