வங்கதேச பிரதமர் ஷேக் ஹசீனா இந்தியாவுக்கு சுற்றுப்பயணம் மேற்கொண்டுள்ள நிலையில், வங்கதேசம் – இந்தியா ஒருங்கிணைப்பு குறித்து அசாம் மாநில முதலமைச்சர் ஹிமந்தா பிஸ்வா சர்மா கருத்து தெரிவித்து உள்ளது சர்ச்சையை ஏற்படுத்தி உள்ளது.
அண்டை நாடான வங்கதேச நாட்டின் பிரதமர் ஷேக் ஹசீனா, நான்கு நாட்கள் அரசு முறை சுற்றுப்பயணமாக இந்தியாவுக்கு வந்துள்ளார். நேற்று டெல்லியில் பிரதமர் நரேந்திர மோடியை சந்தித்து பேசிய அவர், இரு நாடுகளுக்கு இடையேயான நல்லுறவுகள் குறித்து கலந்துரையாடினார். இதைத் தொடர்ந்து இரு நாடுகளுக்கு இடையே பல்வேறு துறைகளில் புரிந்துணர்வு ஒப்பந்தம் செய்யப்பட்டது.
இந்நிலையில், பாஜகவைச் சேர்ந்த வடகிழக்கு மாநிலமான அசாம் மாநில முதலமைச்சர் ஹிமந்தா பிஸ்வா சர்மா, இன்று செய்தியாளர்களைச் சந்தித்தார். அப்போது அவரிடம், காங்கிரஸ் தலைவர் ராகுல் காந்தியின் இந்தியா ஒற்றுமை பயணம் குறித்து செய்தியாளர்கள் கேள்வி எழுப்பினர்.
அதற்கு அவர் அளித்த பதில்:
இந்தியா ஒன்றுபட்டு உள்ளது. காஷ்மீர் முதல் கன்னியாகுமரி வரை, சில்சார் முதல் சவுராஷ்டிரா வரை நாம் ஒன்று தான். காங்கிரஸ் நாட்டை இந்தியா, பாகிஸ்தானாகப் பிரித்தது. அதன் பின்னர் வங்கதேசம் உருவாக்கப்பட்டது. ஜவஹர்லால் நேரு தவறு செய்ததாக ராகுல் காந்தி மன்னிப்பு கேட்டால், இந்தப் பயணத்தால் எந்த பயனும் இல்லை. பாகிஸ்தான், வங்கதேசத்தை இந்தியாவுடன் ஒருங்கிணைத்து அகண்ட பாரதத்தை உருவாக்க ராகுல் காந்தி பாடுபட வேண்டும்.
இவ்வாறு அவர் கூறினார்.
‘அகண்ட பாரதம்’ என்பது பாஜக சித்தாந்த அமைப்பான ராஷ்ட்ரிய ஸ்வயம்சேவக் சங்கத்தால் முன்வைக்கப்பட்ட யோசனை. இதன் கீழ் பாகிஸ்தான், வங்கதேசம், நேபாளம், இலங்கை, பூட்டான், ஆப்கானிஸ்தான், திபெத் மற்றும் மியான்மர் ஆகியவை இந்தியாவின் அங்கமாக இருக்க வேண்டும் என்பதே ஆகும்.