சிறை சென்ற போது டிடிவி தினகரனை அதிமுகவின் துணைப் பொதுச்செயலாளராக பதவியில் அமரவைத்துவிட்டு சென்றார். அதன்பின் நடைபெற்ற அரசியல் சடுகுடு விளையாட்டில் தினகரன், திஹார் சிறைக்கு சென்றார், அதிமுகவிலிருந்து வெளியேற்றப்பட்டார். ஆனால் திடீரென அவருக்கு அதிமுக தொண்டர்கள் மத்தியில் ஆதரவு அதிகரித்தது. ஆர்கேநகர் இடைத் தேர்தலில் அதிமுக, திமுக ஆகிய கட்சிகளை ஓரம்கட்டி சுயேச்சையாக குக்கர் சின்னத்தில் போட்டியிட்டு வெற்றி பெற்றார்.
பாஜக எதிர்ப்பு, இபிஎஸ் – ஓபிஎஸ் எதிர்ப்பு ஆகியவற்றில் மும்முரமாக இருந்த அவர் சென்ற இடமெல்லாம் கூட்டம் கூடியது. குறுகிய காலத்தில் தமிழக அரசியலில் பேசுபொருளானார். அவரது செய்தியாளர்கள் சந்திப்பு ஒவ்வொன்றும் சமூகவலைதளங்களில் அவருக்கு லைக்ஸ்களை பெற்றுத் தந்தது.
2019 மக்களவைத் தேர்தலிலும், அதோடு நடத்தப்பட்ட சட்டமன்ற இடைத்தேர்தல்களிலும் அமமுக வெற்றி பெறாவிட்டாலும் அதிமுக – பாஜக கூட்டணியை பதம் பார்க்க அவர் பிரித்த வாக்குகள் காரணமானது. இதே நிலைதான் 2021 சட்டமன்றத் தேர்தலிலும் நடந்தது. அமமுக போட்டியிட்ட எந்த தொகுதியிலும் வெற்றி பெறவில்லை. டிடிவி தினகரன் போட்டியிட்ட கோவில்பட்டி தொகுதியிலும் கடம்பூர் ராஜுவிடம் வெற்றியை பறிகொடுத்தார்.
ஆனால் அதிமுகவின் வெற்றியை பல தொகுதிகளில் தடுத்தது அமமுக. தேர்தலுக்கு முன்பே அமமுகவை கூட்டணிக்கு கொண்டுவரலாம் என பாஜக அழுத்தம் கொடுத்த போதும்
மறுத்துவிட்டார். இது அமித் ஷா உள்ளிட்டோருக்கு கோபத்தை ஏற்படுத்தியதாம்.
இரட்டை இலை சின்னம் பெற லஞ்சம் கொடுத்ததாக தொடரப்பட்ட வழக்கு சமீபத்தில் வேகமெடுத்து வருவதும், அது தொடர்பான விசாரணைகளில் தினகரனுக்கு கடுமையான நெருக்கடிகள் கொடுக்கப்படுவதாகவும் தகவல் வெளியானது. நெருக்கடி கொடுப்பதே நெருக்கமாவதற்கு தான் என டெல்லியிலிருந்து ஒரு தகவல் தினகரனுக்கு சென்றதாக சொல்கிறார்கள்.
நம்ம கட்சியில் இணைஞ்சுருங்க, உங்க லெவலே மாறிடும் என ஆசை வார்த்தைகள் வந்தனவாம். அமமுகவை கலைக்க முடியாது, வேண்டுமென்றால் கூட்டணி வைக்கலாம் என தினகரன் தரப்பு வாண்ட்டடாக வண்டியில் ஏற ஆசை தெரிவித்ததாகவும் டெல்லி இதனால் குஷியாகிவிட்டதாகவும் சொல்கிறார்கள். இதன் தொடர்ச்சியாகவே தேசிய கட்சிகளான பாஜக அல்லது காங்கிரஸ் கட்சியோடு கூட்டணி வைப்போம் என அமமுக பொதுக்குழுவில் பேசினாராம்.
ஆனால் இதற்கு மீண்டும் எடப்பாடி பழனிசாமி முட்டுகட்டை போடுவார் என்பதால் தான் அவரை கைவிட்டுவிட்டு, ஓபிஎஸ் தலைமையில் சசிகலாவையும் அதிமுகவில் இணைத்துக் கொண்டு தினகரன் கட்சியை கூட்டணியில் இணைத்துக் கொண்டு 2024 தேர்தலை நோக்கி பயணம் செல்வோம் என பாஜக தயாராகிவிட்டதாம்.