சுதந்திரம் கிடைத்த போது மகாத்மா காந்தி எங்கிருந்தார்?

இந்தியா தனது 75ஆவது சுதந்திர தினத்தை வருகிற 15 ஆம் தேதி கொண்டாட உள்ளது. இந்த வரலாற்று சிறப்புமிக்க தினத்தை கொண்டாட நாடு முழுவதும் ஏற்பாடுகள் நடந்து வருகின்றன. நாட்டின் 75-வது சுதந்திர தினம் “ஆசாதி கா அம்ரித் மஹோத்சவ் – சுதந்திர திருநாள் அமுதப் பெருவிழா” என்ற பெயரில் கொண்டாடப்பட்டு வருகிறது.

பிரிட்டிஷ் ஆட்சியாளர்களிடமிருந்து இந்தியாவிற்கு கடந்த 1947ஆம் ஆண்டு ஆகஸ்ட் மாதம் 15ஆம் தேதி சுதந்திரம் கிடைத்தது. அந்த நள்ளிரவில், பிரிட்டிஷ்காரர்களிடம் இருந்து அதிகார மாற்றமும், கொண்டாட்டங்களும் டெல்லியில் களைகட்டியிருந்தன. 1947 ஆகஸ்ட் 14,15 இடைப்பட்ட இரவில் சுதந்திர இந்தியாவில் தனது முதல் உரையை ஜவகர்லால் நேரு ஆற்றிக் கொண்டிருந்தார். ஆனால், அகிம்சை போராட்டத்தை முன்னெடுத்து சுதந்திரம் கிடைக்க அகிம்சை வழியில் போராடியவரும், சுதந்திர போராட்டங்களை ஒருங்கிணைத்தவரும், தேசப்பிதாவுமான மகாத்மா காந்தி அப்போது எங்கிருந்தார்?

“ஆகஸ்ட் 15 அன்று என்னால் மகிழ்ச்சியடைய முடியாது. நான் உங்களை ஏமாற்ற விரும்பவில்லை. ஆனால் அதே சமயம், நீங்கள் மகிழ்ச்சி அடைய வேண்டாம் என்று நான் உங்களிடம் கேட்க மாட்டேன். துரதிர்ஷ்டவசமாக, இன்று நமக்குக் கிடைத்திருக்கும் சுதந்திரம், இந்தியாவுக்கும் பாகிஸ்தானுக்கும் இடையிலான எதிர்கால மோதலின் விதைகளைக் கொண்டுள்ளது. எனவே, இதனை நாம் எப்படி கொண்டாட முடியும்? என்னைப் பொறுத்தவரை, சுதந்திரப் பிரகடனத்தை விட இந்துக்களுக்கும் முஸ்லிம்களுக்கும் இடையிலான சமாதானம் முக்கியமானது.” இது மகாத்மா காந்தியின் வார்த்தைகள்.

1947 ஆகஸ்ட் 15ஆம் தேதி மகாத்மா காந்தி எங்கிருந்தார்?

வரலாற்று ஆவணங்களின்படி, நௌகாலிக்கு (தற்போது வங்கதேசத்தில் உள்ளது) செல்ல திட்டமிட்ட அவர், இந்து-முஸ்லின் கலவரத்தால் பாதிக்கப்பட்டிருந்த மேற்குவங்க மாநிலத்தில் அமைதியை நிலைநாட்டுவதற்காக கல்கத்தாவில் இருந்ததாக வரலாற்று ஆவணங்கள் கூறுகின்றன. 1947ஆம் ஆண்டு ஆகஸ்ட் 6ஆம் தேதி மாலை லாகூரிலிருந்து கல்கத்தா மெயில் ரயிலில் மகாத்மா காந்தி ஏறினார். அந்த ரயில் பாட்னாவுக்கும், அங்கிருந்து கல்கத்தாவுக்கும் செல்லும் ரயில். கல்கத்தாவில் இருந்து நௌகாலிக்கு செல்ல அவர் திட்டமிட்டிருந்தார். கிழக்கு வங்காளம் கிழக்கு பாகிஸ்தானாக பிரிவிணை ஏற்பட்டபோது, சிறுபான்மை சமூகத்தை பாதுகாப்பதாக உறுதி அளித்த அவர் அங்கு செல்வதற்கு திட்டமிட்டிருந்தார்.

