அதிமுகவில் பதவி சண்டை பல்லை இளித்து கொண்டு சிரிக்கிறது. ஓ.பன்னீர்செல்வத்தை ஒதுக்கி தள்ளிவிட்டு, அதிமுக இடைக்கால பொதுச்செயலாளர் பதவியை எடப்பாடி பழனிச்சாமி திடீரென கைப்பற்றினார்.
தர்மத்தின் வாழ்வுதனை சூது கவ்வும்.. தர்மம் மீண்டும் வெல்லும் என்கிற கோஷத்துடன் நீதிமன்றத்தின் கதவை தட்டிய ஓபிஎஸ்சுக்கு நிம்மதி தரும் தீர்ப்பு வந்ததால் அதிமுகவில் பெரும் பரபரப்பான சூழல் நிலவி வருகிறது.
இந்நிலையில் சாட்சிக்காரன் காலில் விழுவதை விட, சண்டைக்காரன் காலில் விழுவதே மேல் என, கருதிய ஓ.பி.எஸ் யாருமே எதிர்பாராத வகையில் சசிகலா, டிடிவி தினகரன் ஆகியோருக்கு அழைப்பு விடுத்து அனலை கிளப்பினார்.
இதை சற்றும் எதிர்பாராத எடப்பாடி பழனிசாமி அதிமுக
கைக்கு போகாதவாறு என்னென்ன முயற்சிகள் எடுக்க வேண்டுமோ? அதையெல்லாம் மேற்கொண்டு வருகிறார்.
இதன் ஒரு பகுதியாக அதிமுக வழக்கில் வழங்கப்பட்ட தீர்ப்பை எதிர்த்து சென்னை உயர் நீதிமன்றத்தில் எடப்பாடி பழனிசாமி மேல்முறையீடு செய்துள்ளார். இந்த வழக்கு நாளை விசாரணைக்கு வர இருக்கிறது.
இந்த பரபரப்பான சூழ்நிலையில் நேற்று சொந்த ஊரான சேலத்துக்கு விரைந்த எடப்பாடி பழனிசாமி தன்னுடைய வக்கீல்களுடன் விடிய விடிய செல்போனிலேயே ஆலோசனை செய்ததாக கூறப்படுகிறது.
அப்போது கோர்ட்டில் எந்த மாதிரியான வாதங்களை முன்வைக்க போகிறீர்கள்? என எடப்பாடி பழனிசாமி கேட்டதற்கு, ‘உச்சநீதிமன்றத்தில் ஓபிஎஸ் கோரிக்கை நிராகரிக்கப்பட்டதை சுட்டிக்காட்டி உயர்நீதிமன்றம் அளித்த தீர்ப்புக்கு இடைக்கால தடை உத்தரவு கேட்போம்.
அப்படி நீதிமன்றம் தடை உத்தரவு தந்துவிட்டால் நீங்கள் இடைக்கால பொதுச்செயலாளராக தொடர முடியும். அதை பயன்படுத்தி கட்சியில் விரும்பும் மாற்றத்தை செய்யலாம், என சொல்லி இருக்கின்றனர்.
இதை கேட்டு முகத்தில் மகிழ்ச்சியை வெளிப்படுத்திய எடப்பாடி பழனிச்சாமி, ‘இது நடக்குமா?’ என சிரித்துக்கொண்டே கேட்க, ‘எது நடக்கனுமோ அது நன்றாகவே நடக்கும்’ என நீங்கள் தானே சொன்னீங்கன்னு கூறி வழக்கறிஞர்கள் சிரித்துள்ளனர்.
விடிய விடிய ஆலோசனை நடத்தியும் கிடைக்காத ‘பாயிண்ட்’ விடியற்காலையில் கிடைத்ததால் ஒட்டுமொத்த டீமும், ஜாலி மனநிலையில் பேச்சை முடித்ததாக எடப்பாடி ஆதரவாளர்கள் காதில் கிசுகிசுக்கின்றனர்.