உச்ச நீதிமன்றத்தின் 48ஆவது தலைமை நீதிபதியாக என்.வி.ரமணா கடந்த 2021ஆம் ஆண்டு பதவியேற்றார். அவரது பதவிக்காலம் ஆகஸ்ட் 26ஆம் தேதியுடன் (நேற்று) முடிவடைந்ததையடுத்து, அவர் ஓய்வு பெற்றார். பெகாசஸ் ஒட்டு கேட்பு விவகாரம், பில்கிஸ் பானு வழக்கு குற்றவாளிகளை விடுவித்தது, சட்டவிரோத பணப்பரிவர்த்தனை தடுப்பு சட்டம் செல்லும் என்ற தீர்ப்புக்கு எதிரான மனு, பஞ்சாபில் பிரதமர் மோடியின் பாதுகாப்பு குளறுபடி ஆகிய 4 முக்கிய வழக்குகளை ஓய்வு பெறுவதற்கு முதல் நாள் நீதிபதி என்.வி.ரமணா விசாரித்தார். முன்னதாக, இலவசங்கள் தொடர்பாக தமிழக நிதியமைச்சர் பிடிஆர் குறித்து அவர் தெரிவித்த கருத்துகள் சர்ச்சையானது.
இந்த நிலையில், ஓய்வுபெற்ற உச்ச நீதிமன்ற தலைமை நீதிபதி என்.வி. ரமணா செய்தது என்ன என்று விழுப்புரம் எம்.பி., ரவிக்குமார் கேள்வி எழுப்பியுள்ளார். இதுகுறித்து அவர் தனது முகநூல் பக்கத்தில் பதிவிட்டுள்ளதாவது: “ ‘கடந்த 16 மாதங்களில், உச்ச நீதிமன்றத்திற்கு 11 நீதிபதிகளை நியமிக்க முடிந்துள்ளது, பல்வேறு உயர் நீதிமன்றங்களுக்குப் பரிந்துரைக்கப்பட்ட 255 நீதிபதிகளில் 224 நீதிபதிகள் நியமிக்கப்பட்டுள்ளனர் என்பதை மகிழ்ச்சியுடன் தெரிவித்துக் கொள்கிறேன். இது உயர் நீதிமன்றங்களின் அனுமதிக்கப்பட்ட மொத்த எண்ணிக்கையில் சுமார் 20% ஆகும். எங்களின் ஒருங்கிணைந்த முயற்சியின் காரணமாக, அதிக பெண் நீதிபதிகளை நியமிப்பதிலும், சமூகப் பன்முகத்தன்மையை நீதிமன்ற அமர்வுகளில் மேம்படுத்துவதிலும் குறிப்பிடத்தக்க அளவு முன்னேற்றத்தை அடைந்துள்ளோம்’ என தலைமை நீதிபதி பதவியிலிருந்து ஓய்வுபெற்ற திரு என்.வி.ரமணா கூறியிருக்கிறார்.
பெண்களை நீதிபதிகளாக நியமிப்பதில் ஒப்பீட்டளவில் அவர் கூடுதல் ஆர்வம் காட்டினார் என்பது உண்மைதான். உயர்நீதிமன்றங்களிலும் உச்சநீதிமன்றத்திலும் அவர் காலத்தில் கணிசமான எண்ணிக்கையில் பெண்கள் நியமிக்கப்பட்டனர். ஆனால் எஸ்சி, எஸ்டி சமூகத்தினரை நீதிபதிகளாக நியமிப்பதில் அவர் காலத்தில் ஏற்பட்ட முன்னேற்றம் என்ன? அவர் காலத்தில் உச்சநீதிமன்றத்துக்கு நியமிக்கப்பட்ட 11 நீதிபதிகளில் கேரளாவிலிருந்து சென்ற நீதிபதி C T ரவிக்குமார் மட்டும்தான் தலித் சமூகத்தைச் சேர்ந்தவர்.
1980 டிசம்பரில் உச்ச நீதிமன்றத்துக்கு நியமிக்கப்பட்ட முதல் தலித் நீதிபதி கே.வரதராஜன் ஆவார். உச்சநீதிமன்றத்துக்கு ஒரு தலித் நீதிபதியாகச் செல்வதற்கு நாடு சுதந்திரமடைந்து 33 ஆண்டுகள் ஆனது என்பதே இந்த நாடு எந்த அளவு ஜனநாயகத் தன்மையோடு உள்ளது என்பதற்கு ஒரு உதாரணம் ஆகும். கே.வரதராஜனின் நியமனத்திற்குப் பிறகு, 2010 வரை உச்சநீதிமன்றத்தில் ஒரு தலித் நீதிபதி மட்டுமே இருந்தார். 2010-2019 க்கு இடையில் ஒரு தலித் நீதிபதியும் உச்ச நீதிமன்றத்துக்கு நியமிக்கப்படவில்லை. 2019 இல் நீதிபதி பி.ஆர். கவாய் நியமிக்கப்பட்டார். எதிர்காலத்தில் அவர் தலைமை நீதிபதியாக வரவிருக்கிறார் என்பது குறிப்பிடத்தக்கதாகும்.
நீதிபதி என்.வி.ரமணா காலத்தில் நியமிக்கப்பட்ட 224 உயர்நீதிமன்ற நீதிபதிகளில் எத்தனை பேர் தலித் நீதிபதிகள்? ‘உச்ச நீதிமன்றம் மற்றும் உயர் நீதிமன்றங்களின் நீதிபதிகள் நியமனம் இந்திய அரசியலமைப்புச் சட்டத்தின் 124, 217 மற்றும் 224 ஆகிய பிரிவுகளின் கீழ் செய்யப்படுகிறது, இது எந்தவொரு சாதி அல்லது நபர்களுக்கும் இடஒதுக்கீடு வழங்கவில்லை. எனவே நீதிபதிகளின் சாதிவாரியான தரவு எதுவும் ஒன்றிய அரசால் பராமரிக்கப்படவில்லை’ என சட்ட அமைச்சர் மாநிலங்களவையில் தெரிவித்தார் (31.03.2022). இது No Data Govt அப்படித்தான் சொல்வார்கள். வேறு எவரிடமாவது தகவல் இருக்கிறதா?” என்று கேள்வி எழுப்பியுள்ளார்.