காங்கிரஸ்
கட்சியின் உட்கட்சித் தேர்தலை நடத்துவதற்கான தற்காலிக முன்மொழிவு தயார் செய்யப்பட்டுள்ள நிலையில், அதற்கு முன்னதாக காங்கிரஸ் காரிய கமிட்டி கூட்டம் நடைபெறவுள்ளதாக தகவல்கள் வெளியாகியுள்ளன. கடந்த 2019ஆம் ஆண்டு மக்களவை தேர்தலில் காங்கிரஸ் கட்சி தோல்வியுற்ற நிலையில், அக்கட்சியின் அகில இந்திய தலைவராக இருந்த ராகுல் காந்தி தனது பதவியை ராஜினாமா செய்தார். அதன்பிறகு, இதுவரை அக்கட்சியின் முழுநேரத் தலைவர் நியமனம் செய்யப்படவில்லை. இடைக்கால தலைவராக சோனியா காந்தி செயல்பட்டு வருகிறார். அதேபோல், காங்கிரஸ் கட்சியின் உட்கட்சி தேர்தலும் தொடர்ந்து தாமதமாகி வருகிறது.
காங்கிரஸ் கட்சியை வலுப்படுத்தும் வகையில், புதிய தலைவரை நியமிக்க வேண்டும் என்று அக்கட்சிக்குள்ளேயே தொடர்ந்து வலியுறுத்தப்பட்டு வருகிறது. இதுதொடர்பாக, கட்சியின் மூத்த தலைவர்கள் ராகுல் காந்தியிடம் பலமுறை பேச்சுவார்த்தை நடத்தியும், அவர் தலைவராக வருவதற்கு சம்மதம் தெரிவிக்கவில்லை. இதனிடையே, அதிருப்தி தலைவர்களாக அறியப்படும் ஜி-23 தலைவர்கள், காங்கிரஸ் கட்சிக்கு முழுநேரத் தலைவர் நியமனம் செய்ய வேண்டும், கட்சியை வலுப்படுத்த வியூகங்களை வகுக்க வேண்டும் என்று வலியுறுத்தி வருகின்றனர். இதுகுறித்து சோனியா காந்திக்கு அவர்கள் கடிதமும் எழுதியுள்ளனர். ஆனாலும், எந்த பலனும் இல்லை. ஜி-23 தலைவர்களில் ஒருவரான மூத்த தலைவர் கபில் சிபல், காங்கிரஸ் கட்சியில் இருந்து விலகினார்.
இதனிடையே, கடந்த சில மாதங்களுக்கு முன் ராஜஸ்தான் மாநிலம் ஜெய்பூரில் நடந்த காங்கிரஸ் கட்சியின் தேசிய நிர்வாகிகள் கூட்டத்தில் கட்சியை வலுப்படுத்துவது குறித்து விரிவாக விவாதிக்கப்பட்டது. அதில் எடுக்கப்பட்ட முடிவுகளின்படி, உட்கட்சி தேர்தலை நடத்துவதற்கான ஏற்பாடுகளை காங்கிரஸ் கட்சி செய்து வருவதாக தெரிகிறது. அதேசமயம், காங்கிரஸ் இடைக்கால தலைவரின் பதவிக்காலம் முடிவுக்கு வர உள்ளதால், அதற்குள் கட்சியின் தலைவர் பதவிக்கான தேர்தல் நடத்தி முடிக்கப்படும் என்று காங்கிரஸ் கூறி வருகிறது. எனவே, உட்கட்சித் தேர்தலுக்கு முன்பாக காங்கிரஸ் காரிய கமிட்டி கூட்டம் கூட்டப்படும் எனவும், அப்போது காங்கிரஸ் தலைவர் தேர்தலை நடத்துவது குறித்து முக்கிய முடிவு எடுக்கப்படும் எனவும் காங்கிரஸ் வட்டாரங்கள் கூறுகின்றன.
இதுகுறித்து அவர்கள் கூறுகையில், “கட்சியின் தலைமையை ராகுல் காந்தி ஏற்க வேண்டும் என சிலர் வலியுறுத்துகின்றனர். ஆனால், ராகுல் காந்தி மீண்டும் கட்சித் தலைவராக சில தலைவர்கள் எதிர்ப்பும் தெரிவிக்கின்றனர். விரைவில் காங்கிரஸ் காரிய கமிட்டி கூட்டம் கூட்டப்படும். அப்போது காங்கிரஸ் தலைவர் தேர்தலை நடத்துவது குறித்து முக்கிய முடிவு எடுக்கப்படும். உட்கட்சித் தேர்தலுக்கான முன்மொழிவு தயார் செய்யப்பட்டுள்ளது. தேர்தல் தொடர்பான விபரங்கள் செயற்குழு முன் வைக்கப்படும்.” என்று கூறுகின்றனர்.
ராகுல் காந்தியின் மவுனம்
இதுகுறித்து அகில இந்திய காங்கிரஸ் கமிட்டி (ஏஐசிசி) தலைவர்கள் கூறுகையில், தலைவர் பதவியை திரும்பப் பெறுமாறு ராகுல் காந்திக்கு கட்சி உறுப்பினர்கள் வேண்டுகோள் விடுத்தாலும், அவர் பெரும்பாலும் மவுனம் காத்து வருவதாக கூறுகின்றனர். காங்கிரஸ் தலைவர் பதவியை ஏற்பதில் ராகுல் காந்தி தயக்கம் காட்டுவதற்கு இரண்டு காரணங்களை கூறலாம். ஒன்று, “அதிகாரத்தில் தனக்கு ஆர்வம் இல்லை” என்று சமீபகாலமாக பலமுறை ராகுல் காந்தி கூறியிருக்கிறார். ‘நான் அதிகார மையத்தில் பிறந்தேன், ஆனால் உண்மையில், எனக்கு அதில் ஆர்வம் இல்லை’ என்று கடந்த எப்ரல் மாதம் ராகுல் காந்தி தெரிவித்திருந்தார்.
