ஆன்லைன் ரம்மி தொடர்பான அவசர சட்டம் விரைவில் கொண்டு வரப்படும் என தமிழக சட்டத் துறை அமைச்சர் ரகுபதி தெரிவித்து உள்ளார்.
5 ஆண்டு சட்டப் படிப்புகளுக்கான முதல் சுற்று கலந்தாய்வு நிறைவடைந்த நிலையில், மாணவர் சேர்க்கைக்கான ஆணையினை
சட்டத் துறை அமைச்சர் ரகுபதி
வழங்கினார். சென்னை தலைமைச் செயலகத்தில் உள்ள அமைச்சர் அறையில் நடைபெற்ற இந்நிகழ்ச்சியில் முதல் 12 இடங்களைப் பிடித்த மாணவர்களுக்கான சேர்க்கை ஆணையை அமைச்சர் வழங்கினார்.
தொடர்ந்து செய்தியாளர்களிடம் பேசிய அமைச்சர் ரகுபதி,
ஆன்லைன் ரம்மிக்கான
அவசர சட்டம் விரைவில் கொண்டு வரப்படும் என்றும், அச்சட்டம் எந்த நீதிமன்றத்திலும் ரத்து செய்யப்படாத வகையில் வலுவானதாக கொண்டுவர தேவையான நடவடிக்கைகள் எடுக்கப்பட்டு வருவதாக கூறினார்.
மேலும், நீட் தேர்வு சட்ட மசோதா குறித்து ஆளுநர் கேட்கப்பட்ட விளக்கங்கள் மக்கள் நல்வாழ்வுத்துறை மற்றும் சட்டத்துறையால் வழங்கப்பட்டுள்தாக கூறிய அவர், நீட் மசோதாவிற்கு நல்ல முடிவு வரும் என எதிர்பார்ப்பதாகவும் தெரிவித்தார். துணை வேந்தர்களை மாநில அரசே நியமிக்கும் சட்ட மசோதாவிற்கு ஆளுநர் மாளிகையிலிருந்து இதுவரை எந்த பதிலும் கிடைக்கப் பெறவில்லை எனவும் அவர் கூறினார்.
கடந்த சில நாட்களுக்கு முன்பு, ஆன்லைன் விளையாட்டுகளை தடை செய்வதற்கான கருத்து கேட்பு கூட்டம் நடத்தப்பட்டது. இதை விமர்சித்த எதிர்க்கட்சி தலைவர் எடப்பாடி பழனிசாமி, ஆன்லைன் விளையாட்டுகளை தடை செய்வதற்கு யாராவது கருத்து கேட்பு கூட்டத்தை நடத்துவார்களா என கேள்வி எழுப்பி இருந்தார். இந்நிலையில் தற்போது ஆன்லைன் விளையாட்டு தடைக்கு அவரச சட்டம் பிறபிக்கப்படும் என அமைச்சர் தெரிவித்து உள்ளது குறிப்பிடத்தக்கது.