தேசிய குற்ற ஆவண மையத்தின் (என்சிஆர்பி) 2021 ஆம் ஆண்டுக்கான அறிக்கை, காவல் நிலையங்களில் பதிவு செய்யப்பட்ட வழக்குகளின் எண்ணிக்கையில் இந்தியாவிலேயே தமிழ்நாடு முதலிடம் வகிக்கிறது என தெரிவிக்கிறது. 2021 ஆம் ஆண்டு இந்தியா முழுவதும் காவல் நிலையங்களில் பதிவு செய்யப்பட்டு அந்த ஆண்டு இறுதியில் நிலுவையில் உள்ள ஒட்டுமொத்த வழக்குகளில் சுமார் 20 சதவீத வழக்குகள் தமிழ்நாட்டில் இருந்தன என அந்த அறிக்கை மூலம் தெரியவந்துள்ளது.
2021 ஆம் ஆண்டு இறுதியில் இந்தியா முழுவதும் காவல் நிலையங்களில் விசாரணைக்காக நிலுவையில் இருந்த வழக்குகளின் எண்ணிக்கை 53,61,707. அதில் தமிழ்நாட்டில் மட்டும் நிலுவையில் இருந்த வழக்குகளின் எண்ணிக்கை 10,62,909 (என்சிஆர்பி -2021 வால்யூம் III பக்கம் 1021) என என்சிஆர்பி அறிக்கை சொல்கிறது.
இதற்குக் காரணம் முன்னாள் முதல்வர் எடப்பாடி பழனிசாமியின் ஆட்சியின்போது கொரோனா கட்டுப்பாடுகளை மீறியதாக பொதுமக்கள்மீது போடப்பட்ட வழக்குகள்தான் என்று விழுப்புரம் எம்.பி., ரவிக்குமார் சுட்டிக்காட்டுகிறார். இந்தியா முழுவதும் கொரோனா கட்டுப்பாடுகள் இருந்தாலும் தமிழ்நாட்டில் மட்டும் வரலாறு காணாத விதத்தில் சுமார் 15 லட்சம் பேர் மீது 8,91,700 வழக்குகள் தமிழ்நாட்டுக் காவல் நிலையங்களில் பதிவு செய்யப்பட்டதாக ரவிக்குமார் எம்.பி., கூறுகிறார்.
அண்டை மாநிலங்களான ஆந்திராவில் 1,88,997 வழக்குகளும்; கர்நாடக மாநிலத்தில் 1,0,6350 வழக்குகளும்; மிகப்பெரிய மாநிலமான உத்தரப்பிரதேசத்தில் 3,55,110 வழக்குகளும்தான் பதிவுசெய்யப்பட்டன.
என்சிஆர்பி அறிக்கை
என்சிஆர்பி அறிக்கை
அதற்கு முந்தைய 2019 ஆம் ஆண்டு நிலுவையில் இருந்த 1,36,330 வழக்குகளையும் சேர்த்து 2020 ஆம் ஆண்டு இறுதியில் 10,28,052 வழக்குகள் நிலுவையில் இருந்தன என்று 2020 ஆம் ஆண்டுக்கான என்சிஆர்பி அறிக்கை தெரிவித்தது (என்சிஆர்பி -2020, வால்யூம் III பக்கம் 1029). 2019 ஆம் ஆண்டுக்கான என்சிஆர்பி அறிக்கையின்படி அந்த ஆண்டு புதிதாக பதிவு செய்யப்பட்ட வழக்குகளின் எண்ணிக்கை 1,68,116 மட்டுமே. அதற்கு முந்தைய ஆண்டில் பதிவு செய்யப்பட்டு நிலுவையில் இருந்த வழக்குகள் 1,17,500. 2019 ஆம் ஆண்டு இறுதியில் 2,85,641 வழக்குகள் புலன் விசாரணைக்காக காவல் நிலையங்களில் நிலுவையில் இருந்தன (என்சிஆர்பி -2019, வால்யூம் III, பக்கம் 1017).
என்சிஆர்பி அறிக்கை
2020 ஆம் ஆண்டில் கொரோனாவைக் காரணம் காட்டி பதிவு செய்யப்பட்ட இந்த வழக்குகள் யாவும் திரும்பப் பெறப்படும் என டிஜிபி உத்தரவிட்டதாக கடந்த மே மாதத்தில் செய்தி வெளியானதை சுட்டிக்காட்டும் ரவிக்குமார் எம்.பி., அந்த வழக்குகள் அனைத்தும் ரத்து செய்யப்பட்டனவா? அவற்றின் நிலை என்ன? என்று கேள்வி எழுப்பியுள்ளார்.
தமிழ்நாடு போலீஸார் அதிகார துஷ்பிரயோகம் செய்வதாக குற்றம் சாட்டியுள்ள ரவிக்குமார் எம்.பி., தமிழ்நாட்டு காவல்துறையிடம் அதிகாரத்தைக் கொடுத்தால் அதை மக்களுக்கு எதிராக எப்படியெல்லாம் அவர்கள் பயன்படுத்துவார்கள் என்பதற்கு இதுவொரு உதாரணம் என்றும் சாடியுள்ளார்.