தமிழ்நாட்டில் அரசியல் கட்சிகள் மாநாடு, பொதுக்கூட்டம் என்றாலே வழக்கமாக பேனர்கள், பிளக்ஸ் போர்டுகள் மற்றும் கட்சிக்கொடிகளை பல கிலோ மீட்டர் தூரம் வைத்து இம்சைக்கு உள்ளாக்குவது உண்டு.
அதிலும்
, அதிமுக என்றால் இதுபோன்ற அலப்பறைகளுக்கு அளவே இருக்காது. கட்சி தலைமையின் கவனத்தை ஈர்க்கும் வகையில், அந்தந்த பகுதிகளின் பொறுப்பாளர்கள் இதுபோன்ற வேலைகளுக்காகவே லட்சங்களை வாரி இறைப்பார்கள்.
இதுபோன்ற பேனர் கலாச்சாரத்தின் விளைவாக ஏராளனமான விபத்துகள் ஏற்பட்டு உயிர் பலிகளும் அதிகரித்து வந்தது. இதனால், சமூக ஆர்வலர்கள் அதிருப்தி அடைந்து வந்தனர்.
மேலும், இத்தகைய பேனர் கலாச்சாரத்துக்கு அனைத்து தமிழக அரசியல் கட்சிகளும் முடிவு கட்ட வேண்டும் என்றும், தொடர்ந்து சமூக ஆர்வலர்கள் கோரிக்கை விடுத்தும் வந்தனர்.
இந்த நிலையில் கட்சி நிகழ்ச்சிகளில் பேனர் மற்றும் விளம்பர பதாகைகள் வைக்கும் கலாச்சாரத்தை திமுகவினர் கண்டிப்பாக தவிர்க்க வேண்டும் என, கடந்த ஆண்டிலேயே
உத்தரவிட்டு இருந்தார்.
ஆனாலும் ஆங்காங்கே ஒருசில திமுக நிகழ்ச்சிகளில் பேனர், விளம்பர பதாகைகள் வைக்கும் சம்பவங்கள் தொடர்ந்தபடியேதான் உள்ளது. இந்நிலையில் திமுக தலைவரும், தமிழக முதல்வருமான மு.க.ஸ்டாலின் கோவையில் கலந்து கொண்ட நிகழ்ச்சியில் பேனர்கள் தவிர்க்கப்பட்டது, பெரும் வரவேற்பை பெற்று உள்ளது.
இதுகுறித்து திமுக நிர்வாகிகள் சிலர் கூறுகையில்‘தமிழக முதல்வர் மு.க.ஸ்டாலின் வருகையையொட்டி பிளக்ஸ் பேனர்கள், கொடிகள் கட்டி வரவேற்பு அளிக்க ஏற்பாடு செய்யப்பட்டது.
ஆனால் பிளக்ஸ் பேனர்கள், கட்சி கொடிகளால் விபத்து ஏற்படுவதால் அவற்றை தவிர்க்குமாறு முதல்வர் மு.க.ஸ்டாலின் கட்சியின் நிர்வாகிகளுக்கு அதிரடியாக உத்தரவிட்டு இருந்தார்.
இதுதொடர்பான ஆலோசனைக் கூட்டத்திலும் பிளக்ஸ் பேனர்கள், கட்சி கொடிகளை கட்ட வேண்டாம் என, அமைச்சர் செந்தில் பாலாஜி எங்களுக்கு எச்சரிக்கை விடுத்திருந்தார்.
இதன் காரணமாகவே பொள்ளாச்சியில் நிகழ்ச்சி நடந்த மாநாடு இடம் மற்றும் வரவேற்பு அளிக்கப்படும் 19 இடத்தில் மட்டும் கட்சி கொடிகள் கட்டப்பட்டன. வேறு எங்கும் திமுக கொடிகளோ அல்லது பிளக்ஸ் பேனர்களோ வைக்கப்படவில்லை’ என கூறினர்.
இதற்கிடையே வழிநெடுகிலும் பேனர் மற்றும் பதாகை இல்லாததை கண்ட முதல்வர் ஸ்டாலின் மிகுந்த மகிழ்ச்சி அடைந்ததாகவும், அமைச்சர் செந்தில் பாலாஜி திமுகவின் கட்டுப்பாட்டை காப்பாற்றி உள்ளதாகவும், கட்சி நிர்வாகிகளிடம் ஓப்பனாகவே பாராட்டி உள்ளார்.
இதன் மூலம் தமிழக முதல்வர் ஸ்டாலின் குட் லிஸ்டில் அமைச்சர் செந்தில் பாலாஜி இடம் பெற்றுவிட்டதாகவும், இதற்கான பரிசு வெகுவிரைவில் வழங்கப்படலாம் எனவும் கட்சியின் முன்னணி நிர்வாகிகள் பாராட்டி பேசுகின்றனர்.