சுதந்திர இந்தியாவில் கிட்டத்தட்ட அரை நூற்றாண்டு காலத்துக்கு மேலாக ஆட்சி செய்து வந்த
காங்கிரஸ்
கட்சியின் நிலைமை தற்போது பரிதாபத்துக்குரியதாக மாறி வருகிறது. பல்வேறு மாநிலங்களில் கோலோச்சி வந்த அக்கட்சி படிப்படியாக கீழே இறங்கி பாஜக கொடியை பறக்க விட வழிவகை செய்துள்ளது. கடந்த ஆண்டுகளில் மக்களவை மற்றும் மாநில சட்டமன்றத் தேர்தல்களில் மோசமான செயல்பாட்டிற்குப் பிறகு, சிறந்த வாய்ப்புகளுக்காக காங்கிரஸ் கட்சியின் இளம் தலைவர்கள் தொடங்கி சீனியர்கள் வரை ராஜினாமா செய்து வருகின்றனர். அவர்கள் அனைவரும் தாங்கள் சேர்ந்த கட்சியின் சார்பில் அதாவது பாஜக சார்பில் அமைச்சராகவோ அல்லது எம்.பி.க்களாகவோ பணியாற்றி வருகின்றனர்.
அந்த வரிசையில் தற்போது இணைந்திருப்பவர் ஜம்மு-காஷ்மீர் மாநிலத்தின் முன்னாள் முதல்வரும், காங்கிரஸ் மூத்த தலைவருமான குலாம் நபி ஆசாத். ஜி23 தலைவர்களில் ஒருவரான கபில் சிபல் விலகியதை தொடர்ந்து, ஜி23யின் மற்றொரு மூத்த தலைவராக குலாம் நபி ஆசாத்தும் விலகியுள்ளார். அதன் தொடர்ச்சியாக, இமாச்சல பிரதேச காங்கிரஸ் கட்சியின் வழிகாட்டுதல் குழு தலைவர் பொறுப்பில் இருந்து அக்கட்சியின் மூத்த தலைவர் ஆனந்த் சர்மா ராஜினாமா செய்துள்ளார். காங்கிரஸில் 51 ஆண்டுகள் இருந்த போதும் சீனியர் என்ற முறையில் தம்மிடம் எதையுமே ஆலோசிக்காமல் அவமானப்படுத்தப்பட்டிருப்பதாக ஆனந்த் சர்மா கூறியுள்ளார். இதேபோன்றதொரு குற்றச்சாட்டைத்தான் குலாம் நபி ஆசாத்தும் முன்வைத்துள்ளார்.
முன்னதாக, 2018 ஆம் ஆண்டில் மத்தியப் பிரதேசத்தில் காங்கிரஸ் மீண்டும் ஆட்சிக்கு வர உதவிய ஜோதிராதித்ய சிந்தியா, காங்கிரஸ் கட்சியுடனான தனது 18 ஆண்டுகால தொடர்பை முடித்துக் கொண்டு, பாஜகவில் இணைந்து தற்போது மத்திய அமைச்சராக உள்ளார். இவரது ஆதரவாளர்களான 20 எம்எல்ஏக்களும் இவருடன் சேர்ந்து தங்கள் சட்டமன்ற உறுப்பினர் பதவியை ராஜினாமா செய்ததால் கமல்நாத் அரசு கவிழ்ந்தது. இதேபோல், உத்தரப்பிரதேச மாநிலத்தில் ஜிதின் பிரசாதாவும் காங்கிரஸில் இருந்து விலகி பாஜகவில் சேர்ந்தார்.
