கேரள மாநிலத்தில், பயங்கர நிலச்சரிவு ஏற்பட்டதில், ஒரே குடும்பத்தைச் சேர்ந்த 5 பேர் பலியான சம்பவம் சோகத்தை ஏற்படுத்தி உள்ளது.
அண்டை மாநிலமான கேரள மாநிலத்தில், கடந்த சில நாட்களாக, பல்வேறு மாவட்டங்களில், மழை பெய்து வருகிறது. இந்நிலையில் இன்று அதிகாலை 3 மணியளவில், இடுக்கி மாவட்டம், தொடு புழாவை அடுத்த காஞ்ஞாரில், திடீரென்று நிலச்சரிவு ஏற்பட்டது.
இந்த நிலச்சரிவு காரணமாக, சிற்றடிச்சால் என்ற இடத்தை சேர்ந்த சோமன் என்பவரது வீடு, மண்ணுக்கு அடியில் புதைந்து சிதையுண்டது. இந்த விபத்தில் வீட்டிற்குள் தூங்கிக் கொண்டு இருந்த சோமன் (வயது 53), அவரது மனைவி ஷிஜி (50), மகள் ஷிமா (25), ஷிமாவின் மகன் தேவானந்த் (4) சோமனின் தாயார் தங்கம்மா (70) ஆகிய 5 பேரும் மண்ணில் புதையுண்டு பலியாகினர்.
நிலச்சரிவில் வீடு புதையுண்ட சம்பவம் குறித்த தகவல் அறிந்து வந்த தீயணைப்பு படையினர், தேசிய பேரிடர் மீட்பு படை வீரர்கள் அடங்கிய குழு, நவீன இயந்திரங்கள், மோப்ப நாய்கள் உதவியுடன் மண்ணில் புதையுண்டவர்களை தேடும் பணிகளை தொடங்கினர்.
வருவாய் துறை அமைச்சர் ராஜன், டீன் குரியாகோஸ் எம்.பி, மாவட்ட கலெக்டர் ஷீபா ஜார்ஜ், உதவி கலெக்டர் பி.ஜேக்கப், வருவாய் துறை அதிகாரி ஷாஜி ஆகியோர் சம்பவ இடத்திற்கு விரைந்து சென்று மீட்பு பணிகளை பார்வையிட்டனர்.
முதலாவதாக, தங்கம்மாவின் உடல் மீட்கப்பட்டது. அதை தொடர்ந்து சிறுவன் தேவானந்த் உடலை மீட்பு படையினர் மீட்டனர். பின்னர் விடியற்காலையில் மோப்ப நாயின் உதவியுடன், சோமன், அவரது மனைவி ஷிஜி, மகள் ஷிமா ஆகியோரின் உடல்கள் மீட்கப்பட்டன.