பிரிட்டன் பிரதமர் தேர்தலுக்கான வாக்குப்பதிவு முடிந்துள்ள நிலையில், நாளை அதிகாரப்பூர்வ அறிவிப்பு வெளியாகிறது.
ஐரோப்பிய நாடான பிரிட்டன் பிரதமர் போரிஸ் ஜான்சன் கொரோனா விதிமுறைகளை மீறி பிரதமர் அலுவலகத்தில் மது விருந்து நிகழ்ச்சிகளை நடத்திய விவகாரத்தில் சொந்த கட்சியான ஆளும் கன்சர்வேட்டிவ் கட்சிக்குள்ளேயே கடும் எதிர்ப்பு கிளம்பியதால் பிரதமர் மற்றும் கட்சி தலைவர் பதவியை ராஜினாமா செய்தார்.
அதை தொடர்ந்து, ஆளும் கன்சர்வேட்டிவ் கட்சியின் புதிய தலைவரை தேர்வு செய்வதற்கான தேர்தல் தொடங்கியது. பிரிட்டன் அரசியலமைப்பு சட்டப்படி ஆளும் கட்சியின் தலைவராக தேர்வு செய்யப்படும் நபரே நாட்டின் பிரதமராக நியமிக்கப்படுவார்.
அந்த வகையில் கன்சர்வேட்டிவ் கட்சி தலைவர் பதவிக்கான தேர்தலில் இந்திய வம்சாவளியை சேர்ந்த முன்னாள் நிதி அமைச்சர் ரிஷி சுனக்குக்கும், தற்போதைய வெளியுறவு அமைச்சர் லிஸ் டிரஸ்சுக்கும் இடையே கடும் போட்டி நிலவுகிறது. புதிய தலைவரை தேர்வு செய்ய கன்சர்வேட்டிவ் கட்சியின் உறுப்பினர்கள் சுமார் 1.60 லட்சம் பேர் கடந்த சில வாரங்களாக தபால் மற்றும் ஆன்லைன் மூலமாக வாக்களித்து வந்தனர். இந்த வாக்கு பதிவு முன்தினம் மாலையுடன் முடிவடைந்தது.
வால்மார்ட் கட்டடத்திற்கு மிரட்டல்: விமானத்தை திருடி ஆட்டம் காட்டிய விமானி கைது!
இந்நிலையில், இந்திய நேரப்படி திங்கட்கிழமை மதியம் 12.30 மணியவில் வாக்கு எண்ணிக்கை முடிவடைந்து இறுதி முடிவுகள் அறிவிக்கப்பட உள்ளன. தேர்தலுக்கு முன்பு நடத்தப்பட்ட பல்வேறு கருத்து கணிப்புகளில் ரிஷி சுனக்கை காட்டிலும், லிஸ் டிரஸ் தொடர்ந்து முன்னிலையில் இருந்து வந்தார். தற்போது தேர்தலுக்கு பிந்தைய கருத்து கணிப்புகளிலும் லிஸ் டிரஸ்சுக்கு வெற்றி வாய்ப்பு பிரகாசமாக இருப்பது தெரிய வந்துள்ளது. இதனால் பிரிட்டன் புதிய பிரதமராக லிஸ் டிரஸ் தேர்வாக அதிக வாய்ப்பு உள்ளதாக கூறப்படுகிறது.
பிரிட்டன் அரச பாரம்பரிய நடைமுறைகளின்படி புதிய பிரதமரை நியமிக்கும் விழா பிரிட்டனின் பக்கிங்ஹாம் அரண்மனையில் தான் நடைபெறும். ஆனால் தற்போது ராணியின் உடல் நிலையை கருத்தில் கொண்டு அவர் பயணம் மேற்கொள்வதை தவிர்க்க டாக்டர்கள் அறிவுறுத்தி உள்ளதால் அரச மரபை உடைத்து ஸ்காட்லாந்தில் இந்த விழா நடைபெற இருப்பது குறிப்பிடத்தக்கது.