பாஜக தலைமையிலான தேசிய ஜனநாயகக் கூட்டணியில் இருந்து ஐக்கிய ஜனதா தளம் கட்சி விலகி உள்ளதை அடுத்து, நாடாளுமன்ற மாநிலங்களவையில், பாஜக கூட்டணி கட்சிகளின் பலம் பெரும்பான்மைக்கு கீழ் குறைந்துள்ளது.
பாஜக தலைமையிலான தேசிய ஜனநாயகக் கூட்டணி உடன், கடந்த சில ஆண்டுகளாக ஏற்பட்ட கருத்து வேறுபாடுகளால் அதிருப்தி அடைந்த ஐக்கிய ஜனதா தளம் கட்சித் தலைவரும், பீகார் மாநில முதலமைச்சருமான நிதிஷ் குமார், நேற்று, கூட்டணியில் இருந்து விலகுவதாக அறிவித்தார்.
இதைத் தொடர்ந்து, லாலு பிரசாத் யாதவ் மகன் தேஜஸ்வி யாதவ் தலைமையிலான ராஷ்ட்ரீய ஜனதா தளம் கட்சியுடன் மீண்டும் கூட்டணி அமைத்து ஆட்சி அமைக்க அவர் முடிவு செய்துள்ளார். இதன்படி, ஐக்கிய ஜனதா தளம் – ராஷ்ட்ரீய ஜனதா தளம் தலைமையிலான கூட்டணி அரசு இன்று மாலை பதவி ஏற்க உள்ளது. முதலமைச்சராக எட்டாவது முறையாக நிதிஷ் குமார் பதவி ஏற்க உள்ள நிலையில், துணை முதலமைச்சராக, தேஜஸ்வி யாதவ் பதவி ஏற்க உள்ளார்.
இந்நிலையில், பாஜக தலைமையிலான தேசிய ஜனநாயகக் கூட்டணியில் இருந்து ஐக்கிய ஜனதா தளம் கட்சி விலகி உள்ளதை அடுத்து, நாடாளுமன்ற மாநிலங்களவையில், பாஜக கூட்டணி கட்சிகளின் பலம் பெரும்பான்மைக்கு கீழ் குறைந்துள்ளது. ஐக்கிய ஜனதா தளம் கட்சிக்கு, மாநிலங்களவையில் 5 உறுப்பினர்கள் உள்ளனர்.
தற்போதைய நிலவரப்படி, மாநிலங்களவை உறுப்பினர்கள் எண்ணிக்கை 237. இதில் எட்டு இடங்கள் காலியாக உள்ளன. இதன்படி, பெரும்பான்மைக்கு 119 உறுப்பினர்கள் ஆதரவு தேவை. இதில், தேசிய ஜனநாயகக் கூட்டணிக்கு ஐந்து நியமன உறுப்பினர்கள் உட்பட 115 உறுப்பினர்கள் ஆதரவு இருக்கிறது. தற்போது, ஐக்கிய ஜனதா தளம் விலகி உள்ளதால், தேசிய ஜனநாயகக் கூட்டணியின் பலம் 110 ஆக குறைந்துள்ளது. அதாவது பெரும்பான்மைக்கு 9 உறுப்பினர்கள் ஆதரவு தேவை என்ற நிலை உள்ளது.
நாடாளுமன்ற குளிர்காலக் கூட்டத்தொடருக்கு முன்பு, மூன்று நியமன எம்பிக்களை மத்திய அரசு நியமனம் செய்தாலும், திரிபுராவில் ஒரு மாநிலங்களவை இடம் கிடைத்தாலும், தேசிய ஜனநாயகக் கூட்டணி பலம் 114 ஆக அதிகரிக்கும். அதே சமயம், பெரும்பான்மை எண்ணிக்கையும் 121 ஆக உயரும். எப்படி பார்த்தாலும், பாஜக கூட்டணிக்கு மெஜாரிட்டி இருக்காது.
இந்நிலையில், மாநிலங்களவையில் முக்கிய மசோதாக்களை நிறைவேற்ற, ஒடிசா மாநில முதலமைச்சர் நவீன் பட்நாயக்கின் பிஜூ ஜனதா தளம், ஆந்திர மாநில முதலமைச்சர் ஜெகன் மோகன் ரெட்டியின், ஒய்.எஸ்.ஆர். காங்கிரஸ் கட்சிகளின் ஆதரவு, நிச்சயமாக, தேசிய ஜனநாயகக் கூட்டணிக்கு தேவை. இவர்களது ஆதரவு இல்லாமல், பாஜகவால் மாநிலங்களவையில் எந்த மசோதாவையும் நிறைவேற்ற முடியாது என்பது குறிப்பிடத்தக்கது.