காங்கிரசின் தலைமையை ஏற்று செயல்படவேண்டும் ராகுல்: தி க தலைவர் கி வீரமணி அறிக்கை

இந்தியாவா? ஹிந்துஇயாவா?
பன் மதங்கள், பல மொழிகள், பல கலாச்சாரங்கள், பரந்துபட்ட நாட்டில் ஒரே மதம், ஒரே மொழி, ஒரே கலாச்சாரம் என்ற திணிப்பு முயற்சிகள் – சித்தாந்தப் போராக நாட்டில் நடைபெறும் சூழ்நிலையில், இனி இந்தியாவா? ஹிந்துஇயாவா? என்ற மிக ஆபத்தான அரசியல் களப்போர் நடைபெறும் நிலையில், காங்கிரசின் பாத்திரம் மிகவும் முக்கியமானது.

காங்கிரஸ் கட்சி முதிர்ந்த ஒரு கட்சி – இந்தியாவின் அனைத்துப் பகுதிகளிலும் வடக்கிலும், தெற்கிலும், கிழக்கிலும், மேற்கிலும் கிளைகள் உள்ள ஒரே அரசியல் கட்சி என்ற சிறப்புக்குரியதாகும். அது பல தேர்தல்களில் தொடர் தோல்விகளைப் பெற்றாலும்கூட, அதன் தொண்டர்கள், வெகுமக்கள் ஆதரவு என்பது இல்லாமல் இல்லை. தேர்தல் தோல்விகள் ஒரு கட்சியின் இன்றியமையாமையை நிர்ணயிப்பதாகாது!

‘’யானை படுத்தாலும் குதிரை மட்டம்‘’ என்ற பழமொழியை மறக்க முடியாது. படுத்திருக்கும் யானை மக்கள் ஜனநாயகத்தில் எப்போது வேண்டுமானாலும் எழும். அதற்கு முக்கியம் அதன் கொள்கை, உறுதிமிக்க தலைமை! அதற்குப் புதிய இரத்தம் – இளமை ரத்தம், கொள்கை லட்சிய ஊசிகள்மூலம் செலுத்தப்பட வேண்டியது இன்றைய காலகட்டத்தில், நாடு போகும் போக்கில் மிக முக்கியமானதாகும்.

குடும்ப அரசியல்பற்றிப் பேசுவோர் குடும்பத் தியாகத்தைப்பற்றிப் பேசாதது ஏன்?
“குடும்ப அரசியல்” என்று குற்றம் சாட்டுவோர், அக்குடும்பம் ஏற்றுள்ள உயிரிழப்புகள், செய்துள்ள தியாகம் என்பதை ஏனோ மறந்து விடுகிறார்கள். அக்குடும்பத்திற்கு வெறும் அரசியல், பதவி மோகம் என்று மட்டுமே கூப்பாடு போடுவதா? இன்றைய அதன் மூத்த தலைவர் திருமதி சோனியா காந்தி அம்மையாருக்கு பிரதமர் வாய்ப்பு இரண்டு முறை இருந்தும், அவர் மறுத்து, பொருளாதார நிபுணர் மன்மோகன் சிங் அவர்களை பிரதமர் ஆக்கினார் என்பதை ஏனோ மறைத்துப் பேசுகின்றனர்!

காங்கிரஸ் கட்சியில் தொடர்ந்து பதவி சுகம் அனுபவித்த இரண்டாம் கட்ட தலைவர்கள் ஜி-23 என்ற பிரிவின்படி வெளியேறி, விமர்சனத்தில் ஈடுபட்டு அடி மரத்தை மறந்து, நுனிக் கிளைகளாகி வருகின்றனர்! அதை ஓர் உட்கட்சி விவகாரம் என்று இன்றைய நிலையில் புறந்தள்ளி விட முடியாது!

எதிரிகளை சரியாக அடையாளம் காண்பவர் ராகுல்காந்தி
கொள்கை, லட்சியங்களைத் தெளிவாய்த் தெரிந்து, தனது லட்சிய  எதிரிகளை சரியாக அடையாளம் கண்டு, பல இளைஞர்கள் கொள்கையாளர்களின் பாராட்டைப் பெறும் திருவாளர் ராகுல் காந்தி – தேர்தல் தோல்வியைக் – கட்சி கண்டது என்பதற்காக ஜனநாயக நெறிப்படி ராஜினாமா செய்து, அவர் மீண்டும் தலைமையேற்க – தொண்டர்கள் தொடர்ந்து வற்புறுத்திடும் நிலையில் மறுதளித்து வருகிறார்.

இன்றைய அரசியல் தட்பவெப்பத்தில், ஆர்.எஸ்.எஸ்.- பா.ஜ.க.,  அதன் ஆக்டோபஸ் ஆதிக்கம் விரிவடைந்த நிலையில், அதனை கொள்கையளவில் – எதிர்க்க முதல் தேவை அதன் கொடூரத்தைப் புரிந்து, சமரசமற்று, அதனை எதிர்க்கும் துணிவு கொண்டவரே, காங்கிரஸ் போன்ற மூத்த கட்சிக்குத் தலைமையேற்றால், அரசியல் களத்தில் நின்று வென்று காட்ட முடியும்!

இன்றைய நிலையில் ராகுலின் தலைமை மிக முக்கியம்!
நண்பர் ராகுல் காந்தி அவர்கள் கொள்கை எதிரிகளை சரியாக அடையாளம் கண்டு, துணிவுடன் அவர்களை எதிர்ப்பவர் – துடிப்புடன் நாடு முழுவதும் சுற்றி வந்து, மக்களால்  அறியப்பட்டவர், இளைஞர்களால் விரும்பப்படுபவர். அவர் நேரு குடும்பத்திலிருந்து வருகிறார் என்பதை ‘வாரிசு அரசியல்’ என்று லேபிள் இட்டுத் தள்ளினால், யாருக்கு அதனால் இழப்பு? இன்றைய நிலையில் கடுமையான ஜனநாயக உரிமைப் பாதுகாப்பு, அரசமைப்புச் சட்ட நெறிகளைக் காப்பாற்றி நாட்டை வெறும் ஒரு மத, ஒரு மொழி, ஒற்றை அரசுள்ள நாடாக மாற்றும் தீவிர முயற்சி தோல்வியடைய, இவரைப் போன்றவர் தலைமை, மூத்த அரசியல் கட்சியான காங்கிரசுக்கு அவசிய தேவையாகும்.

எனவே தொண்டர்கள் உணர்வையும், நாட்டின் அபாயகரமான போக்கையும் உணர்ந்து, அவர் தனது பிடிவாதத்தினை விட்டு, தலைவராக இசையவேண்டும். அது அவருக்காகவோ, காங்கிரசுக்காகவோ அல்ல! இந்திய நாட்டின் அரசமைப்புச் சட்டப்படியான மதச்சார்பற்ற, சமதர்ம ஜனநாயகக் குடியரசை காப்பாற்றிடவே! மற்ற கட்சிகளுடன் ஒருங்கிணைந்து சென்று, 2024 இல் களத்தில் நிற்க கட்சியை மீண்டும் மறுகட்டமைப்பை உருவாக்குங்கள்.