கராச்சி: விமானத்தில் ஜன்னலை உதைத்தும் விமானியுடன் மோதலிலும் ஈடுபட்டு ரகளை செய்த பயணியை பாகிஸ்தான் விமான நிறுவனம் கருப்பு பட்டியலில் வைத்து உள்ளது.
பாகிஸ்தான் நாட்டின் பெஷாவரிலிருந்து துபாய்க்கு அந்நாட்டு சர்வதேச விமான நிறுவனத்தின் பி.கே.-283 ரக விமானம் சென்று கொண்டிருந்தது. அந்த விமானம் நடுவானில் சென்ற போது திடீரென்று பயணி ஒருவர் எழுந்து விமான ஊழியர்களிடம் மோதலில் ஈடுபட்டார்.பின்னர் இருக்கைகளை கைகளால் குத்தியும் விமான ஜன்னலை சேதப்படுத்தும் நோக்கில் கால்களால் கடுமையாக உதைத்தும் உள்ளார். இருக்கைகளின் நடுவில் பயணிகள் உள்ளிட்டோர் நடந்து செல்லும் பகுதியில் காலை நீட்டி குப்புற படுத்து கொள்வது போன்ற பல விசித்திர செயல்களிலும் ஈடுபட்டுள்ளார். விமான பணியாளர்கள் மீதும் தாக்குதல் நடத்தியுள்ளார். அவரது வன்முறை அதிகரித்ததும் சூழ்நிலையை கட்டுக்குள் கொண்டு வர விமான பணியாளர்கள் முடிவு செய்தனர்.விமான சட்டத்தின்படி விரும்பத்தகாத வேறு சம்பவங்கள் நடக்காமல் இருக்க அந்த பயணியை இருக்கை ஒன்றில் கயிறால் கட்டி வைத்துள்ளனர். பின்பு விமானி உடனடியாக துபாயில் உள்ள விமான போக்குவரத்து கட்டுப்பாட்டு அதிகாரியை தொடர்பு கொண்டு பாதுகாப்பு கோரினார். விமானம் துபாயில் இறங்கியதும் பாதுகாப்பு அதிகாரிகள் அந்த பயணியை தங்கள் காவலில் எடுத்து சென்றனர். இந்த சம்பவம் எதிரொலியாக அந்த பயணியை பாகிஸ்தான் விமான நிறுவனம் கருப்பு பட்டியலில் வைத்துள்ளது.
புதிய செய்திகளுக்கு தினமலர் சேனலை Subscribe செய்யுங்கள்
Advertisement