அதிமுக முன்னாள் அமைச்சர்கள் எஸ்.பி.வேலுமணி, சி.விஜயபாஸ்கர் ஆகியோர் வீடுகளில் கடந்த சில தினங்களுக்கு முன்னர் வருமானவரித்துறை ரெய்டு நடைபெற்றது. எடப்பாடியின் வலதுகரமான எஸ்.பி.வேலுமணிக்கு சொந்தமான இடங்களில் மட்டும் இதுவரை 3 முறை ரெய்டுகள் நடைபெற்றுள்ளன. அதேபோல், இபிஎஸ்ஸுக்கு நெருக்கமானவர்கள், அவரது ஆதரவாளர்களுக்கு சொந்தமான இடங்களிலும் ரெய்டு படலம் தொடர்கிறது.
இதுபோன்று எடப்பாடி தரப்பினர் மீது தொடர் ரெய்டுகள் நடத்தப்பட்டு வரும் நிலையில், அவர்கள் எந்த நேரமும் கைது செய்யப்படும் வாய்ப்பிருப்பதாகவும் கூறப்படுகிறது. அதிமுக ஒற்றைத் தலைமை விவகாரத்தில் நீதிமன்றத்தின் தீர்ப்பு பின்னடைவை ஏற்படுத்தியிருந்தாலும், எடப்பாடி ஆதரவாளர்கள் மீது பாயும் ரெய்டுகளால் ஓபிஎஸ் குஷியாக இருப்பதாக தெரிகிறது. அந்த வகையில், முன்னாள் அமைச்சர்கள் மீதான ரெய்டு குறித்து கருத்து தெரிவித்த அவர், லஞ்ச ஒழிப்புத்துறை தனது கடமையை செய்கிறது. தங்களை குற்றமற்றவர்கள் என முன்னால் அமைச்சர்கள் நிரூபிக்க வேண்டும் என தெரிவித்துள்ளார்.
அதிமுக முன்னாள் மாஜிக்களான தனது ஆதரவாளர்கள் பற்றி ஆளும் தரப்புக்கு போட்டுக் கொடுப்பதே ஓபிஎஸ்தான் என்று
தரப்பு திட்டவட்டமாக நம்புகிறது. இது தொடர்பாக, எடப்பாடி பழனிசாமியின் ஆதரவாளர்கள் வெளிப்படையாகவே பேட்டி கொடுத்தும் வரும் நிலையில், ஓபிஎஸ்ஸின் இந்த கருத்து அதற்கு கூடுதல் வலு சேர்க்கும் வகையில் உள்ளது.
ஏற்கனவே, திமுகவுக்கு ஆதரவாக ஓபிஎஸ் இருக்கிறார். ஓபிஎஸ்ஸை இயக்குவதே திமுகதான் என எடப்பாடி தரப்பு குற்றம் சாட்டி வரும் நிலையில், ஓபிஎஸ்ஸின் இந்த கருத்தை அவரது ஆதரவாளர்களாக இருக்கும் வைத்திலிங்கம், மனோஜ் பாண்டியன் உள்ளிட்டவர்களே ரசிக்கவில்லையாம். இதுபோன்று கருத்துக்கள் தெரிவிப்பது, தொண்டர்களை எடப்பாடி பழனிசாமி பக்கம் சாய வைத்து விடும் என தங்கள் வருத்ததை அவர்கள் நேரடியாகவே ஓபிஎஸ்ஸிடம் தெரிவித்து விட்டார்களாம்.
அதிமுக பொதுக்குழு தொடர்பாக ஓபிஎஸ் தொடர்ந்த வழக்கில் தனி நீதிபதியின் உத்தரவு அவருக்கு சாதகமாக வந்ததில் இருந்தே உற்சாகமாக பல்வேறு அதிரடி நடவடிக்கைகளை ஓபிஎஸ் மேற்கொண்டு வந்தார். எடப்பாடி பழனிசாமி பக்கம் இருக்கும் மூத்த நிர்வாகிகள் பலரும் ஓபிஎஸ்ஸுடன் தொடர்பு கொண்டு தங்களது ஆதரவை தெரிவித்து வந்ததாக தகவல்கள் வெளியாகின. ஆனால், எடப்பாடி பழனிசாமி தொடர்ந்த மேல்முறையீட்டு வழக்கில் தீர்ப்பு இபிஎஸ்ஸுக்கு சாதகமான வந்ததில் இருந்து, அவர்கள் அனைவரும் தொடர்பை துண்டித்து விட்டதாகவும் தெரிகிறது.