சென்னை கடற்கரையிலிருந்து செங்கல்பட்டுக்கு 23.8.2022-ம் தேதி இரவு மின்சார ரயில் புறப்பட்ட தயாராகிக் கொண்டிருந்தது. அந்த ரயிலில் பாதுகாப்பு பணியில் ரயில்வே பாதுகாப்பு படையைச் சேர்ந்த பெண் காவலர் ஆசீர்வா என்பவர் இருந்தார். அப்போது பெண்களுக்கான ரயில் பெட்டியில் ஆண் ஒருவர் ஏற முயன்றார். அதைக் கவனித்த பெண் காவலர் ஆசீர்வா இது, லேடீஸ் கோச், நீங்கள் பொது கோச்சில் ஏறுங்க என்று கூறியுள்ளார். அதைக் கண்டுக்கொள்ளாத அந்த நபர், பெண்களுக்கான ரயில் பெட்டியில் ஏறியுள்ளார். அதனால் அந்த நபருக்கும் பெண் காவலர் ஆசீர்வாவுக்கும் இடையே கடும் வாக்குவாதம் ஏற்பட்டது.
அதனால் ஆத்திரமடைந்த அந்த நபர், மறைத்து வைத்திருந்த கத்தியை எடுத்து பெண் காவலர் ஆசீர்வாவைக் குத்திவிட்டு தப்பி ஓடிவிட்டார். அதைப்பார்க்க பயணிகள் அதிர்ச்சியடைந்தனர். அங்கிருந்தவர்கள் உடனடியாகக பெண் காவலரை மருத்துவமனைக்கு அழைத்துச் சென்றனர். இந்தச் சம்பவம் குறித்து எழும்பூர் ரயில்வே காவல் நிலையத்துக்கு தகவல் தெரிவிக்கப்பட்டது. சம்பவம் நடந்த இடத்துக்கு வந்த போலீஸார், பெண் காவலர் ஆசீர்வாவிடம் விசாரித்தனர். அவர் அளித்த புகாரின் பேரில் வழக்கு பதிவு செய்து போலீஸார் பெண் காவலரை கத்தியால் குத்தியவரை தேடிவருகின்றனர். ரயில் நிலையத்தில் உள்ள சி.சி.டி.வி காட்சிகள் அடிப்படையில் விசாரணை நடந்து வருகிறது.