ஆகஸ்ட் 9ஆம் தேதி கல்கத்தாவுக்கு சென்ற அவரை சந்தித்த கல்கத்தா மாவட்ட முஸ்லீம் லீக்கின் தலைவர் முகமது உஸ்மான் தலைமையிலான முஸ்லிம்களின் பிரதிநிதிகள், முஸ்லிம்களின் பாதுகாப்பை உறுதி செய்வதற்காக கல்கத்தாவில் இருக்குமாறு, அவரிடம் வேண்டுகோள் விடுத்தனர். நௌகாலியில் உள்ள சிறுபான்மை சமூகத்தின் பாதுகாப்பு மற்றும் நல்வாழ்வுக்கு உத்தரவாதம் அளித்தால், அங்கு செல்வதை தாமதப்படுத்துவதாகவும், ஒருவேளை அவர்கள் அளிக்கும் உத்தரவாதம் மீறப்பட்டு நௌகாலியில் வன்முறை நடந்தால் சாகும்வரை நிபந்தனையற்ற உண்ணாவிரதம் இருப்பேன் எனவும் மகாத்மா காந்தி அவர்களிடம் தெரிவித்துள்ளார்.

ஆகஸ்ட் 11 ஆம் தேதி, பாகிஸ்தான் மற்றும் வங்கத்தின் முன்னாள் பிரதமர் ஹுசைன் ஷஹீத் சுஹ்ரவர்தியை மகாத்மா காந்தி சந்தித்தார். சுஹ்ரவர்தியும் முஸ்லிம்களின் பாதுகாப்பு குறித்து தனது கவலையை வெளிப்படுத்தினார். அவர் கல்கத்தாவில் தங்க விரும்பினால், நௌகாலியில் உள்ள இந்துக்களின் பாதுகாப்பிற்கு உத்திரவாதம் அளிக்குமாறு காந்தி அவரிடம் கேட்டுக் கொண்டார். அவரும் உறுதியளித்தார். “நீங்களும் நானும் ஒன்றாக இருக்க தயாராக இருந்தால் நான் இங்கு இருப்பேன். கல்கத்தாவில் உள்ள ஒவ்வொரு இந்துவும், முஸ்லீம்களும் பாதுகாப்பாக அவர் முன்பு இருந்த இடத்திற்குத் திரும்பும் வரை நாம் உழைக்க வேண்டும். நமது இறுதி மூச்சு வரை நமது முயற்சியில் பின்வாங்கக் கூடாது.” என்று அவரிடம் மகாத்மா காந்தி கேட்டுக் கொண்டார்.

இதையடுத்து, பெலியாகாட்டாவில் உள்ள ஏழ்மையான முஸ்லீம்கள் வாழும் பகுதியான ஹைதரி மேன்ஷனில் (காந்தி பவன் என தற்போது பாதுகாக்கப்படுகிறது) உள்ள ஒரு முஸ்லீம் குடும்பத்தின் பாழடைந்த மற்றும் கைவிடப்பட்ட வீட்டில் காந்தியும், சுஹ்ரவர்தியும் சேர்ந்து வாழ்வது என முடிவு செய்யப்பட்டது. ஆனால், முஸ்லீம்களைக் காப்பாற்ற வந்ததற்காக காந்தி மீது இளம் இந்து மதவெறியர்களின் கோபமான கும்பல் ஒன்று அவர்களுக்கு எதிராக போராட்டத்தில் ஈடுபட்டது. அவர்களை மகாத்மா காந்தி சமாதானப்படுத்த முயன்றபோதும், அவர்கள் விடாப்படியாக இருந்தனர். அவர்களது போராட்டம் அடுத்த நாளும் தொடர்ந்தது

