விடியா அரசின் அமைச்சர் மா.சுப்பிரமணியன் அவர்களுக்கு நாவடக்கம் தேவை என்று அதிமுக முன்னாள் அமைச்சர் டி.ஜெயக்குமார் எச்சரிக்கை விடுத்துள்ளார்.
இது குறித்து அதிமுக முன்னாள் அமைச்சர் டி.ஜெயக்குமார் வெளியிட்டுள்ள அறிக்கையில், “தன்னுடைய துறையில் என்ன நடக்கிறது என்றே தெரியாமல், மக்களின் உயிரைக் காக்கும் மக்கள் நல்வாழ்வுத் துறையை கடந்த 14 மாத காலமாக, தனது தற்குறி நிர்வாகத்தால் கோமா நிலைக்குக் கொண்டு சென்ற, மா.சு. என்று ஆளும் கட்சியினரால் அன்போடு (?) அழைக்கப்படும் அமைச்சர் மா. சுப்பிரமணியன் அவர்கள், எங்களுடைய கழக இடைக்காலப் பொதுச் செயலாளரும், சட்டமன்ற எதிர்க்கட்சித் தலைவரும், தமிழ் நாடு முன்னாள் முதலமைச்சருமான, அண்ண ன் திரு. எடப்பாடி கே. பழனிசாமி அவர்கள் மீது அறிக்கை என்ற பெயரில் ஊளையிட்டிருக்கிறார்.
மக்கள் நலப் பிரச்சினைகளைத் தீர்க்க முடியாமல் கையைப் பிசைந்து கொண்டிருக்கும் முதலமைச்சர் திரு. மு.க. ஸ்டாலினை விட, மாண்புமிகு எதிர்க்கட்சித் தலைவர் அண்ணன் திரு. எடப்பாடியார் அவர்கள், சுமார் நான்கரை ஆண்டுகள் நல்லாட்சி நடத்தியவர் என்பதால் அரசுக்கு வழிகாட்டுகிறார். இதுவே எதிர்க்கட்சியின் ஜனநாயகக் கடமை.
பிரச்சினைகளைத் தீர்க்கத் திணறி ஆலோசனை நடத்துவதிலும், குழு அமைப்பதிலும் காலம் கடத்திவரும் விடியா திமுக அரசு, பற்றி எரியும் போதைப் பொருள் பயன்பாட்டால் கதறிக் கொண்டிருக்கும் மக்களின் பிரச்சினைக்கு வழி தெரியாமல் பாதிக்கப்பட்டவர்களிடமே கருத்து கேட்பது, ஆட்சி நடத்தத் துப்பில்லை என்பதையே காட்டுகிறது.
மாணவச் செல்வங்களும், இளைஞர்களும் சீரழிவதை அண்ணன் திரு. எடப்பாடியார் அவர்கள் சுட்டிக் காட்டியதைத் தாங்க முடியாமல் மா.சு. புலம்பி இருக்கிறார்.தற்போதைய ஆளும் கட்சியினரால் காவல் துறையின் கைகள் கட்டப்பட்டுள்ளதால், தமிழகத்தில் கஞ்சா போன்ற போதைப் பொருட்களின் வியாபாரம் கொடிகட்டிப் பறப்பதை அண்ணன் திரு. எடப்பாடியார் அவர்கள் மக்கள் மத்தியில் எடுத்து வைத்த ஆத்திரத்தில், ஒரு குடும்பத்திற்கு கொத்தடிமையாக சேவகம் செய்யும் இந்த விடியா அரசின் அமைச்சர் மா.சு. ஊளையிட்டுப் பார்க்கிறார்.
தனது சொந்த உழைப்பினால் படிப்படியாக முன்னேறி, கிளைக் கழகச் செயலாளர், சட்டமன்ற உறுப்பினர், அமைச்சர், முதலமைச்சர் என, இன்று கழக இடைக்காலப் பொதுச் செயலாளராகவும் உயர்ந்தவர் அண்ணன் திரு. எடப்பாடியார் அவர்கள்.
