டிடிவி தினகரன் அமமுகவை கலைத்துவிட்டு மீண்டும் அதிமுகவுக்கு வருவர வாய்ப்புள்ளதா என்பது குறித்து அவரே விளக்கம் அளித்துள்ளார்.
அதிமுகவிலிருந்து பிரிந்து சென்றவர்கள், விலகி நிற்பவர்கள் மீண்டும் இணைய வேண்டும் என ஓ.பன்னீர் செல்வம் சமீபத்தில் அறிவித்தார்.
, டிடிவி தினகரன் ஆகியோருக்கு வெளிப்படையாக அழைப்பு விடுத்தார்.
அதிமுகவின் பொதுச் செயலாளர் நான் தான் என சசிகலா ஏற்கனெவே கூறிவருகிறார், டிடிவி தினகரனோ அம்மா மக்கள் முன்னேற்ற கழகத்தை தொடங்கி கட்சி கட்டமைப்பை வலுப்படுத்தி வருகிறார். இந்த சூழலில் அமமுகவை கலைத்துவிட்டு அதிமுகவில் இணைய வாய்ப்புள்ளதா என்று அரசியல் அரங்கில் கேள்விகள் எதிரொலித்தன.
இதற்கு பதிலளிக்கும் விதமாக தஞ்சாவூரில் செய்தியாளர்கள் சந்தித்த டிடிவி தினகரன், “பழைய பகை, கசப்புணர்வு அனைத்தையும் ஒரு கெட்ட கனவாக நினைத்து மறந்துவிடுவோம். அம்மாவும் தலைவரும் நமக்குக் காட்டிய லட்சியப் பாதையில் பயணிக்க வேண்டும். திமுக என்ற மக்கள் விரோத தீயசக்தியை ஆட்சியிலிருந்து அகற்றுவதற்கு, எது சரியான வழியோ அதைப் பின்பற்றி நாம் செயல்படுவோம்.
நேற்றுவரை நடந்ததை மறந்துவிட்டு, நல்லது நடக்கும் எனச் செயல்படுவோம் என்ற கருத்தையே நான் சொல்லிவருகிறேன். ஓ.பன்னீர்செல்வம், `அவரவர் அவரவராக இருந்து, அம்மாவின் தொண்டர்கள் அனைவரும் வருங்காலத்தில் அதிமுக ஆட்சி அமைக்க இணைந்து செயல்பட வேண்டும்’ எனக் கூறுகிறார்.
ஒரே கட்சியில் சேருங்கள் என ஓ.பன்னீர்செல்வம் சொல்லவில்லை. அவர்கள் எங்களிடம் வர வேண்டும். நாங்கள் அவர்களிடம் செல்ல வேண்டும் என்று இல்லை. ஒரே வீட்டிலிருந்து பிரிந்து சென்றவர்கள், அவரவர் வீடுகளிலிருந்து பஞ்ச பாண்டவர்களாக இணைந்து துரியோதனன் கூட்டத்தை எதிர்த்து சண்டை போடலாம்.
கடந்த தேர்தலை ஒன்றாகச் சந்திப்பதற்காக நான் நட்புக் கரம் நீட்டினேன். அவர்கள் அதை ஏற்றுக்கொள்ளவில்லை. அதனாலேயே தீயசக்தி திமுக ஆட்சிக்கு வந்துவிட்டது.
அவர் தவறு செய்தார், இவர் தவறு செய்தார் எனப் பேசிக்கொண்டிருக்க வேண்டியதில்லை. அதிகம் பாதிக்கப்பட்ட நாங்களே பெருந்தன்மையாக எடுத்துக்கொண்டு ஏற்றுக்கொள்ளும் நிலையில், அவர்கள் பழையதையே நினைத்துக்கொண்டிருக்கக் கூடாது. வரும் நாடாளுமன்றத் தேர்தலில் திமுக வெற்றி பெற்றுவிடக் கூடாது என்பதற்காக அனைவரும் இணைந்து செயல்படுவோம். அந்தச் சமயத்தில் யார் தலைமையில் என்பது முடிவுசெய்யப்படும்” என்று கூறியுள்ளார்.