கர்நாடக மாநில முதலமைச்சர் பசவராஜ் பொம்மையை விமர்சித்து, காங்கிரஸ் கட்சியினர் ஒட்டியுள்ள போஸ்டர் பரபரப்பை ஏற்படுத்தி உள்ளது.
கர்நாடக மாநிலத்தில் முதலமைச்சர் பசவராஜ் பொம்மை தலைமையிலான பாஜக ஆட்சி நடைபெற்று வருகிறது. இந்த மாநிலத்தில், அரசு பணிகளை மேற்கொள்ள ஒப்பந்ததாரர்களிடம் இருந்து பாஜக அமைச்சர்கள், 40 சதவீத கமிஷன் கேட்பதாக ஒப்பந்ததாரர்கள் சங்க தலைவர் சமீபத்தில் குற்றம் சாட்டி இருந்தார்.
இது அம்மாநில அரசியலில் பெரும் அதிர்வலையை ஏற்படுத்தியது. முதலமைச்சர் பசவராஜ் பொம்மை ஆட்சியில் 40 சதவீத கமிஷன் பெறப்படுவதாக காங்கிரஸ் உள்ளிட்ட எதிர்க்கட்சிகள் தொடர்ந்து விமர்சித்து வருகின்றன.
இந்நிலையில், கர்நாடக மாநில காங்கிரஸ் கட்சியினர், “இங்கே 40 சதவீத கமிஷன் பெறப்படும்” என்ற வாசகத்துடன் முதலமைச்சர் பசவராஜ் பொம்மைக்கு பணம் செலுத்துவதை குறிக்கும் வகையில் “பே சிஎம்” (Pay CM) எனக் குறிப்பிட்டு முதலமைச்சர் பசவராஜ் பொம்மையின் புகைப்படத்துடன் கூடிய “க்யூ.ஆர் கோட்” போஸ்டரை ஒட்டி உள்ளனர். கர்நாடக மாநிலத்தின் பல்வேறு பகுதியில் இந்த போஸ்டர்கள் ஒட்டப்பட்டு உள்ளதால் பரபரப்பு ஏற்பட்டுள்ளது.