ஓபிஎஸ் ஆதரவாளர்கள் கொண்டாட்டம்:
சென்னையில் கடந்த ஜூலை 11 ஆம் தேதி நடைபெற்ற அதிமுக பொதுக்குழு கூட்டம் செல்லாது என்று உயர் நீதிமன்றம் இன்று அதிரடி தீர்ப்பு அளித்துள்ளது. இன்றைய இத்தீர்ப்பை ஓபிஎஸ் ஆதரவாளர்கள் கொண்டாடிவரும் நிலையில், அதிமுக கட்சி நிர்வாகத்தில் இனி எனனென்ன அதிரடி மாற்றங்கள் வரப்போகிறது என்பதை அக்கட்சி தொண்டர்கள் ஆவலுடன் எதிர்பார்த்து கொண்டிருக்கின்றன. அதிமுக பொதுக்குழு குறித்த நீதிமன்ற தீர்ப்பு அரசியல்ரீதியாக திமுக, பாஜக ஆகிய இரு கட்சிகளில் யாருக்கு சாதகம், யாருக்கு பாதகம் என்ற கேள்வி அரசியல் அரங்கில் பரவலாக எழுந்துள்ளது.
நாங்கதான் எதிர்க்கட்சின்னு சொல்லும் பாஜக:
திமுக, அதிமுக என கடந்த அரை நூற்றாண்டாக தமிழக அரசியல் இவ்விரு கட்சிகளை மையமாக வைத்தே நடைபெற்று வருகிறது. திராவிட கட்சிகளின் இந்த இரு துருவ அரசியலை உடைத்து, தமிழகத்தில் வேரூன்ற வேண்டும் என்று துடித்துக் கொண்டிருக்கிறது 4 எம்எல்ஏக்களுடன் தமிழகத்தில் காலுன்றி இருக்கும் பாஜக. ஆளும் திமுக அரசின் தவறுகளை தீவிரமாக சுட்டிக்காட்டுபவர்கள் என்ற முறையில் தாங்கள்தான் தமிழகத்தின் உண்மையான எதிர்க்கட்சி என்று பாஜக மறைமுகமாக சொல்லி வருவதன் நோக்கமே, எம்எல்ஏக்கள் எண்ணிக்கையின்படி சட்டமன்றத்தில் எதிர்க்கட்சியாக இருக்கும் அதிமுகவை, மக்கள் மன்றத்தில் பின்னுக்குதள்ளும் நுட்பமான முயற்சிதான் என்பதே அரசியல் விமர்சகர்களின் பார்வையாக உள்ளது.
அதிமுக ஒற்றைத் தலைமை யுத்தம்:
திமுக Vs அதிமுக என்றிருக்கும் தமிழக அரசியலை திமுக Vs பாஜக என்று மாற்ற அக்கட்சி துடித்துக் கொண்டிருக்கும்போது தான் அதிமுகவில் ஒற்றைத் தலைமை யுத்தம் விஸ்வரூபம் எடுத்தது. கடந்த சில மாதங்களாக இந்த யுத்தம் நீடித்து வந்த நிலையிலும், கூட்டணி கட்சி என்ற முறையில் ஓபிஎஸ்- இபிஎஸ் தரப்பை சமாதானப்புடுத்த பாஜக ஆர்வம்காட்டவில்லை என்றுதான் சொல்ல வேண்டும். முன்பு தர்மயுத்த காலத்தில் மறைமுகமாக நடைபெற்ற சமாதான முயற்சியை போல தற்போது ஏன் பாஜக அந்த முயற்சியை முன்னெடுக்கவில்லை என்று கேள்வி பரவலாக எழுப்பப்பட்டு வந்தது. அதற்கு இபிஎஸ -ஒபிஎஸ் இடையேயான விவகாரம் உட்கட்சி பிரச்னை என்று கூலாக சொல்லிக் கொண்டிருந்தது பாஜக. அத்துடன் இபிஎஸ், ஓபிஎஸ் என எப்போதும் போல் அதிமுக ஒற்றுமையுடன் இருக்க வேண்டும் என்றே பாஜக மேலிடம் விரும்புவதாகவும கூறப்படுகிறது.
பாஜக ஒருபுறம் இப்படி சொன்னாலும், அதிமுக எப்போதும் போல் ஒன்றாக இருந்தால், தேர்தல் அரசியலில் அதனை சார்ந்தே இங்கு இருக்க வேண்டியுள்ளது. மாறாக அதிமுகவுக்குள் இப்போது ஏற்பட்டுள்ள பிளவின் விளைவாக அதிருப்தி அணி உருவானால் அந்த அணியை தமது தலைமையிலான கூட்டணியில் சேர்த்துக் கொள்ளலாம். அதிமுக அதிருப்தி வாக்குகள் எப்படியும் திமுகவுக்கு போகாது என்பதால், அந்த வாக்கை தமது தலைமையிலான அணி அறுவடை செய்யவாம் என்று பாஜக எண்ணியிருக்கலாம்.
அதனால்தான் அதிமுக ஒற்றைத் தலைமை யுத்தத்தில் இபிஎஸ்- ஓபிஎஸ் தரப்பை சமாதானப்படுத்தும் முயற்சியில் பாஜக இறங்கவில்லை என்ற கருத்தை முன்வைக்கின்றனர் அரசியல் விவரமறிந்தவர்கள். அதிமுக பொதுக்குழு குறித்து சென்னை உயர் நீதிமன்றம் இன்று அளித்துள்ள தீர்ப்பின் விளைவாக ஓபிஎஸ்- இபிஎஸ் தரப்பினர் மீண்டும் இணைந்து செயல்பாட்டால் அது பாஜகவுக்கு பாதகமான முடிவாகதான் இருக்கும் என்றே கருதப்படுகிறது.
திமுகவுக்கு சாதகம்தான்:
ஆளுங்கட்சி, எதிர்க்கட்சி என தாங்கள்தான் மாறி, மாறி இருக்கும் வேண்டும். இதற்கு அதிமுகவுடனான இருதுருவ அரசியலே தமக்கு நல்லதென திமுக எண்ணுவதாகவே தெரிகிறது. திமுக Vs அதிமுக என்ற அரசியலை திமுக Vs பாஜக என மாற்ற எண்ணும் அக்கட்சியின் திட்டத்துக்கு, அதிமுக பொதுக்குழு குறித்த நீதிமன்றத்தின் இன்றைய தீர்ப்பின் மூலம் பின்னடைவு ஏற்படக்கூடும் என்பதால், இதனை அரசியல் ரீதியாக தனக்கு சாதகமாகவே திமுக பார்க்கக்கூடும். திமுக கூட்டணியில் காங்கிரஸ் எப்படியோ, அதேபோல அதிமுக கூட்டணியில் பாஜக என்ற நிலை இனியும் தொடர வேண்டிவரும்.