தொகுப்பாளர் ஆனார் ஜீவா
பிரபல தயாரிப்பாளர் ஆர்.பி.சவுத்ரியின் மகன் ஜீவா. 19 வருடங்களுக்கு முன்பு ஆசைஆசையாய் படத்தின் மூலம் சினிமாவில் அறிமுகமானார். ராம் படம் அவருக்கு திருப்பமாக அமைந்தது. அதன்பிறகு டிஷ்யூம், ஈ, கற்றது தமிழ், நண்பன், நீதானே என் பொன் வசந்தம், கோ, கவலை வேண்டாம் உள்பட பல படங்களில் நடித்தார். சமீபகாலமாக அவர் நடித்த படங்கள் எதுவும் வெற்றி பெறவில்லை. ஆறுதலாக 83 படத்தில் கிரிக்கெட் வீரர் ஸ்ரீகாந்த் ஆக நடித்திருந்தது சிறப்பாய் அமைந்தது. தற்போது காபி வித் காதல், கோல்மால், வரலாறு முக்கியம் படங்களில் நடித்து வருகிறார்.
இந்தநிலையில் ஆஹா டிஜிட்டல் தளத்தில் ஒளிபரப்பாகவிருக்கும் 'சர்க்கார் வித் ஜீவா' எனும் விளையாட்டு நிகழ்ச்சி மூலம் டிஜிட்டல் திரை தொகுப்பாளராக அறிமுகமாகிறார். இது ஒரு கேம் ஷோ. இந்த விளையாட்டில் நான்கு பிரபலமான நட்சத்திரங்கள் நடிகர் ஜீவாவை சுற்றி விளையாடுவார்கள். அவர்கள் ஜீவாவை வெல்கிறார்களா? அல்லது ஜீவா அவர்களை வெல்கிறாரா? என்பதுதான் சுவாரசியமான பகுதி. தற்போது இந்த நிகழ்ச்சியின் ப்ரமோ ஆஹா டிஜிட்டல் தளத்தில் வெளியாகி இருக்கிறது.