உழைப்பு என்றால் அதற்கு என்ன விலை என்று கேட்பவர்கள்தான் திமுக-வினர். மா.சு.-வைப் போல் தலைமைக்கும், தலைமையின் வாரிசுகளுக்கும் முறைவாசல் வேலை செய்து பதவிகளுக்கு வந்தவரல்ல; மா.சு.-வின் தற்போதைய தலைவர் திரு. மு.க. ஸ்டாலினைப் போல் தந்தையின் மடியில் தவழ்ந்து வாரிசு அடிப்படையில் பதவிகளைப் பிடித்தவர் அல்ல, அண்ண ன் திரு. எடப்பாடியார் அவர்கள். தன் மனைவி பெயரில் செய்த நிலமோசடி வழக்கு என்னும் கத்தி இவர் தலைக்கு மேல் தொங்குவதை மா.சு. மறந்துவிட்டார் போலும்.தங்கள் கட்சியின் பொதுச் செயலாளரும், மூத்த தலைவருமான அண்ணன் திரு. துரைமுருகன் அவர்கள், தி.மு.க தற்போது விபச்சாரிகளின் கூடாரமாக மாறிவிட்டது.
கட்சி மாறி வருபவர்கள் விபச்சாரிகள் என்று சொன்னதைக் கேட்ட பின்பும், நாக்கைப் பிடுங்கிக்கொள்ளாமல் மா.சு. வாய் நீளம் காட்டுவது வெட்கக் கேடானது. இவருக்கு அனைத்திந்திய அண்ணா திராவிட முன்னேற்றக் கழகத்தைப் பற்றிப் பேசுவதற்கு என்ன அருகதை உள்ளது.இன்றைய திமுக அரசு, வாரத்துக்கு ஒரு விருதினைப் பெறுவதற்குக் காரணம், கடந்த 10 ஆண்டுகால அனைத்திந்திய அண்ணா திராவிட முன்னேற்றக் கழக ஆட்சிக் காலங்களில் நிறைவேற்றப்பட்ட எண்ணிலடங்காத சாதனைகளே ஆகும். ஆட்சி மாறிய காரணத்தினால், கடந்த ஆட்சிக்குக் கிடைத்த விருதுகளை பெற்றுக்கொண்டு Photo shoot நடத்துபவர்கள் வேறு எப்படிப் பேசுவார்கள்?
விதவிதமாக ஆடை அணிந்து போட்டோ ஷூட் நடத்தி, நாடக ஆட்சி நடத்தும் விளம்பர வெறியர்களை நினைத்து மக்கள் வெறுப்பின் உச்சத்தில் இருப்பது கூட அமைச்சருக்குத் தெரியவில்லை, பாவம்! சென்றமுறை அம்மா அவர்களின் ஆட்சியிலும், அம்மாவின் அரசிலும் காவல் துறை சுதந்திரமாக செயல்பட்டதால், கஞ்சா உட்பட போதைப் பொருட்களின் விற்பனை பெருமளவு கட்டுப்படுத்தப்பட்டது. திரு. மா.சு. அளித்த புள்ளி விவரங்களே எங்களுடைய 10 ஆண்டுகால கழக ஆட்சிக்கு சாட்சி.
தற்போதைய 14 மாதகால விடியா திமுக ஆட்சியில் போதைப் பொருட்களால் தமிழகமே மூழ்கிப் போயிருப்பது வெட்ட வெளிச்சமாகத் தெரிகிறது. மூவாயிரம் வழக்குகள் பதிவு, நாலாயிரம் வழக்குகள் பதிவு என்று பட்டியலிடும் மா.சு. 108 பேர் கைது, 200 பேர் கைது என்று கூறுகிறார். திமுக ஆட்சிக்கு வந்ததும் போதைப் பொருள் சார்ந்த குற்றங்கள் பெருகி வருவதையே இந்தப் புள்ளி விவரங்கள் காட்டுகின்றன. இதை ஒரு சாதனை அறிக்கையாக வழங்க இந்த விடியா அரசால் மட்டுமே முடியும்.திமுக ஆட்சி மக்களின் நல்வாழ்விற்கு, அமைதிக்குக் கொள்ளி வைத்துவிட்டு வெறும் புள்ளி விவரங்களால் பதில் சொல்லி வாயை அடைத்துவிடலாம் என்று தப்புக் கணக்கு போடுகிறார்கள்.
