ஜார்க்கண்ட் மாநில சட்டப்பேரவையில் நடைபெற்ற நம்பிக்கை வாக்கெடுப்பில், முதலமைச்சர் ஹேமந்த் சோரன் தலைமையிலான அரசு வெற்றி பெற்றது.
ஜார்க்கண்ட் மாநிலத்தில், முதலமைச்சர் ஹேமந்த் சோரன் தலைமையிலான ஜார்க்கண்ட் முக்தி மோர்ச்சா – காங்கிரஸ் கட்சியின் கூட்டணி ஆட்சி நடைபெற்று வருகிறது. 81 சட்டப்பேரவை உறுப்பினர்கள் கொண்ட ஜார்க்கண்ட் மாநில சட்டப்பேரவையில், ஆளும் கூட்டணி அரசுக்கு, 49 உறுப்பினர்களின் ஆதரவு இருக்கிறது. இதில், ஜார்க்கண்ட் முக்தி மோர்ச்சாவுக்கு, 30 உறுப்பினர்களும், காங்கிரஸ் கட்சிக்கு, 18 உறுப்பினர்களும், ராஷ்ட்ரீய ஜனதா தளம் கட்சிக்கு ஒரு உறுப்பினரும் உள்ளனர்.
கடந்த 2021 ஆம் ஆண்டில், அதிகாரத்தை பயன்படுத்தி, முதலமைச்சர் ஹேமந்த் சோரன், தனது பெயரில் நிலக்கரி சுரங்க உரிமை பெற்றதாக, எதிர்க்கட்சியான பாஜக, இந்தியத் தலைமைத் தேர்தல் ஆணையத்தில் புகார் கொடுத்தது. இந்தப் புகாரை விசாரித்த தேர்தல் ஆணையம், எம்எல்ஏ பதவியில் இருந்து முதலமைச்சர் ஹேமந்த் சோரனை தகுதி நீக்கம் செய்ய, ஜார்க்கண்ட் மாநில ஆளுநர் ரமேஷ் பைஸூக்கு பரிந்துரை செய்தது.
இந்த விவகாரத்தில், முதலமைச்சர் ஹேமந்த் சோரனை, எம்எல்ஏ பதவியில் இருந்து தகுதி நீக்கம் செய்ய ஆளுநர் ரமேஷ் பைஸ் முடிவு செய்து உள்ளதாகவும், இது தொடர்பான உத்தரவு கடிதத்தை, அவர் எந்த நேரத்திலும், இந்தியத் தலைமைத் தேர்தல் ஆணையத்திற்கு அனுப்பக்கூடும் என்றும் தகவல் வெளியாகி உள்ளது.
இதனால் அலர்ட்டான முதலமைச்சர் ஹேமந்த் சோரன், தனது கட்சி எம்எல்ஏக்கள் மற்றும் கூட்டணி கட்சியான காங்கிரஸ் எம்எல்ஏக்களை, பாஜகவின் குதிரைப் பேரத்தில் இருந்து பாதுகாக்க, சத்தீஸ்கர் மாநிலத்தில் தங்க வைத்தார். இதை கடுமையாக விமர்சித்த பாஜக, முதலமைச்சர் ஹேமந்த் சோரன் அரசுக்கு பெரும்பான்மை இல்லை என தெரிவித்தது.
இதை அடுத்து, தனது தலைமையிலான கூட்டணி அரசுக்கு பெரும்பான்மை இருப்பதை காட்ட, சிறப்பு சட்டப்பேரவைக் கூட்டத்தொடரை கூட்ட, முதலமைச்சர் ஹேமந்த் சோரன் முடிவு செய்தார். இதற்கான அறிவிப்பும் சபாநாயகரிடம் இருந்து வெளியானது.
இந்நிலையில் இன்று, ராஞ்சியில் உள்ள தலைமைச் செயலகத்தில், சிறப்பு சட்டப்பேரவை கூட்டத்தொடர் நடைபெற்றது. அப்போது, முதலமைச்சர் ஹேமந்த் சோரன் அரசு மீதான நம்பிக்கை வாக்கெடுப்பு தீர்மானம் தாக்கல் செய்யப்பட்டது. இதில் அவரது தலைமையிலான அரசு வெற்றி பெற்றது. இதற்கு எதிர்ப்புத் தெரிவித்து எதிர்க்கட்சியான பாஜக எம்எல்ஏக்கள் வெளிநடப்பு செய்தனர்.
இந்தத் தீர்மானத்தின் மீது பேசிய முதலமைச்சர் ஹேமந்த் சோரன், “பொது மக்கள் ரேஷன் பொருட்களை வாங்குவது போல், எம்எல்ஏக்களை, பாஜக விலைக்கு வாங்கி வருகிறது” என காட்டமாகத் தெரிவித்தார்.