வாசிக்க நேரம் இல்லையா? செய்தியைக் கேளுங்கள்
புதுடில்லி: இந்தியாவிலேயே தயாரிக்கப்பட்ட தேஜஸ் போர் விமானத்தை வாங்க அர்ஜென்டினா ஆர்வம் கொண்டுள்ளதாகவும், அந்நாட்டு விமானப்படையில் இணைக்கவும் திட்டமும் அந்நாட்டிடம் உள்ளதாக இந்தியா கூறியுள்ளது.
மத்திய வெளியுறவுத்துறை அமைச்சர் ஜெய்சங்கர் இரண்டு நாள் பயணமாக அர்ஜென்டினா சென்றுள்ளார். அப்போது, அந்நாட்டு அதிபர் ஆல்பெர்டோ பெர்ணாண்டசையும், பின்னர் வெளியுறவுத்துறை அமைச்சர் சன்டியாகோ கபிரியோவை சந்தித்து பேசினார். அப்போது, பாதுகாப்பு அணுசக்தி மற்றும் விண்வெளி ஆகிய துறைகளில் இரு நாடுகளுக்கு இடையிலான ஒத்துழைப்பு குறித்து இருவரும் விவாதித்தனர்.
பிறகு இரு நாடுகளும் கூட்டாக அறிக்கை வெளியிட்டுள்ளன. இந்த அறிக்கையில், இந்தியாவிலேயே தயாரிக்கப்படும் தேஜஸ் போர் விமானத்தை வாங்கவும், அதை தனது விமானப்படையில் இணைக்கவும் அர்ஜென்டினா ஆர்வம் கொண்டுள்ளது. இது தொடர்பாக பேச்சுவார்த்தை நடந்தது. இவ்வாறு அந்த அறிக்கையில் கூறப்பட்டு உள்ளது.
மேலும், ஆயுதப்படை அதிகாரிகள் இரு நாடுகளுக்கும் பயணம், பாதுகாப்பு சார்ந்த பயிற்சி மற்றும் பாதுகாப்பு தளவாடங்களை இரு நாடுகளும் இணைந்து தயாரிப்பது குறித்தும் இரு நாடுகளும் ஒப்பு கொண்டுள்ளன.
மலேஷியா, பிலிப்பைன்ஸ் மற்றும் இந்தோனேஷியா உள்ளிட்ட நாடுகளும் தேஜஸ் போர் விமானத்தை வாங்க ஆர்வம் கொண்டுள்ளன.
புதிய செய்திகளுக்கு தினமலர் சேனலை Subscribe செய்யுங்கள்
Advertisement