திமுக எம்பி ஆ.ராசா அண்மையில் இந்துக்கள் குறித்து சர்ச்சைக்குரிய வகையில் பேசியதாக சொல்லப்படும் வீடியோ சமூக வலைதளங்களில் வைரலானது. இதையடுத்து நீலகிரி தொகுதி முழுவதும் இன்று இந்து முன்னணி சார்பில் ஆ. ராசாவை கண்டித்து கடையடைப்பு போராட்டத்திற்கு அழைப்பு விடுக்கப்பட்டுள்ளது. இந்த நிலையில் நீலகிரி நாடாளுமன்ற தொகுதிக்கு உட்பட்ட கோவை மாவட்டம் மேட்டுப்பாளையம், அன்னூர் மற்றும் அதன் சுற்றுவட்டாரத்தில் கடையடைப்புக்கு எதிர்ப்பு தெரிவித்த திமுக மற்றும் அதன் கூட்டணி கட்சியினர், வியாபாரிகள் போராட்டத்துக்கு ஆதரவளிக்க கூடாது என கடை கடையாக சென்று துண்டு பிரசுரங்களை வழங்கினர்.
மேலும் கடைகளை திறக்க பாதுகாப்பு அளிக்க கோரி அன்னூர் காவல் நிலையத்திலும் புகார் அளித்தனர். இதற்கு போட்டியாக இந்து அமைப்புகள் சார்பில் கடைகளை மூடுமாறு துண்டு பிரசுரங்கள் வழங்கி பிரச்சாரம் செய்யப்பட்டது. இதனால் நேற்றைய தினமே பரபரப்பான சூழல் நிலவியது. அதன்படி, இன்று பல்வேறு மாவட்டங்களில் பாஜகவினர் இந்து அமைப்புடன் சேர்ந்து பந்த் நடவடிக்கையில் ஈடுபட்டு வருகின்றனர். இந்த நிலையில், சத்தியமங்கலம் பேருந்து நிலையத்தில் பல கடைகள் மூடப்பட்டிருந்த சூழலில் ஒரு டீ கடை மட்டும் திறந்து இருந்தது. அந்த கடையை மூடுமாறு பாஜகவினர் தொந்தரவு செய்யும் வீடியோ ஒன்று வைரலாகியுள்ளது.
அப்போது, அங்கிருந்த சத்தியமங்கலம் நகராட்சி திமுக தலைவர் ஜானகி ராமசாமி, ”கடையை மூட சொல்ல உங்களுக்கு எந்த உரிமையும் இல்லை” எனக்கூறி அவர்களுடன் வாக்குவாதம் செய்தார். ஆனால், பாஜகவினர் அங்கிருந்து நகராமல் ”கடையை முடித்தான் ஆக வேண்டும் அதுவரை இங்கிருந்து போக மாட்டோம்” என்ற பிடிவாதத்தில் அங்கேயே நின்று கொண்டிருந்தனர். அதை கவனித்த போலீசாரும் வேடிக்கை பார்த்த நிகழ்வு அதிர்ச்சியடைய வைத்துள்ளது. இதுபோல பல இடங்களில் பாஜகவினர் பந்த் என்ற பேரில் கடை உரிமையாளர்களை மிரட்டுவதாகவும், கடையை மூடும் வரை அங்கேயே கும்பலாக நின்றுகொண்டு தொந்தரவு செய்வதாகவும் இணையங்களில் குற்றசாட்டுகள் குவிந்து வருகின்றன.
காவல்துறையும் அதை வேடிக்கை பார்த்துக்கொண்டு யாருக்கும் ஆதரவாக செயல்பட முடியாமல் இருக்கிறார்கள். அரசிடம் இருந்து சரியான உத்தரவு வராததால்தான் போலீசாரும் எதுவும் செய்யமுடியாத நிலை உள்ளதாக சொல்லப்டுகிறது. நீலகிரி மட்டுமல்லால் பல இடங்களில் பாஜகவினர் இந்து அமைப்பினரோடு இணைந்து இந்த கடை அடைப்பு நடவடிக்கைகளில் ஈடுபடும் சூழலில் இதில் அரசின் தலையீடு என்ன என்ற கேள்வி ஆழமாக எழுகிறது.