“டாஸ்மாக் கடைகளை மூடும் அறிவிப்பை விநாயகர் சதுர்த்தி அன்று முதலமைச்சர் வெளியிட வேண்டும்,” என, இந்து மக்கள் கட்சி தலைவர் அர்ஜூன் சம்பத் வலியுறுத்தி உள்ளார்.
ராஜபாளையம் மாப்பிள்ளை விநாயகர் நற்பணி மன்றம் சார்பில், விநாயகர் சதுர்த்தி விழா நடைபெற்றது. இந்த விழாவில், இந்து மக்கள் கட்சித் தலைவர் அர்ஜூன் சம்பத் கலந்து கொண்டார். இந்த நிகழ்ச்சிக்கு பிறகு, செய்தியாளர்களிடம் அர்ஜூன் சம்பத் கூறியதாவது:
இரண்டு ஆண்டு கொரோனா காலத்திற்கு பின் தமிழகம் முழுவதும் இந்தாண்டு ஒரு லட்சத்திற்கும் மேலான இடங்களில் “மண் காப்போம்” என்ற கருத்தின் கீழ் விநாயகர் சதுர்த்தி கொண்டாடப்பட உள்ளது. பல இடங்களில் அரசு ஒத்துழைப்புடன் கொண்டாடும் நிலையில் சில பகுதிகளில் அதற்கு போலீசாரின் தடை உள்ளது.
போதை இல்லா தமிழகம் என்ற முதலமைச்சர் மு.க.ஸ்டாலின் எதிர்பார்ப்பின்படி சர்வாதிகாரியாக மாறியாவது போதையை ஒழிக்க வேண்டும். இதற்கு முதலில் அவர் ஒழிக்க வேண்டியது டாஸ்மாக் கடையை தான். டாஸ்மாக் போதை, கஞ்சா போதை வேறு இல்லை. திராவிட மாடல் முதலமைச்சர் மு.க.ஸ்டாலின், எதிர்க்கட்சித் தலைவராக இருக்கும் போது டாஸ்மாக் கடைக்கு எதிராக போராட்டம் நடத்தி உள்ளார்.
டாஸ்மாக் மூடும் அறிவிப்பை விநாயகர் சதுர்த்தி அன்று வெளியிட்டால் வாழ்நாள் முழுவதும் தமிழ் சமுதாயம் மு.க.ஸ்டாலினுக்கு கடமைப்பட்டிருக்கும். தமிழகத்தில் வளர்ச்சி திட்டங்களை தடுக்க வேண்டும் என இயங்கும் அமைப்புகளை அரசு இரும்புக்கரம் கொண்டு ஒடுக்க வேண்டும்.
இவ்வாறு அவர் கூறினார்.