மறைந்த இங்கிலாந்து ராணி எலிசபெத் உடலுக்கு அஞ்சலி செலுத்த குடியரசு தலைவர் திரெளபதி முர்மு லண்டனுக்கு செல்ல உள்ளதாக தகவல் வெளியாகி உள்ளது.
பிரிட்டன் ராணி இரண்டாம் எலிசபெத் வயது முதிர்வு மற்றும் உடல்நலக் குறைவு காரணமாக சில தினங்களுக்கு முன்பு காலமானார். பிரிட்டன் வரலாற்றிலேயே அதிக காலம் ராணியாக வாழ்ந்து மறைந்தவர் இரண்டாம் எலிசபெத். இவரது மறைவு, பிரிட்டன் முழுவதும் சோகக் கடலை ஏற்படுத்தி உள்ளது.
பிரிட்டன் ராணி இரண்டாம் எலிசபெத்திற்கு அஞ்சலி செலுத்தும் விதமாக, நாடு முழுவதும் துக்கம் அனுசரிக்கப்பட்டு வருகிறது. இதைத் தொடர்ந்து பிரிட்டன் புதிய அரசராக, அவரது மூத்த மகன், சார்லஸ் பொறுப்பேற்றார். இவர், மூன்றாம் சார்லஸ் என அழைக்கப்படுவார். இதன் தொடர்ச்சியாக, பிரிட்டன் தேசிய கீதம், கடவுளே ராணியைக் காப்பாற்று என்பதில் இருந்து, கடவுளே ராஜாவை காப்பாற்று என மாற்றம் செய்யப்பட்டு உள்ளது.
இந்நிலையில் பிரிட்டன் ராணி இரண்டாம் எலிசபெத்தின் இறுதிச் சடங்கில் பங்கேற்க பல்வேறு நாடுகளுக்கு அழைப்பு விடுக்கப்பட்டு உள்ளது. இதன் அடிப்படையில் இந்திய குடியரசு தலைவர் திரௌபதி முர்மு, பிரிட்டன் ராணி இரண்டாம் எலிசபெத்தின் இறுதிச் சடங்கில் பங்கேற்க, லண்டனுக்கு செல்ல உள்ளார். வரும் 17 ஆம் தேதி முதல் 19 ஆம் தேதி வரை 3 நாட்கள் பயணமாக அவர் லண்டன் செல்ல உள்ளார். இந்தத் தகவலை குடியரசுத் தலைவர் மாளிகை உறுதிப்படுத்தி உள்ளது.