மக்களவை தேர்தலை எதிர்கொள்ளவுள்ள
கட்சி இப்போதே அதற்கான வேலைகளில் இறங்கியுள்ளது. அதன் ஒருபகுதியாக, கட்சியை வலுப்படுத்தவும், தொண்டர்கள் மத்தியில் எழுச்சியை ஏற்படுத்தவும், கன்னியாகுமரியில் இருந்து காஷ்மீர் வரை ‘பாரத் ஜோடோ யாத்ரா’ (பாரதமே ஒன்றிணைவோம்) என்ற பெயரில் 3,500 கிலோ மீட்டர் தூரம், 150 நாட்கள் பாதயாத்திரை மேற்கொள்கிறார் அக்கட்சியின் முன்னாள் அகில இந்திய தலைவரும், எம்.பி.யுமான ராகுல் காந்தி.
இதற்காக, டெல்லியில் இருந்து விமானம் மூலமாக 6ஆம் தேதி இரவு சென்னை வரும் ராகுல் காந்தி, 7ஆம் தேதி காலையில் அவரது தந்தையும், மறைந்த முன்னாள் பிரதமருமான ராஜீவ் காந்தி நினைவிடத்தில் அஞ்சலி செலுத்துகிறார். அதன்பின்னர், அங்கிருந்து ஹெலிகாப்டர் மூலமாக மதியம் 2 மணிக்கு ராகுல் காந்தி கன்னியாகுமரிக்கு செல்கிறார். அங்கு விவேகானந்தர் மண்டபம், திருவள்ளுவர் சிலை, காந்தி மண்டபத்தை பார்வையிடுகிறார். இதையடுத்து, பாதயாத்திரையை முதல்வர் மு.க.ஸ்டாலின் தொடங்கி வைக்கிறார்.
தொடர்ந்து, காமராஜர் மண்டபத்துக்கு செல்லும் ராகுல் காந்தி அந்த பகுதியில் நடைபெறும் பிரமாண்டமான பொதுக்கூட்டத்தில் கலந்து கொண்டு உரையாற்றவுள்ளார். இதில் நாடு முழுவதும் உள்ள காங்கிரஸ் மற்றும் கூட்டணி கட்சித் தலைவர்கள் பங்கேற்கின்றனர். அங்கிருந்து தனது பாத யாத்திரையை ராகுல் காந்தி தொடங்குகிறார். கன்னியாகுமரி மாவட்டத்தில் மட்டும் 7ஆம் தேதியில் இருந்து 10ஆம் தேதி வரை 4 நாட்கள் ராகுல் காந்தி நடைபயணம் மேற்கொள்கிறார். ஒவ்வொரு நாளும் காலை 4 மணி நேரமும், மாலை 3 மணி நேரமும் என மொத்தம் 7 மணி நேரம் பாதயாத்திரை செல்ல ராகுல் காந்தி திட்டமிட்டுள்ளார்.
கன்னியாகுமரியில் மட்டும் நான்கு நாட்கள் பாதயாத்திரை செல்லும் அவர், முதல் நாள் விவேகானந்தா கல்லூரியில் தங்குகிறார். 8ஆம் தேதியன்று சவேரியார் ஆலய சந்திப்பு, செட்டிகுளம், கலெக்டர் அலுவலக சந்திப்பு வழியாக இரவு 7 மணிக்கு டெரிக் சந்திப்பில் பாதயாத்திரையை நிறைவு செய்யும் அவர், நாகர்கோவில் ஸ்காட் கல்லூரியில் தங்குகிறார். 9ஆம் தேதி மாலை 4 மணிக்கு குழித்துறை, படந்தாலுமூடு, களியக்காவிளை, கோழிவிளை வழியாக செறுவாரகோணம் செல்கிறார். அங்கு இரவு தங்குகிறார். 10ஆம் தேதி காலை செறுவாரகோணத்தில் இருந்து புறப்பட்டு கேரளா மாநிலம் செல்கிறார்.
