எலான் மஸ்க் உலக புகழ்பெற்ற பணக்காரர்களுள் ஒருவர் ஆவார். சமீப காலமாக அவர் எடுத்து வரும் அதிரடி முடிவுகள் பலரை வியப்பில் ஆழ்த்தி வருகிறது. அவ்வப்போது மக்களுக்கு சில சர்ப்ரைஸ்களை கொடுத்து வருவதில் கில்லாடியாக திகழ்கிறார் எலான் மஸ்க். சில தினங்களுக்கு முன்பாக கூட டுவிட்டர் நிறுவனத்தை வாங்க உள்ளதாக கூறி அதிர்ச்சியை ஏற்ப்படுத்தினார்.
உலகின் நம்பர் 1 கோடீஸ்வரரான எலான் மஸ்க் டுவிட்டரில் அறிவிப்பு ஒன்றை வெளியிட்டு இருந்தார். உலக பெரும் பணக்காரர்களில் ஒருவரும் டெஸ்லா நிறுவனத்தின் தலைமை நிர்வாக அதிகாரியுமான எலான் மஸ்க், டுவிட்டர் நிறுவனத்தை வாங்கும் ஒப்பந்தத்தை சமீபத்தில் கைவிட்டார்.
டுவிட்டரை வாங்கும் திட்டத்தை எலான் மஸ்க் கைவிட்டது உலக அளவில் பேசு பொருள் ஆனது . இந்த நிலையில் எலான் மஸ்க் இங்கிலாந்தின் பிரபல கால்பந்து கிளப் அணியான மான்செஸ்டர் யுனைடெட் அணியை வாங்கப்போவதாக சில தினங்களுக்கு முன்பாக டுவிட்டரில் அறிவித்தார்.
இதுகுறித்து அவர் வெளியிட்டுள்ள டுவிட்டர் பதிவில் “தெளிவாகச் சொல்வதானால், நான் குடியரசுக் கட்சியின் இடது பாதியையும் ஜனநாயகக் கட்சியின் வலது பாதியையும் ஆதரிக்கிறேன்” என்று பதிவிட்டு இருந்தார். இந்த பதிவை தொடர்ந்து சில நிமிடங்களிலே மற்றொரு பதிவில் நான் மான்செஸ்டர் யுனைடெட் அணியை வாங்கப்போகிறேன் எனவும் அறிவித்துள்ளார்.
இந்த பதிவு பல லட்சம் பேரின் கவனத்தை ஈர்த்து வைரலாகியுள்ளது. உலகின் தலைசிறந்த கால்பந்து கிளப் அணிகளில் ஒன்றான மான்செஸ்டர் யுனைடெட்டில் தான் நட்சத்திர வீரர் கிறிஸ்டியானோ ரொனால்டோ விளையாடுகிறார் என்பது குறிப்பிடத்தக்கது.
பின்பு சில நேரங்களில் வெளியான மற்றொரு அறிவிப்பில் மான்செஸ்டர் யுனைடெட் அணியைஎலான் மஸ்க் வாங்கப்போவதில்லை எனவும் அது விளையாட்டுக்கு வெளியிடப்பட்ட அறிவிப்பு என்றும் தகவல் கிடைத்துள்ளது.