புதுடெல்லி: டெல்லியில் சாலைடிவைடரில் தூங்கிக் கொண்டிருந்த 4 பேர் மீது லாரி மோதியதில் பலியாகினர். மேலும் 2 பேர் மருத்துவமனையில் அனுமதிக்கப்பட்டுள்ளனர். தலைநகர் டெல்லியின் சீமாபுரியில் உள்ள டிடிசி டிப்போ அருகில் உள்ள சிக்னல் பாயிண்டில் சாலை டிவைடரில் சிலர் தூங்கிக் கொண்டிருந்தனர். இந்நிலையில் இன்று அதிகாலை 1.15 மணியளவில் அவ்வழியாக சென்ற அடையாளம் தெரியாத லாரி ஒன்று தனது கட்டுப்பாட்டை இழந்து தூங்கிக் கொண்டிருந்தவர்கள் மீது ஏறி விபத்தை ஏற்படுத்தியது.
இந்த சம்பவத்தில் சம்பவ இடத்திலேயே 2 பேர் பரிதாபமாக உயிரிழந்தனர். மற்றொருவர் மருத்துவமனையில் அனுமதிக்கப்பட்ட நிலையிலும், மேலும் ஒருவர் மருத்துவமனையில் சிகிச்சை பலனின்றி உயிரிழந்ததாகவும் அறிவிக்கப்பட்டது. ெமாத்தம் 4 பேர் பலியான நிலையில் மேலும் இருவர் தீவிர சிகிச்சை பிரிவில் அனுமதிக்கப்பட்டுள்ளனர். விபத்துக்கு காரணமான லாரி, சம்பவ இடத்தில் நிற்காமல் சென்றுவிட்டதால் அந்த லாரியை போலீசார் தேடி வருகின்றனர்.
இச்சம்பவம் குறித்து போலீசார் கூறுகையில்:
விபத்தில் இறந்தவர்கள் நியூ சீமா புரி பகுதியை சேர்ந்த கரீம், சோட் கான், ஷா ஆலம், ராகுல் ஆகியோர் ஆவர். காயமடைந்த மணீஷ் ககன் விஹார், துஸ்லி நிகேதன் மருத்துவமனையில் சிகிச்சை பெற்று வருகின்றனர். விபத்துக்கு காரணமான லாரி, டிரைவரை தேடி வருகிறோம்’ என்றனர். சாலையின் டிவைடரில் தூங்கிக் கொண்டிருந்த 4 பேர் பலியான சம்பவம் பெரும் சோகத்தை ஏற்படுத்தி உள்ளது.