கைப்பந்து-கால்பந்து
பெரம்பலூர் மாவட்ட பள்ளி கல்வித்துறை சார்பாக பாரதியார் பிறந்த நாள் விழா, குடியரசு தின விழாவினையொட்டி குன்னம் குறுவட்ட அளவில் பள்ளி மாணவ-மாணவிகளுக்கான விளையாட்டு போட்டிகள் நடைபெற்று வருகிறது. நேற்று 14, 17, 19 வயதிற்குட்பட்ட பள்ளி மாணவர்களுக்கான கைப்பந்து, ஹேண்ட் பால், கூடைப்பந்து, கால்பந்து, பூப்பந்தாட்டம் ஆகியவை பெரம்பலூர் மாவட்ட எம்.ஜி.ஆர். விளையாட்டு அரங்கில் நடந்தது.
போட்டியினை மாவட்ட உடற்கல்வி ஆய்வாளர் ராஜேந்திரன், பெரம்பலூர் மாவட்ட வாலிபால் அசோசியேசன் தலைவர் பரமேஷ்குமார், நகர்மன்ற துணைத்தலைவர் ஹரிபாஸ்கர் ஆகியோர் தொடங்கி வைத்தனர்.
பரிசு, சான்றிதழ்
இதில் வேப்பூர், ஆலத்தூர் ஒன்றியங்களை சேர்ந்த பள்ளிகளில் இருந்து ஆயிரத்திற்கும் மேற்பட்ட மாணவர்கள் பங்கேற்று தங்களது திறமைகளை வெளிப்படுத்தினர். போட்டியில் 17, 19 வயதிற்குட்பட்ட பிரிவில் ஹேண்ட் பால் போட்டியில் கீழப்பெரம்பலூர் அரசு மேல்நிலைப்பள்ளி மாணவர் அணி வெற்றி பெற்றது. இதேபோல் 19 வயதிற்குட்பட்ட வாலிபால், பூப்பந்தாட்டம் போட்டிகளில் சு.ஆடுதுறை அரசு மேல்நிலைப்பள்ளி அணியினர் வெற்றி பெற்றனர்.
இதையடுத்து, முதலிடம் பிடித்த அணிகளுக்கு பரிசு மற்றும் சான்றிதழ் வழங்கப்படவுள்ளது. மேலும் முதலிடம் பிடித்த மாணவர்கள் மற்றும் அணிகள் அடுத்த மாதம் (செப்டம்பர்) நடைபெறவுள்ள மாவட்ட அளவிலான போட்டிகளில் பங்கேற்க உள்ளனர் என்பது குறிப்பிடத்தக்கது.
மாணவிகளுக்கு…
பெரம்பலூர் குறுவட்ட அளவிலான 14, 19 வயதிற்குட்பட்ட பள்ளி மாணவிகளுக்கான கால்பந்து, வாலிபால், ஹேண்ட் பால், கூடைப்பந்து, இறகுப்பந்தாட்டம் ஆகிய போட்டிகள் இன்று (வியாழக்கிழமை) நடைபெறுகிறது. இதேபோல் குன்னம் குறுவட்ட அளவிலான 14, 17, 19 வயதிற்குட்பட்ட பள்ளி மாணவிகளுக்கான வளையப்பந்து, கேரம், கபடி, கோ-கோ ஆகிய போட்டிகள் வருகிற 29-ந்தேதி வரிசைப்பட்டி சரஸ்வதி வித்யாலயா பள்ளியில் நடைபெறவுள்ளது.