பனிப்போரை இரத்தம் சிந்தாமல் முடிவுக்குக் கொண்டு வர உதவிய சோவியத் யூனியனின் 8ஆவது மற்றும் கடைசி அதிபர் மிக்கைல் கொர்பச்சேவ் உடல்நலக் குறைவு காரணமாக ரஷ்ய தலைநகர் மாஸ்கோவில் உள்ள மருத்துவமனையில் காலமானார். அவருக்கு வயது 91. ரஷ்யா உள்ளிட்ட நாடுகளை உள்ளடக்கிய சோவியத் யூனியனின் அதிபராக 1985 முதல் 1991ஆம் ஆண்டு வரை பதவி வகித்தவர் மிக்கைல் கொர்பச்சேவ். அதேகாலகட்டத்தில் சோவியத் ஒன்றியப் பொதுவுடைமைக் கட்சியின் பொதுச் செயலாளராகவும் பதவியில் இருந்தார்.
கொர்பச்சேவ் மரணம் குறித்து ரஷ்ய அதிபர் விளாடிமர் புடின் தனது ஆழ்ந்த அனுதாபங்களை தெரிவித்துள்ளதாக அந்நாட்டு அதிபர் மாளிகையான கிரெம்ளின் செய்தித் தொடர்பாளர் தெரிவித்துள்ளார். கொர்பச்சேவுடன் நல்ல உறவை கொண்டிருந்த ரஷ்ய உளவுத்துறையின் முன்னாள் அதிகாரியான புடின், மறைந்த கொர்பச்சேவ் குடும்பத்தினருக்கும் நண்பர்களுக்கும் இரங்கல் செய்தி அனுப்பியுள்ளதாகவும் அவர் தெரிவித்துள்ளார். மாஸ்கோவில் உள்ள நோவோடெவிச்சி கல்லறையில் அவரது மனைவிக்கு அருகில் மிக்கைல் கொர்பச்சேவ் அடக்கம் செய்யப்படுவதாக தெரிவிக்கப்பட்டுள்ளது. மாஸ்கோ அரசுப் பல்கலைக்கழகத்தில் படிக்கும் போது, 1955 இல் சட்டப் பட்டம் பெறுவதற்கு முன்பு 1953ஆம் ஆண்டில் சக மாணவியான ரைசா தைத்தாரென்கோவை அவர் மணமுடித்தார்.
தொடக்கத்தில் மார்க்சியம்-லெனினிசக் கொள்கையைக் கடைப்பிடித்தாலும், 1990களின் முற்பகுதியில் சமூக ஜனநாயகத்தை நோக்கிச் சென்ற மிக்கைல் கொர்பச்சேவின் சீர்திருத்தக் கொள்கைகள் பனிப்போரை ரத்தம் சிந்தாமல் முடிவுக்குக் கொண்டு வந்ததில் முக்கியப் பங்காற்றின. 1990இல் அமைதிக்கான நோபல் பரிசு அவருக்கு வழங்கப்பட்டது.
சோவியத் அரசையும் அதன் சோசலிசக் கொள்கைகளையும் பாதுகாப்பதில் உறுதியாக இருந்த போதிலும், குறிப்பாக 1986 செர்னோபில் பேரழிவிற்குப் பிறகு குறிப்பிடத்தக்க சீர்திருத்தம் அவசியம் என்று மிக்கைல் கொர்பச்சேவ் நம்பினார். சோவியத்-ஆப்கான் போரில் இருந்து விலகி, அணு ஆயுதங்களைக் கட்டுப்படுத்தவும், பனிப்போரை முடிவுக்குக் கொண்டுவரவும் அப்போதைய அமெரிக்க அதிபர் ரொனால்ட் ரீகனுடன் உச்சி மாநாட்டில் கலந்து கொண்டார்.