இரண்டாவதாக, காங்கிரஸ் ஒரு வாரிசு கட்சி என்ற விமர்சனங்கள் முன்வைக்கப்படுகின்றன. இதனை ராகுல் காந்தியும் நன்கு உணர்ந்துள்ளார். ஒருமித்த கருத்தின்படி, கட்சிக்குள் முடிவெடுக்கப்பட்டாலும், ஒரு குடும்பம் எல்லாவற்றையும் ஆணையிடுவதான தோற்றம் கட்டமைக்கப்படுகிறது. இது அவரை மேலும் எச்சரிக்கையாக இருக்க செய்து, தலைவர் பதவியை ஏற்பதில் தயக்கம் காட்ட வைக்கலாம்.
தலைவராக காட்டும் முயற்சிகள்
காங்கிரஸ் கட்சியின் தலைவர் பதவிக்கான விருப்பத்தை ராகுல் காந்தி அதிகாரப்பூர்வமாக அறிவிக்கவில்லை என்றாலும், அவரையே ‘வெளிப்படையான தேர்வாக’ வைக்கும் உருவாக்கம் ஏற்கனவே தொடங்கி விட்டதாக கருதலாம். கடந்த வாரம், விலைவாசி உயர்வுக்கு எதிராக காங்கிரஸ் பெரும் போராட்டங்களை நடத்தியது, ராகுல் காந்தி உட்பட அதன் உயர்மட்ட தலைவர்கள் சாலைகளில் இறங்கி போராட்டம் நடத்தி டெல்லி காவல்துறையினரால் கைது செய்யப்பட்டனர். செப்டம்பர் 7 முதல் தொடங்கும் ‘பாரத் ஜோடோ’ (ஒன்றுபட்ட இந்தியா) யாத்திரைக்கும் ராகுல் காந்தி தலைமை தாங்குகிறார். இதுபோன்று பல பேரணிகள், போராட்டங்களுக்கு அவர் தலைமை தாங்க உள்ளார்.
காங்கிரஸ் கட்சி அவ்வப்போது இதுபோன்ற பேரணிகளை ஏற்பாடு செய்தாலும், ராகுல் காந்தி எப்போதும் அவற்றை வழிநடத்துவதில்லை; அனைத்திலும் அவர் கலந்து கொள்வதுமில்லை. ஆனால், தற்போதைய இந்த திடீர் நடவடிக்கையின் மறைமுக விளைவு, கட்சியின் அடுத்த தலைவராக அவரை நிலைநிறுத்துவதற்காக இருக்கலாம் என்று அரசியல் நோக்கர்கள் கூறுகின்றனர்.
விமர்சனங்களை தவிர்க்க என்ன செய்யலாம்
காங்கிரஸ் கட்சியின் தலைவர் என்ற பொறுப்புக்கு பதிலாக, வழிகாட்டி/ஆலோசகர் என்ற பொறுப்பை ஏற்படுத்தலாம். அப்படி செய்து, காந்தி குடும்பத்தைச் சேர்ந்த ஒருவர் மீண்டும் தலைவராகத் தேர்ந்தெடுக்கப்பட்டால், அவருக்கும், கட்சிக்கும் வரக்கூடிய விமர்சனங்களில் இருந்து பாதுகாத்துக் கொள்ளலாம். குடும்பக் கட்சி என்ற விமர்சனத்தை தவிர்த்து, கட்சியை குறிப்பிட்ட திசையில் ராகுல் காந்தி வழிநடத்தி செல்வதை உறுதிசெய்வதற்கு, வேறு பதவியை உருவாக்குவது ஒரு வழியாக இருக்கலாம். அப்படி ஏதேனும் நடந்தால், காங்கிரஸ் தலைவர் பதவியில் அமர மற்ற மூத்த தலைவர்கள் தங்களது விருப்பத்தை தெரிவிக்க வாய்ப்புண்டு. டி.கே.சிவகுமார் முதல் மல்லிகார்ஜுன கார்கே வரையிலான பெயர்கள் முணுமுணுக்கப்படுகின்றன.
உறுப்பினர் சேர்க்கை
காங்கிரஸ் கட்சியின் மத்திய தேர்தல் ஆணையம் (CEA) இந்த உள்கட்சித் தேர்தல்களை நடத்துவதற்கு அதிகாரம் பெற்ற அமைப்பாகும். உட்கட்சித் தேர்தலையொட்டி, கட்சியில் தங்களை பதிவுசெய்தவர்கள் மட்டுமே வாக்களிக்கத் தகுதியுடையவர்கள் என்பதை உறுதி செய்யும் பொருட்டு, இந்த அமைப்பு உறுப்பினர் சேர்க்கையை வழிநடத்தியது. இதில், சோனியா, ராகுல் உட்பட சுமர் 6 கோடி பேர் பதிவு செய்துள்ளதாக தெரிவிக்கப்பட்டுள்ளது.
அனைத்தும் திட்டமிட்டபடி நடந்தால், மேலும் தாமதம் ஏற்படவில்லை என்றால், செப்டம்பர் 20ஆம் தேதிக்குள் தேர்தல் நடைமுறைகள் முடிவடையும் என்கிறார்கள்.