நம் நாட்டில் மருத்துவ படிப்புகளுக்கு 12ம் வகுப்பு மதிப்பெண்கள் அடிப்படையில் மாணவர்கள் சேர்க்கை நடைபெற்று வந்த நிலையில் மத்தியில் பாஜக ஆட்சிக்கு வந்ததும் நீட் என்ற நுழைவுத்தேர்வு அறிமுகம் செய்யப்பட்டது.
இதற்கு ஆரம்பத்தில் இருந்து தமிழ்நாட்டு அரசியல் கட்சிகள் மற்றும் மாணவர்கள் கடுமையான எதிர்ப்பு தெரிவித்து வருகின்றனர். இதன் ஒரு பகுதியாக அனிதா என்கிற மாணவி தொடங்கி பல மாணவர்கள் தங்களது உயிரையே மாய்த்துக்கொண்டனர்.
எனவே, நீட் தேர்வில் இருந்து தமிழ்நாட்டிற்கு விலக்கு அளிக்க கோரி சட்டப்பேரவையில் 2 முறை தீர்மானம் நிறைவேற்றப்பட்டும் குடியரசு தலைவர் ஒப்புதலுக்கு அனுப்பி வைக்க தமிழக ஆளுநர் காலம் தாமாதம் செய்ததால் இந்த ஆண்டும், தமிழ்நாட்டு மாணவர்களுக்கு நீட் தேர்வில் இருந்து விலக்கு கிடைக்கவில்லை.
இதையடுத்து பலத்த எதிர்ப்புக்கு மத்தியில் கடந்த ஜூலை 17ம் தேதி நடைபெற்றது. நீட் தேர்வை தமிழ்நாட்டில் 1.40 லட்சம் பேர் எழுதினர். இந்நிலையில் பெரிதும் எதிர்பார்க்கப்பட்ட நீட் நுழைவுத்தேர்வு முடிவுகள் வெளியாகி இருக்கிறது.
இந்த தேர்வில் ராஜஸ்தானை சேர்ந்த தனிஷ்கா 715 மதிப்பெண்களுடன் அகில இந்திய அளவில் முதலிடம் பிடித்து உள்ளார். நாடு முழுவதும் 17.64 லட்சம் பேர் இந்த தேர்வை எழுதியதில் 9 லட்சத்து 93 ஆயிரத்து 69 பேர் தேர்ச்சி பெற்றுள்ளனர். அதன்படி, ஒட்டுமொத்தமாக 56.30 சதவீதம் பேர் நீட் தேர்வில் தேர்ச்சி அடைந்துள்ளனர்.
அதே போல் தமிழ்நாட்டில் நீட் தேர்வு எழுதியவர்களில் 67 ஆயிரத்து 787 பேர் தேர்ச்சி பெற்று உள்ள நிலையில் மாணவர் திரிதேவ் விநாயகா 705 மதிப்பெண் பெற்று இந்திய அளவில் 30வது இடமும், ஹரிணி 702 மதிப்பெண் பெற்று 43வது இடமும் பிடித்துள்ளனர். தமிழகத்தை பொறுத்தவரை கடந்த ஆண்டை விட தேர்ச்சி விகிதம் குறைந்துள்ளது.
இந்நிலையில் உளவியல் நிபுணர்கள் முக்கிய எச்சரிக்கை ஒன்றை விடுத்துள்ளனர். அதாவது மாணவர்களை மனம் தளராமல் பார்த்துக்கொள்ள வேண்டியது நமது கடமை.
நீட் தேர்வு மூலம் பல மாணவர்களின் மருத்துவ கனவு புதைக்கப்பட்டுள்ளதால் மனம் தளர்ந்துவிட கூடும். அந்த வேளையில், நம்மை அறியாமலேயே நாம் தவறான முடிவுகளை எடுத்து விட நேரிடலாம்.
இதனால் தேர்வு முடிவு வெளியானது முதல் 72 மணி நேரம் வரை மிக மிக முக்கியம். ஒரு வேளை மாணவர்களுக்கு மன அழுத்தம் ஏற்பட்டால், மனநல நிபுணர்களை சந்தித்து மனம் விட்டு பேசினால் மன அழுத்தத்தில் இருந்து விடுபட முடியும்.
பெற்றோர்களும் மாணவர்களை மனம் தளராதவாறு ஊக்கப்படுத்தி சாதாரண மன நிலைக்கு கொண்டு வர வேண்டும். மாணவர்களுக்கு நீட் தேர்வில் எதிர்பார்த்த முடிவு கிடைக்காமல் போனால் அவர்களை பெற்றோர் கண்காணிக்க வேண்டும் என உளவியல் நிபுணர்கள் எச்சரிக்கை விடுத்துள்ளனர்.