“நான் உங்கள் பாதுகாப்பில் இருக்க போகிறேன். முஸ்லிம்களின் பாதுகாப்புக்கு உத்தரவாதம் கொடுத்தால் உங்களை நான் வரவேற்கிறேன். எனது வாழ்க்கைப் பயணத்தின் இறுதிக் கட்டத்தை நெருங்கிவிட்டேன். நான் செல்ல அதிக தூரம் இல்லை. ஆனால் நீங்கள் மீண்டும் பித்துபிடித்தால் போல் இருந்தால், அதற்கு நான் உயிருள்ள சாட்சியாக இருக்க மாட்டேன் என்பதை தெரிவித்துக் கொள்கிறேன். இதே இறுதி எச்சரிக்கையை நௌகாலியில் உள்ள முஸ்லிம்களுக்கும் நான் விடுக்கிறேன்.” என்று அவர்களிடம் மகாத்மா காந்தி தெரிவித்தார்.

ஆகஸ்ட் 14 மாலை பெலியாகாட்டாவில் நடந்த பிரார்த்தனைக் கூட்டத்தில் பேசிய காந்தி, 24 மணி நேரம் உண்ணாவிரதம் இருக்கவும், இந்தியாவின் நலனுக்காகவும் பிரார்த்தனை செய்யவும் அனைவருக்கும் அழைப்பு விடுத்தார். 1947 ஆகஸ்ட் 15ஆம் தேதி அதிகாலை 3.45 மணிக்கு கண்விழித்த மகாத்மா காந்தி, தனது தினசரி வழக்கத்தை பின்பற்றினார். பிரார்த்தனை செய்தார், விரதம் இருந்தார், காதி நூல் நூற்கும் கை ராட்டையை சுழற்றினார். அவருக்கு பல வாழ்த்துச் செய்திகள் வந்தன, ஆனாலும் அவர் கொண்டாடட்டத்தில் ஈடுபடவில்லை. சுதந்திர தினத்தன்று, கல்கத்தாவின் ஆளுநர் மாளிகை முற்றுகையிடப்பட்டது. ஆனால், உள்ளே இருந்தது வெள்ளைக்கார ஆளுநர் அல்ல. இந்தியாவை சேர்ந்த சி.ராஜகோபாலாச்சாரி. வங்கத்தில் புதிதாக நியமிக்கப்பட்ட ஆளுநர் சுதந்திர தினத்தன்று இந்தியர்களால் ராஜ்பவனில் பல மணி நேரம் பிணைக் கைதியாக வைக்கப்பட்டார்.

“உண்மையையும் அகிம்சையையும் வளர்க்க இடைவிடாமல் பாடுபடுங்கள். அடக்கமாக இருங்கள். பொறுமையாக இருங்கள். இப்போது, நீங்கள் சோதனைக்கு உட்படுத்தப்படுவீர்கள். அதிகாரத்திடம் ஜாக்கிரதையாக இருக்க வேண்டும். அதிகாரம் நம்மை கெடுத்து விடும். அதன் ஆடம்பரத்திலும் சிக்கிக் கொள்ள வேண்டாம். இந்தியாவின் கிராமங்களில் உள்ள ஏழைகளுக்கு சேவை செய்ய நீங்கள் பதவியில் இருக்கிறீர்கள் என்பதை நினைவில் கொள்ளுங்கள்.” என்று மேற்கு வங்க அமைச்சரவையின் அமைச்சர்களுக்கு மகாத்மா காந்தி கடிதம் எழுதினார்.

அன்று மாலை நடந்த பிரார்த்தனைக் கூட்டத்தில், இந்துக்கள் மற்றும் முஸ்லிம்கள் காட்டிய தோழமையை மகாத்மா காந்தி பாராட்டினார். இந்துக்கள் முழங்கிய அதே மகிழ்ச்சி முழக்கங்களை முஸ்லிம்களும் எழுப்பினர். சிறிதும் தயங்காமல் மூவர்ணக் கொடியை பறக்கவிட்டனர். இந்துக்கள் மசூதிகளிலும், முஸ்லிம்கள் கோயில்களிலும் அனுமதிக்கப்பட்டனர். கல்கத்தா இனவாத வைரஸிலிருந்து முற்றிலும் விடுபடும் என்று அப்போது மகாத்மா காந்தி நம்பினார்.