பாத யாத்திரையில் கலந்து கொள்பவர்களுக்கு தனி அடையாள அட்டை வழங்கவும் ஏற்பாடு செய்யப்பட்டுள்ளது. தனது பயணத்திற்கு இடையே ராகுல் காந்தி மக்களையும் சந்திக்கிறார். கலை நிகழ்ச்சிகளுக்கும் ஏற்பாடுகள் செய்யப்பட்டு வருகின்றன.
ராகுல் காந்தி பயணத்தையொட்டி, அது தொடர்பான ஆலோசனை கூட்டம் சென்னை சத்தியமூர்த்தி பவனில் ஏற்கனவே நடைபெற்றது. காங்கிரஸ் மேலிட பொறுப்பாளர்கள் தலைமையில் நடைபெற்ற அந்த ஆலோசனைக் கூட்டத்தில், கோஷ்டி பூசல்கள் இல்லாமல், ஒற்றுமையாக இணைந்து ராகுல் காந்திக்கு சிறப்பான வரவேற்பு அளிக்க கட்சி நிர்வாகிகளுக்கு அறிவுறுத்தப்பட்டுள்ளது.
இதையடுத்து, தனது பயணத்திற்கு இடையே மக்களை சந்திக்கும் அவருக்கு, வழிநெடுகிலும் உற்சாக வரவேற்பு கொடுக்கவும், அவரது பயணத்துக்கான ஏற்பாடுகளையும் மாநில காங்கிரஸ் தலைமை தீவிரமாக செய்து வருகிறது. இதற்காக, காங்கிரஸ் கட்சியின் மூத்த தலைவர்கள் கன்னியாகுமரியில் முகாமிட்டு பணிகளை மேற்கொண்டு வருகின்றனர். அந்த வகையில், மாநில தலைவர் கே.எஸ்.அழகிரி ராகுல் காந்தி தங்கவுள்ள இடங்களை பார்வையிட்டு ஆய்வு செய்தார். அவருடன், காங்கிரஸ் வர்த்தக பிரிவு மாநில பொதுச் செயலாளர் பூ.நல்லமணி உள்ளிட்ட பலர் உடனிருந்தனர்.
பணிகளை பார்வையிட்ட தலைவர்கள்
இளைஞர் காங்கிரசார், மாணவர் காங்கிரஸ் சார்பில் பல்வேறு சிறப்பு ஏற்பாடுகளும் செய்யப்பட்டு வருகிறது. கன்னியாகுமரி மாவட்டத்தில் இருந்து சுமார் 50 ஆயிரத்திற்கும் மேற்பட்டோர் இந்த நிகழ்ச்சியில் பங்கேற்கும் வகையில் ஏற்பாடுகள் செய்யப்பட்டு வருகின்றன. அதுதவிர, வெளி மாவட்டங்களில் இருந்தும் நிர்வாகிகள் பலரும் இந்த பாதயாத்திரை நிகழ்ச்சியில் கலந்து கொள்ளவுள்ளனர். இதற்கான பணிகளை மாநிலம் முழுவதும் உள்ள காங்கிரஸ் மாவட்ட தலைவர்கள் மேற்கொண்டு வருகின்றனர். ஒவ்வொரு மாவட்ட தலைவர்களும் சுமார் 500 பேர் வரை தங்களது மாவட்டத்தில் இருந்து கன்னியாகுமரி மாவட்டத்திற்கு அழைத்து வரவேண்டும் என மாநில தலைமை அறிவுறுத்தியுள்ளதாக தெரிகிறது.
இதுகுறித்து காங்கிரஸ் கட்சியின் தமிழக பொறுப்பாளர் தினேஷ் குண்டுராவ் கூறுகையில், ராகுல் காந்தி தலைமையில் பாதயாத்திரை பேரணி கன்னியாகுமரி முதல் காஷ்மீர் வரை நடைபெற உள்ளது. இந்தப் பேரணி வெற்றி பெற வேண்டும் என்பதற்காக பல்வேறு ஏற்பாடுகள் செய்யப்பட்டுள்ளன என்றார். ராகுல் காந்தி வருகையையொட்டி, கன்னியாகுமரி மாவட்டத்தில் பாதுகாப்பு ஏற்பாடுகள் பலப்படுத்தப்பட்டுள்ளன.