கடலூரில் கடந்த 2018ஆம் ஆண்டு நடந்த பொதுக்கூட்டத்தில் பேசியது தொடர்பாக நாஞ்சில் சம்பத் மீது வழக்கு தொடரப்பட்டிருந்தது. இதன் விசாரணை கடலூர் ஒருங்கிணைந்த நீதிமன்றத்தில் நடைபெற்று வருகிறது. இந்த விசாரணையில் ஆஜராகி விட்டு பின்னர் செய்தியாளர்களை சந்தித்தார் நாஞ்சில் சம்பத். அப்போது பேசுகையில், அதிமுகவின் அசைக்க முடியாத தலைவர் என்று நாடகமாடிய எடப்பாடி பழனிசாமிக்கு உச்ச நீதிமன்றம் வழங்கிய தீர்ப்பு ஒரு முற்றுப்புள்ளியாக அமைந்துவிட்டது. ஏனெனில் தன்னை முதலமைச்சராக்கிய
தலையிலே கைவைத்து, அவரையே கட்சியிலிருந்து நீக்கியவர்.
இவர் எந்த காலத்திலும் தமிழ்நாட்டு அரசியலில் வெற்றி பெற முடியாது. கொள்ளையடித்த பணத்தை வைத்து பொதுக்குழு உறுப்பினர்கள் மூலம் அரங்கேற்றிய நாடகம் நேற்றுடன் முடிவுக்கு வந்துள்ளது.
தமிழ்நாட்டு அரசியலில் அனாதை ஆவார் என கூறினார். மேலும் பேசுகையில், அதிமுகவை காப்பாற்றக்கூடிய ஒரு மிகப்பெரிய பொறுப்பை உயர் நீதிமன்றம் ஓபிஎஸ்க்கு வழங்கியுள்ளது.
அவர் சசிகலாவை ஆதரிக்கும் மன நிலையில் உள்ளார். அதாவது அதிமுகவை உயிர்த் துடிப்போடு நடத்தும் வலிமை சசிகலாவிற்கு தான் இருக்கிறது. அவரின் பிறந்த நாளுக்கு உயர் நீதிமன்றம் நேற்று வழங்கிய தீர்ப்பு ஒரு பரிசு. அவருக்கு எனது வாழ்த்துகள். அதிமுகவிற்கு ஒரு எதிர்காலம் இருக்கும் என்று நம்புகிறேன். ஆனால் அதற்கு தலைமை தாங்குவதற்கு எடப்பாடிக்கு எந்த தகுதியும் இல்லை.
இவர் எதிர்க்கட்சித் தலைவராக இருப்பது இன்னும் எத்தனை நாளைக்கு? இவருக்கு செல்வாக்கு இல்லை என்றால் எம்.எல்.ஏக்கள் அனைவரும் ஓபிஎஸ் பக்கம் வந்து விடுவார்கள். அதிமுக பலவீனப்பட வேண்டும். சிதைய வேண்டும் என அந்தக் கட்சிக்குள் ஊடுருவி அதை அழித்துவிட்டு அந்த இடத்தில் பாஜக வரவேண்டும் என்ற திட்டத்திற்கு எடப்பாடி பழனிசாமி பலியாகியுள்ளதாக குறிப்பிட்டார்.
தொடர்ந்து பேசும் போது, டாஸ்மாக் மதுக்கடைகளை தமிழ்நாட்டில் மூட முடியாது. அப்படி மூட வேண்டும் என்றால் மிகப்பெரிய கலாச்சார மாற்றம் ஏற்பட வேண்டும். அதற்கு அரசு மட்டுமல்ல. தன்னார்வ தொண்டு நிறுவனங்கள், பள்ளி, கல்லூரி போன்ற அனைவரும் சேர்ந்து தான் முடிவெடுக்க வேண்டும். தமிழகத்தை பொறுத்தவரை 75 சதவீத மக்கள் குடிகாரர்களாக ஆகிவிட்டனர். அவர்களை போதையின் பாதையில் இருந்து விடுவிக்க அறம் சார்ந்த திட்டம் நிறைவேற்றப்பட வேண்டும். இதற்கு மத்திய அரசு உதவினால் மட்டுமே, அதுகுறித்து முதலமைச்சர் சிந்திக்க முடியும் என்று நாஞ்சில் சம்பத் தெரிவித்தார்.