அதிமுகவில் தற்போதைய அரசியல் களம் எடப்பாடி பழனிசாமிக்கு சாதகமாக இருக்கிறது. நீதிமன்ற தீர்ப்பு முதல் தேர்தல் ஆணையம் எதிர்பார்க்கும் கட்சி நிர்வாகிகள், எம்.பி, எம்.எல்.ஏக்கள் பெரும்பான்மை வரை என ஈபிஎஸ் தரப்பிற்கு வலு கூடிக் கொண்டே செல்கிறது. இருப்பினும் உயர் நீதிமன்ற தீர்ப்பை எதிர்த்து ஓபிஎஸ் உச்ச நீதிமன்றம் சென்றுள்ளார். அங்கும் தீர்ப்பு எங்களுக்கே சாதகமாக வரும் என்று ஈபிஎஸ் தரப்பு உறுதியாக நம்பிக் கொண்டிருக்கிறது.
அதேசமயம் கிடைக்கும் வாய்ப்புகளை சாமர்த்தியாக செயல்படுத்திட வேண்டும் என்று திட்டமிட்டு வருகிறது. அதாவது, ஜூலை 11ல் நடந்த அதிமுக பொதுக்குழுவை தொடர்ந்து கட்சி இரண்டாக பிரிந்தது. அதன்பிறகும் ஒருங்கிணைப்பாளர் பதவி தன்வசம் இருப்பதாக கூறி புதிதாக கட்சி நிர்வாகிகள், மாவட்ட செயலாளர்களை ஓபிஎஸ் நியமித்தார். இதில் கட்சி நிர்வாகிகள் தரப்பை பொறுத்தவரையில் ஈபிஎஸ் பக்கம் வலுவாகவே இருக்கிறது.
அதேசமயம் மாவட்ட செயலாளர்கள் என்பது ஒவ்வொரு மாவட்டத்தையும் கட்டுக்கோப்பில் வைத்திருக்க வேண்டிய மிக முக்கியமான பொறுப்பு. இவர்களது உத்தரவிற்கு அடிமட்ட தொண்டர்கள் வரை கீழ்ப்படிந்து செயல்படுவர். எந்தவொரு தேர்தலாக இருந்தாலும் சரி. மாவட்ட செயலாலர்களின் முடிவே கட்சி தலைமையிடம் எடுபடும். எனவே ஓபிஎஸ் தரப்பில் இருக்கும் மாவட்ட செயலாளர்களை தன்வசமாக்கி விட்டால் எதிர் தரப்பு ஆட்டம் கண்டு விடும் என்று ஈபிஎஸ் நம்புகிறார்.
இதையொட்டி ஓபிஎஸ் தரப்பில் இருக்கும் 27 மாவட்ட செயலாளர்கள் இழுப்பதற்காக இரண்டு மாஜிக்கள் களமிறக்கி விடப்பட்டிருப்பதாக பேச்சு அடிபடுகிறது. அவர்கள் தெற்கு மண்டலத்தில் திண்டுக்கல் மாவட்டத்தை சேர்ந்த ஒரு மாஜி ஒருவர், கொங்கு மண்டலத்தில் கோவை மாவட்டத்தை சேர்ந்த மாஜி ஒருவர் என்பது குறிப்பிடத்தக்கது. இவர்கள் தொடர்ச்சியாக ஆபரேஷனை நிகழ்த்தி மாவட்ட செயலாளர்களை கைப்பற்ற வேண்டும் என்று அறிவுறுத்தப்பட்டுள்ளதாக தகவல்கள் தெரிவிக்கின்றன.
தற்போது வார்த்தை மோதல்களில் இரு அணிகளும் பரஸ்பரம் ஈடுபட்டு வருகின்றனர். அதில் கடந்த அதிமுக ஆட்சியில் நடந்த ஊழல்கள் பலவும் வெளிப்பட்டு வருவதாக அரசியல் விமர்சகர்கள் சுட்டிக் காட்டுகின்றனர். இதனால் அதிமுக மீது பொதுமக்கள் மத்தியில் அவப்பெயர் ஏற்படும் நிலைமையும் ஏற்பட்டு வருகிறது.
இத்தகைய சூழல் அடுத்து வரும் தேர்தல்களில் வாக்கு சேகரிப்பின் போது பெரும் பின்னடைவாக அமையலாம் என்று எச்சரிக்கப்படுகிறது. இதனை ஈபிஎஸ், ஓபிஎஸ் எப்படி கையாளப் போகிறது? ஆபரேஷன் 27ல் ஈபிஎஸ் வெற்றி கொள்வாரா? உள்ளிட்ட கேள்விகளுக்கு காலம் பதில் சொல்லும் என்கின்றனர் அரசியல் பார்வையாளர்கள்.