ஒவ்வொரு ஆண்டும் தமிழ் மாதம் ஆவணியில் வரும் வளர்பிறை சதுர்த்தி நாளன்று விநாயகர் சதுர்த்தி விழா கொண்டாடப்படுகிறது. அந்த வகையில், நடப்பாண்டுக்கான விநாயகர் சதுர்த்தி நாடு முழுவதும் கோலாகலமாக நேற்று கொண்டாடப்பட்டது. கடந்த இரண்டு ஆண்டுகளாக கொரோனா ஊரடங்கால் விநாயகர் சதுர்த்தி கொண்டாட்டங்கள் கட்டுப்பாடுகளுடன் நடைபெற்ற நிலையில், இந்தாண்டு வழக்கமான உற்சாகத்துடன் பொதுமக்கள் விநாயகர் சதுர்த்தியை கொண்டாடினர்.
விநாயகர் சதுர்த்தியையொட்டி, தெரு முனைகளிலும், சாலைகளின் முக்கிய சந்திப்புகளிலும் பெரிய விநாயகர் சிலைகள் வைக்கப்பட்டு பின்னர் அவை ஊர்வலமாக எடுத்துச் செல்லப்பட்டு நீர் நிலைகளில் கரைக்கப்படும். இந்த நிலையில், ஜார்கண்ட் மாநிலத்தில் விநாயகருக்கு முழு முகவரியுடன் கூடிய ஆதார் அட்டை வடிவில் விநாயகர் சதுர்த்தி பந்தல் அமைக்கப்பட்டுள்ளது அனைவரது கவனத்தையும் ஈர்த்துள்ளது.
ஜார்கண்ட் மாநிலம் ஜாம்ஷெட்பூர் மாவட்டத்தில் ஆதார் அட்டை வடிவில் விநாயகர் சதுர்த்தி பந்தல் அமைக்கப்பட்டுள்ளது. இதனை தயாரித்தவர்கள், விநாயகருக்காக ஒரு பிரத்யேக ஆதார் எண்ணையும் உருவாக்கி இணைத்துள்ளனர்.
விநாயகருக்கான ஆதார் அட்டையில் உள்ள தகவலின்படி, அவரது தந்தை பெயர் மகாதேவ் என குறிப்பிடப்பட்டுள்ளது. விநாயகப் பெருமானின் முகவரி, “கைலாச மலை, மேல்தளம், மானசரோவர் ஏரி அருகில், கைலாஷ், பின்கோடு – 000 001” எனவும் குறிப்பிடப்பட்டுள்ளது. அவர் பிறந்த தேதி ஆறாம் நூற்றாண்டு எனவும் குறிப்பிடப்பட்டுள்ளது. அதாவது 01/01/600CE என அதில் தெரிவிக்கப்பட்டுள்ளது.