அனைத்திந்திய அண்ணா திராவிட முன்னேற்றக் கழக ஆட்சி என்றால், மக்களுக்கு இன்னல்கள் இன்றி, சட்டம்-ஒழுங்கு கட்டுக்குள் அடங்கி, அமைதி தவழும். திமுக ஆட்சியில் ரவுடியிசம் மட்டுமே நிலைக்கும் என்பது கட்சி வேறுபாடு இன்றி பொதுமக்கள் அனைவரும் ஒப்புக்கொள்ளும் உண்மையாகும். மீதி இருக்கின்ற ஆண்டுகளாவது சட்டத்தின் ஆட்சி நடத்த திரு. மு.க. ஸ்டாலின் அவர்கள் முயற்சி மேற்கொள்ள வேண்டும் தப்பிக்க வைக்கப்பட்ட போதைப் பொருள் கடத்தல் குற்றவாளிகளுக்கும், ஆளும் திமுக-கட்சித் தலைமைக்கும், தி.மு.க. கட்சியினருக்கும் என்ன தொடர்பு என்பதை யோக்கியர் வேஷம் கட்டும் மா.சு. விளக்குவாரா?
இந்த விடியா ஆட்சியில் தினந்தோறும் நாளிதழ்களிலும், ஊடகங்களிலும் கொலை, கொள்ளை, பாலியல் பலாத்காரம், போதைப் பொருள் கடத்தல் போன்ற சம்பவங்கள் இடம்பெறுவது வாடிக்கையாக உள்ளது. உதாரணத்திற்கு தலைநகர் சென்னையில் பட்டப் பகலில் வங்கியில் கொள்ளை அடித்துச் செல்லும் சம்பவமே சாட்சி. குரங்கு கையில் சிக்கிய பூமாலை போல் தற்போது தமிழக மக்கள் இந்த விடியா தி.மு.க. ஆட்சியின் கைகளில் சிக்கி சீரழிந்து வருகின்றனர்.அரசியல் நாகரீகம் அறியாமல் அதிகார மமதையில் நா கொழுப்பேரி பிதற்றும் மா.சு.-வுக்கு ஒன்றை மட்டும் நினைவூட்ட கடமைப்பட்டுள்ளேன்.
“யாகாவா ராயினும் நாகாக்க காவாக்கால்சோகாப்பர் சொல்லிழுக்குப் பட்டு,’ மக்களைக் காக்கும் அறப் போரில், அறம் காத்த முன்னாள் முதலமைச்சரும், சட்டமன்ற எதிர்க்கட்சித் தலைவருமான அண்ணன் திரு. எடப்பாடியார் அவர்கள் ஈடுபட்டு வருகிறார். இந்த வேள்வியில் வெற்றி பெறும்வரை, அனைத்திந்திய அண்ணா திராவிட முன்னேற்றக் கழகத்தின் ஒன்றரைக் கோடித் தொண்டர்களும் அணி வகுத்து நிற்பார்கள் என்பதை இந்த கும்பகர்ண ஆட்சியாளர்களுக்கு எச்சரிக்கையாக தெரிவித்துக் கொள்கிறேன்.
நிர்வாகத் திறனற்ற திமுக அரசும், அதன் அமைச்சர்களும், எதிர்க்கட்சிகளுக்கு எதிராக நீண்ட அறிக்கையை கொடுப்பதற்குப் பதில், மக்கள் பிரச்சினைகளைத் தீர்ப்பதில் கவனம் செலுத்தினால் தமிழகம் மகிழ்ச்சி அடையும். தமது திறமையின்மையை மறைக்க எதிர்க்கட்சிகளை குறை சொல்லும், மறைந்த திரு. கருணாநிதியின் மாடல் அரசு திருந்த, ஒரு வாய்ப்பு அளித்த மக்களை மீண்டும் வேதனையில் தள்ள வேண்டாம். எஞ்சி இருக்கும் காலத்தையாவது மக்களுக்கான ஆட்சியாக நடத்துவதே, இவர்கள் மக்களுக்கு செய்யும் உதவியாகும் என்பதைத் தெரிவித்துக் கொள்கிறேன்” என்று குறிப்பிட்டுள்ளார்.