22 டன் ஹெராயின் பிடிபட்டுள்ளது டெல்லி சிறப்பு காவல் பிரிவினரை அதிர்ச்சியில் ஆழ்த்தியுள்ளது. சில நூதன முறைகளை பின்பற்றி இந்த ஹெராயின் கடத்தலை நடத்தியிருக்கிறது கடத்தல் கும்பல்.
மகாராஷ்டிரா மாநிலம் நவி மும்பையில் உள்ள நவ சேனா துறைமுகத்தில், சுமார் 22 டன் ஹெராயின் போதைப் பொருள் கடத்தி வரப்பட்ட கன்டெய்னர் பிடிபட்டிருக்கிறது. இதன் மதிப்பு சர்வதேச சந்தையில் ரூ1,725 கோடி என டெல்லி போலீஸின் ஸ்பெஷல் செல் தகவல் தெரிவித்திருக்கிறது. டெல்லி காவல்துறைக்கு கிடைத்த உளவுத்துறையின் ரகசிய தகவலின்படி கண்டெய்னரில் கடத்தப்படவிருந்த ஹெராயினை டெல்லி காவல்துறையின் சிறப்புப் பிரிவு கைப்பற்றி தீவிர விசாரணை நடத்தி வருகின்றனர்.
ஹெராயின் கடத்தலை கண்டுபிடிக்காமல் இருக்க அதிமதுர குச்சிகளில் ஹெராயின் பூசப்பட்டு கண்டெய்னரில் கொண்டுவரப்பட்டது கண்டுபிடிக்கப்பட்டுள்ளது. பறிமுதல் செய்யப்பட்ட கண்டெய்னர் பெட்டகத்துக்கு ஆயுதம் ஏந்திய காவலர்கள் தற்போது பாதுகாப்பு பணியில் ஈடுபட்டு வருகின்றனர். நவ சேனா துறைமுகத்தில் மொத்தம் உள்ள 5 முனையங்களில் 4 முனையங்களை தனியார் நிறுவனங்கள் நிர்வகித்து வருவது குறிப்பிடத்தக்கது.
இந்த நிலையில் நேற்று, அஸ்ஸாம் மாநிலத்தில் ரூ.4.50 கோடி மதிப்பிலான ஹெராயின் போதைப்பொருளை போலீசார் பறிமுதல் செய்த நிலையில், இது தொடர்பாக இருவரை கைதுசெய்யப்பட்டனர் . தகவலின் அடிப்படையில் நேற்று இரவு கரீம்கஞ்ச் மாவட்டம் பதர்கண்டி காவல் நிலையத்திற்குட்பட்ட கபரிபண்ட் கிராமத்தில் சிறப்புக் குழு ஒன்று அதிரடி சோதனை நடத்தியது. அப்போது 690 கிராம் ஹெராயின் அடங்கிய 49 சோப்பு டப்பாக்களைகண்டு பிடித்தனர் . பறிமுதல் செய்யப்பட்டுள்ள போதைப்பொருளின் சந்தை மதிப்பு சுமார் 4.50 கோடி ரூபாய் என்று காவல் துறை தகவல் தெரிவித்துள்ளது.
சமீப காலமாக இத்தனை கோடி மதிப்பில் போதைப்பொருட்கள் பிடி பட்டு வரும் விவகாரம் பொது மக்கள் மத்தியில் பெரும் அதிர்ச்சியை ஏற்படுத்தி வருகிறது.