மேலே சொன்னவர்களையும் தாண்டி இந்த பட்டியல் நீள்கிறது. இவர்கள் அனைவரும் காங்கிரஸ் ஆட்சிகாலத்தில் அக்கட்சித் தலைமைக்கு மிகவும் நெருக்கமாக இருந்தவர்கள். மத்திய கேபினட் அமைச்சர் பதவியை அலங்கரித்தவர்கள்; முக்கியத்துறைகளின் அமைச்சர்களாக இருந்தவர்கள். இப்படி காங்கிரஸ் ஆட்சி காலத்தில் அதிகாரத்தை ருசித்து விட்டு, அக்கட்சிக்கு இக்கட்டான காலத்தில் அனைவரும் ராஜினாமா செய்வது அக்கட்சிக்கு பின்னடைவாக பார்க்கப்படுகிறது. குறிப்பாக, காங்கிரஸ் கட்சியின் பலமாக பார்க்கப்படும் சீனியர்களின் ராஜினாமா அக்கட்சிக்கு பெரும் பின்னடைவாக பார்க்கப்படுகிறது.
ஆனால், சீனியர்களின் ராஜினாமா அக்கட்சிக்கு பின்னடைவா என்றால் உண்மையில் இல்லை என்றுதான் சொல்ல வேண்டும். ஏனெனில், கடந்த 8 ஆண்டுகால ஆட்சியில் காங்கிரஸ் இல்லாத இந்தியா என்ற இடத்தை நோக்கி பாஜக படுவேகமாக முன்னேறி வருகிறது. இந்த 8 ஆண்டுகளில் பல்வேறு மாநில சட்டமன்றங்களை அக்கட்சி கைப்பற்றியுள்ளது. தேர்தல் அரசியல், எம்.எல்.ஏ.க்களை விலைக்கு வாங்குவது என பாஜகவின் எந்த நகர்வையும் காங்கிரஸ் கட்சியின் சீனியர்களால் தடுத்து நிறுத்த முடியவில்லை. இவற்றையெல்லாம் பார்க்கும்போது, காங்கிரஸ் கட்சியில் சீனியர்கள் இருந்தும், அவர்களால் கட்சிக்கு எந்தபயனும் இல்லையே என்ற கேள்வி இயல்பாக எழுகிறது.
கபில் சிபல், குலாம் நபி ஆசாத் ஆகியோர்களின் ராஜினாமா பற்றி சோனியாவோ, ராகுலோ பெரிதாக எதிர்வினையாற்றவில்லை. எனவே, அவர்களது விலகல் கட்சிக்கு நல்லதோ என்றுதான் அவர்கள் கருதுகிறார்களோ என்ற கேள்வியையும் எழுப்புகிறது. காங்கிரஸ் கட்சியில் இருந்து சீனியர்கள் ராஜினாமா செய்வது 2024 மக்களவை தேர்தலில் பெரிதாக தாக்கத்தை ஏற்படுத்துமா என்பது தெரியவில்லை. ஆனால், தற்போது வரை அவர்களால் எந்த பயனும் இல்லை என்பதுமட்டும் நிரூபணமாகியுள்ளது.
“காங்கிரஸ் கட்சியில் ஆழமாக வேரூன்றியிருக்கும் கட்டமைப்பு பிரச்சனைகளை சீர்திருத்தங்கள் மூலம் சரி செய்ய வேண்டும்.” என்று காங்கிரஸ் கட்சியில் சேர வில்லை என்ற அறிவிப்புக்கு பின்னர் தேர்தல் உத்தியாளர் பிரஷாந்த் கிஷோர் தனது ட்விட்டர் பக்கத்தில் பதிவிட்டிருந்தார். ராகுல் காந்தி விரும்பிய மாற்றங்களுக்கு, அதன் மூத்த தலைவர்கள் ஒரு தடையாக இருந்ததும் கட்சித் தலைவர் பொறுப்பில் இருந்து அவர் ராஜினாமா செய்த முடிவுக்கான காரணங்களில் ஒன்றாக அமைந்தது. இதனைத்தான் ‘மாற்றப்பட வேண்டிய ஆழமாக வேரூன்றியிருக்கும் கட்டமைப்பு’ என்று பி.கே., சுட்டிக்காட்டியிருந்தார். ராகுலாலேயே அவர் விரும்பிய மாற்றங்களை கொண்டு வர முடியாத அளவுக்கு அதன் கட்டமைப்பு உள்ளது. உள்ளபடியே, காங்கிரஸ் கட்சியின் கட்டமைப்பு அப்படி அரி செய்யப்பட வேண்டிய நிலையில்தான் உள்ளது.