மிக்கைல் கொர்பச்சேவின் கொள்கைகள் ரஷ்யாவில் கருத்து சுதந்திரம், ஊடக சுதந்திரம் ஆகியவற்றை மேம்படுத்த உதவியது. தடையில்லாத பொருளாதாரத்தை கொண்டு வந்து ஐரோப்பிய நாடுகளுடன் நட்புறவு கொண்டார். 1989-1990-இல் பல்வேறு கிழக்கு ஐரோப்பிய சோவியத் உறுப்பு நாடுகள் மார்க்சிய-லெனினிய ஆட்சியைக் கைவிட்டபோது ராணுவ ரீதியாக தலையிட மிக்கைல் கொர்பச்சேவ் மறுத்துவிட்டார். உள்நாட்டில், வளர்ந்து வந்த தேசியவாத உணர்வு சோவியத் ஒன்றியத்தை உடைக்கும் அச்சுறுத்தலை ஏற்படுத்தியது. மார்க்சிய-லெனினியக் கடும்போக்குவாதிகள் 1991 ஆகஸ்ட் மாதத்தில் கொர்பச்சேவுக்கு எதிராக நடத்திய ஆட்சிக் கவிழ்ப்பு சதி தோல்வியுற்றது. இதைத் தொடர்ந்து, கொர்பச்சேவின் விருப்பத்திற்கு எதிராக சோவியத் ஒன்றியம் கலைந்ததை அடுத்து அவர் தனது பதவியைத் துறந்தார். அதன்பிறகு தன் பெயரில் அறக்கட்டளை ஒன்றை தொடங்கினார். ரஷ்யாவில் சமூக-ஜனநாயக இயக்கத்திற்காக பிரச்சாரம் செய்த அவர், ரஷ்ய அதிபர்கள் போரிஸ் யெல்ட்சின், விளாடிமர் புடின் ஆகியோரை கடுமையாக விமர்சிக்கவும் தயங்கியதில்லை. விளாடிமர் புடின் 2011ம் ஆண்டில் 3வது முறையாக ரஷ்ய அதிபராக பொறுப்பேற்கக் கூடாது என்று வெளிப்படையாக விமர்சித்தார்.
சீனியர்கள் விலகல்: காங்கிரஸ் கட்சிக்கு பாதிப்பை ஏற்படுத்துமா?
20ஆம் நூற்றாண்டின் பிற்பாதியில் குறிப்பிடத்தக்க ஆளுமைகளில் ஒருவராக கருதப்பட்ட மிக்கைல் கொர்பச்சேவ், சோவியத் ஒன்றியத்தில் புதிய அரசியல், பொருளாதார சுதந்திரங்களை அறிமுகப்படுத்தியது, வெளியுறவுக் கொள்கைகள் என்பன உள்ளிட்ட அவரது கொள்கைகளுக்காக பரவலாகப் பாராட்டப்பட்டார். ஆனாலும், சோவியத் கலைப்பை விரைவுபடுத்தியதற்காகவும், அதனால் ரஷ்யாவின் உலகளாவிய செல்வாக்கில் சரிவைக் கொண்டு வந்து பொருளாதார சரிவை தூண்டியதற்காகவும் ரஷ்யாவிலும், முன்னாள் சோவியத் நாடுகளாலும் தொடர்ந்து விமர்சிக்கப்பட்டு வந்தார். சோவியத் யூனியனுக்கும், மேற்கத்திய நாடுகளுக்கும் இடையே 2ஆம் உலகப் போருக்குப்பின் பனிப்போர் நீடித்தது. இதை முடிவுக்கு கொண்டு வந்து சோவியத் யூனியனை ஐரோப்பாவுக்கு நெருக்கமாக கொண்டு வந்தார். இது சோவியத் யூனியன் வீழ்ச்சிக்கு காரணமாக அமைந்ததாக ரஷ்யாவின் தீவிர கம்யூனிஸ்ட்டுகள் குற்றம் சாட்டுகின்றனர்.
கடைசி சோவியத் தலைவராka கொர்பச்சேவ் அமெரிக்காவுடனான ஆயுதக் குறைப்பு ஒப்பந்தங்களையும், இரண்டாம் உலகப் போருக்குப் பிறகு ஐரோப்பாவைப் பிளவுபடுத்திய இரும்புத்திரையை அகற்ற மேற்கு நாடுகளுடன் கூட்டு ஒப்பந்தங்களையும் செய்தார். இது மேற்கு மற்றும் கிழக்கு ஜெர்மனியை மீண்டும் ஒன்றிணைத்தது. பெர்லின் சுவர் தகர்ப்புக்கு உதவியது. இதனால், இன்னமும் அப்பகுதி மக்களால் ‘கோர்பி’ என்று அன்போடு அழைக்கப்படுகிறார்.