வீட்டு்க்கு வீடு வாசப்படி… சண்டையில கிழியாத சட்டை எங்கயிருக்கு… இதுபோன்ற சொலவடைகளின் வரிசையில் ‘விடு…விடு… சண்டை இல்லாத குடும்பம் எங்க இருக்கு’ என்ற சமாதான வார்த்தைகளை அடிக்கடி பயன்படுத்தும் அளவுக்கு நம் குடும்ப அமைப்பு முறையில் நாளுக்கு நாள் சண்டை, சச்சரவுகள் அதிகரிlத்து வருகின்றன.
மாமியார் -மருமகள் சண்டை, நாத்தனார் கொடுமை, கணவன் -மனைவிக்கு இடையே கருத்து வேறுபாடு என குடும்ப வன்முறைகள் ஏராளம். இந்த வன்முறைகளில் பாதிக்கப்படுபவர்கள் பெரும்பாலும் பெண்களே என்ற கருத்து பரவலாக இருந்துவரும் நிலையில், மனைவி தன்னுடன் தொடர்ந்து சண்டையிட்டு வந்ததால் மனம் உடைந்த அவரது கணவன் எடுத்துள்ள முடிவால் அவரது குடும்பத்தினர் மட்டுமின்றி ஒட்டுமொத்த கிராமத்தையும் அதிர்ச்சியில் ஆழ்த்தி உள்ளது.
உத்தரப் பிரதேச மாநிலத்தில் தான் குடும்ப வன்முறையின் எதிரொலியாக இப்படியொரு சம்பவம் நிகழ்ந்துள்ளது. அந்த மாநிலத்தின் மவு பகுதியை சேர்ந்தவர் ராம் பிரவேஷ். குடும்பஸ்தரான இவருடன் அவரது மனைவி நித்தமும் சண்டை போட்டு வந்ததாக தெரிகிறது.
குடும்பம் என்றால் இதெல்லாம் சண்டையெல்லாம் வரதான் செய்யும் என்று ஆரம்பத்தில் அமைதியாக இருந்த பிரவேஷ், ஒரு கட்டத்தில் பொறுமை இழக்கும் அளவுக்கு அவரது மனைவியின் ருத்ரதாண்டவம் தொடர்ந்துள்ளது.
இதனால் மனமுடைந்த பிரவேஷ் தமது ஊரில் உள்ள பனை தோப்புக்கு சென்று, அங்குள்ள ஒரு பனை மரத்தின் உச்சிக்கு ஏறி, அங்கு குடில் அமைத்து வசித்து வருகிறார். அவரது குடும்பத்தினர் எவ்வளவு சொல்லியும் சமாதானம் அடையாமல் கடந்த ஒரு மாதத்துக்கு மேலாக பனை மரத்தின் உச்சியிலேயே நாட்களை கழித்து வருகிறார் ராம் பிரவேஷ்.
அன்றாடம் அவருக்கு உணவு கயிற்றில் கட்டி அனுப்பப்படுவதாகவும், இயற்கை உபாதைகளை கழிக்க மட்டுமே அவர் மரத்தில் இருந்து கீழே இறங்கி வருவதாகவும் தெரிவிக்கும் ஊர் மக்கள், தாங்கள் எவ்வளவு சொல்லியும் மரத்தில் இருந்து பிரவேஷ் கீழே இறங்காததால், தற்போது இந்த விஷயம் போலீசின் கவனத்துக்கு கொண்டு செல்லப்பட்டுள்ளதாகவும் கூறுகின்றனர் அவர்கள்.