மத்தியில் பாஜக அரசு வந்தது முதலே எதிர்க்கட்சிகளை பழிவாங்குவதாக பெரிதும் பேசப்பட்டு வருகிறது. டெல்லி அரவிந்த் கெஜ்ரிவால், மகாராஷ்டிரா உத்தவ் தாக்கரே, மேற்கு வங்கம் மம்தா, தெலங்கானா சந்திர சேகர ராவ், பீகார் நிதிஷ்குமார், ஜார்கண்ட் ஹேமந்த் சோரன் மற்றும் சோனியா, ராகுல் போன்றவர்களை குடைந்து எடுக்கும் முயற்சியில் பாஜக இருப்பது சமீபத்திய நடவடிக்கைகள் மூலமும் அறிந்து கொள்ள முடியும்.
இதனால் நாடு முழுவதும் பாஜகவுக்கு எதிரான அலை வீசுவதாகவே பார்க்கப்படுகிறது. இந்த நிலையில் பிரதமர் மோடி தலைமையில் மத்திய அரசு புலனாய்வு அமைப்புகளை வேண்டுமென்றே பழிவாங்கும் நோக்குடன் பயன்படுத்துவதாக எதிர்ப்பு தெரிவித்து எதிர்கட்சி தலைவர்கள் ஒன்றாக கையெழுத்திட்ட அறிக்கை சமீபத்தில் வெளியாகி பெரும் பரபரப்பை ஏற்படுத்தி இருந்தது.
அந்த அறிக்கையில் ‘மோடி தலைமையிலான மத்திய அரசு அரசியல் எதிரிகளுக்கு எதிராக புலனாய்வுத்துறையை அப்பட்டமாக பயன்படுத்துகிறது. அரசியல் நோக்கத்திற்காக இந்த துறையை மத்திய அரசு துஷ்பிரயோகம் செய்து விட்டது.
மேலும், பல்வேறு அரசியல் தலைவர்கள் முன்னெப்போதும் இல்லாத வகையில், குறிவைக்கப்பட்டு பழிவாங்கப்படுகின்றனர் என்று விமர்சித்துள்ளனர். மேலும் இப்படியான மக்கள் விரோத, விவசாயிகள் விரோத, அரசியலமைப்பு சட்ட விரோத நடவடிக்கைக்கு எதிராக கூட்டுப்போராட்டத்தை வலுப்படுத்துவோம்’ என குறிப்பிட்டு இருந்தனர்.
இந்த விவகாரம் பாஜக மேலிடத்துக்கு பெரும் தலைவலியை ஏற்படுத்தி இருந்த நிலையில், தற்போது திரிணாமூல் காங்கிரஸ் கட்சித் தலைவர் மம்தா பானர்ஜி போட்டுள்ள புதிய குண்டு பாஜக மேலிடத்தின் தூக்கத்தை கெடுக்கும் என எதிர்பார்க்கப்படுகிறது.
அதாவது கொல்கத்தாவில் நடந்த நிகழ்ச்சியில் பேசிய மம்தா, ‘அதிகாரத்தில் இருப்பதால்தான் பாஜக கட்சி ஆணவத்துடன் செயல்பட்டு வருகிறது. டெல்லியில் நடைபெற்ற சுபாஷ் சந்திர போஸ் சிலை திறப்பு விழாவுக்கு எனக்கு அழைப்பு விடுக்கப்படவில்லை. முறையான அழைப்பு இல்லாத நிலையில், அதில் பங்கேற்க பாஜகவின் கொத்தடிமையா நான்?
வரும் 2024 நாடாளுமன்ற தேர்தலில் பாஜகவை தோற்கடிப்பதற்கான ஆட்டம் மேற்குவங்கத்தில் இருந்து தொடங்கும். பீகார் முதல்வர் நிதிஷ் குமார், ஜார்க்கண்ட் முதல்வர் ஹேமந்த் சோரன் உள்பட பல்வேறு எதிர்க்கட்சி தலைவர்கள் ஒன்றிணைந்து இதற்கான பணிகளை மேற்கொள்ள உள்ளனர்.
ஒரு புறம் ஒன்றிணைந்த எதிர்க்கட்சிகள்.. மறுபுறம் தனித்து விடப்பட்ட பாஜக.. என்ற நிலை உருவாக்கப்படும். அப்படிப்பட்ட சூழலில் பாஜகவால் எவ்வாறு வெற்றி பெற்று ஆட்சி அமைக்க முடியும்?’ என்று பேசியுள்ளார்.
நாடு முழுவதும் பாஜகவுக்கு எதிராக எதிர்க்கட்சிகள் ஒருங்கிணைந்து வரும் நிலையில் மம்தா பாணர்ஜி வீசி இருக்கும் புதிய குண்டு, பாஜக தூக்கத்தை கெடுத்து உள்ளதாகவே பகீர் தகவல் வெளியாகி உள்ளது.