கடந்த சில வாரங்களாக புதுச்சேரியில் காய்ச்சல் பரவி வந்த நிலையில் தமிழக பகுதியான கடலூரில் காய்ச்சல் பரவியுள்ளது. கடலூர் மற்றும் சுற்றுவட்டார பகுதிகளில் காய்ச்சல் பரவியதால் பொதுமக்கள் தவித்து வருகின்றனர். ஆயிரக்கணக்கான மக்கள் கடலூர் அரசு மருத்துவமனையில் நீண்ட வரிசையில் சிகிச்சைக்காக காத்திருக்கும் நிலை ஏற்பட்டுள்ளது.
கடலூர் மட்டுமல்லாமல் கடலூரை சுற்றியுள்ள 100க்கும் மேற்பட்ட கிராம பகுதிகளிலும் அதிக அளவில் பொதுமக்கள் காய்ச்சலால் பாதிக்கப்பட்டுள்ளனர். வயது வித்தியாசம் இல்லாமல் சிறு குழந்தைகள் முதல் முதியவர்கள் வரை காய்ச்சலால் பாதிக்கப்பட்டுள்ளனர்.மேலும் காய்ச்சலால் பாதிக்கப்பட்டவர்களுக்கு உடல் சோர்வு மற்றும் உடல் வலி ஏற்படுவதுடன் சளி இருமலும் உள்ளதாக பாதிக்கப்பட்டவர்கள் தெரிவித்துள்ளனர்.
இந்நிலையில், கடலூரில் காய்ச்சல் அதிகம் உள்ள கிராமங்களில் புகை மருந்து அடிக்கும் பணி தீவிரப்படுத்தப்பட்டுள்ளது. மாணவர்களிடையே காய்ச்சல் பரவுவதை தடுக்கும் நடவடிக்கையாக மாணவர்கள் வகுப்பறையில் இருந்து வெளியேற்றப்பட்டு பள்ளிகளில் புகை மருந்து அடிக்கும் பணி பரவலாக நடந்து வருகிறது.
புதுச்சேரி காய்ச்சல் எதிரொலியாக தமிழகத்திலும் காய்ச்சல் பரவி வரும் சூழலில் தொடக்க
பள்ளிகளுக்கு விடுமுறை வழங்கக்கோரி பலரும் அரசுக்கு கோரிக்கை வைத்து வருகின்றனர் என்பது குறிப்பிடத்தக்கது.