நடிகர் பிரபாஸ் – இயக்குநர் பிரசாந்த் நீல் கூட்டணியில் உருவாகி வரும் ‘சலார்’ படத்தின் வெளியீட்டு தேதி அதிகாரப்பூர்வமாக அறிவிக்கப்பட்டுள்ளது.
கன்னட திரையுலகைச் சேர்ந்த இயக்குநரான பிரசாந்த் நீல் ‘கே.ஜி.எஃப்’ படத்தை இயக்கியதன் மூலம் பிரபலமான இயக்குநராக மாறினார். இவர் கடைசியாக இயக்கிய ‘கே.ஜி.எஃப். 2’ திரைப்படம் 1,250 கோடி ரூபாய்க்கும் மேல் வசூலித்து கன்னட திரையுலகை இந்தியாவே திரும்பி பார்க்க வைத்தது. இவர் அடுத்ததாக பிரபல தெலுங்கு நடிகரான பிரபாஸை வைத்து ‘சலார்’ படத்தை இயக்கி வருகிறார். ‘கே.ஜி.எஃப்.’ படத்தை தயாரித்த ஹோம்பாலே ஃபிலிம்ஸ்தான் இந்தப் படத்தையும் தயாரித்து வருகிறது. இந்தப் படத்தில் பிரபாஸுக்கு ஜோடியாக ஸ்ருதிஹாசன் நடித்து வருகிறார். மேலும் ஈஸ்வரி ராவ், ஜகபதி பாபு ஆகியோர் நடிக்கின்றனர். பிரித்விராஜ் சுகுமாறன் முக்கிய கதாபாத்திரத்தில் நடிக்கவுள்ளதாக கூறப்படுகிறது. புவன் கௌடா ஒளிப்பதிவு பணியை மேற்கொண்டு வருகிறார். ரவி பஸ்ரூர் இசைமையக்கிறார்.
200 கோடி ரூபாய் பட்ஜெட்டில் உருவாகவுள்ள இந்தப் படத்தின் பூஜை, கடந்த ஆண்டு ஜனவரி மாதம் 15-ம் தேதி போடப்பட்டு படப்பிடிப்பு துவங்கியது. இதையடுத்து படப்பிடிப்பு விறுவிறுப்பாக நடைபெற்று வந்தநிலையில், இந்தாண்டு ஏப்ரலில் படத்தை வெளியிட உள்ளதாக அறிவிக்கப்பட்டது. ஆனால், கடந்த ஆண்டு கொரோனா 2-வது அலை காரணமாக படப்பிடிப்பு தற்காலிகமாக நிறுத்தப்பட்டது.
அதன்பிறகு மீண்டும் படப்பிடிப்பு நடத்தப்பட்டநிலையில், இந்த வருடம் மே மாதம் படத்தின் டீசர் வெளியாகலாம் என தகவல்கள் வெளியானது. ஆனால் அப்போதும் எந்த அப்டேட்டும் வெளியாகதால், பிரபாஸின் ரசிகர்கள் ஏமாற்றமடைந்தனர். இதற்கிடையில் இந்தப் படத்தை தயாரித்து வரும் ஹோம்பாலே ஃபிலிம்ஸ் தனது ட்விட்டர் பக்கத்தில், வருகிற ஆகஸ்ட் 15-ம் தேதி மதியம் 12.58 மணிக்கு புதிய அறிவிப்பு வெளியிட உள்ளதாக போஸ்டர் ஒன்றுடன் கடந்த 13-ம் தேதி அறிவித்திருந்தது. இதனால் பிரபாஸின் ரசிகர்கள் கொண்டாட்டத்தில் இருந்தநிலையில், இன்று புதிய போஸ்டருடன் வருகிற 2023-ம் ஆண்டு செப்டம்பர் 28-ம் தேதி ‘சலார்’ படத்தை உலகம் முழுவதும் வெளியிட உள்ளதாக அதிகாரப்பூர்வமாக அறிவித்துள்ளனர்.
