தமிழகத்தின் பிரதான எதிர்க்கட்சியாக விளங்கும் அதிமுக, ஆளும்
திமுக
அரசின் குறைகளை சுட்டிக் காட்டி ஜனநாயகப் பூர்வமான அரசியலை முன்னெடுக்க முடியாமல் உட்கட்சி பூசலில் மாட்டிக் கொண்டு தவித்து வருகிறது.
எடப்பாடி பழனிசாமி
,
ஓ.பன்னீர்செல்வம்
தலைமையில் அக்கட்சி இரண்டு அணிகளாக பிரிந்து நிற்கும் சூழலில் சட்டப் போராட்டங்கள் மும்முரமாக நடந்து வருகின்றன. சென்னை உயர் நீதிமன்ற தீர்ப்பு தனக்கு சாதகமாக வந்துள்ளதால் அதை தக்க வைத்துக் கொள்ள எடப்பாடி தரப்பு தீவிரம் காட்டி கொண்டிருக்கிறது. அதன்படி, பொதுக்குழு உறுப்பினர்கள் 2 ஆயிரத்திற்கும் மேற்பட்டோர் கையெழுத்து போட்ட ஆதரவு கடிதங்கள் தலைமை தேர்தல் ஆணையத்தில் ஒப்படைக்கப்பட்டுள்ளன.
எனவே ஓ.பன்னீர்செல்வம் தரப்பு உச்ச நீதிமன்றத்தில் தொடுத்துள்ள வழக்கானது விசாரணைக்கு வரும் பட்சத்தில் பொதுக்குழு உறுப்பினர்கள் அளித்துள்ள ஆதரவு கடிதங்கள் பலம் சேர்க்கும் வகையில் இருக்கும் என்று எடப்பாடி தரப்பு நம்புகிறது. நீதிமன்ற வழக்குகள் முடிவடைந்த பின்னர், தேர்தல் ஆணையத்தில் விவகாரம் சூடுபிடிக்கும். யாருக்கு சின்னம், கட்சி, பொறுப்புகள் என இருதரப்பும் வாதம் செய்யும். அங்கு பொதுக்குழு உறுப்பினர்கள், எம்.எல்.ஏக்கள், எம்.பிக்கள் ஆகியோரின் ஆதரவை எடப்பாடி சுட்டிக் காட்டுவார். மேலும் கட்சி விதிமுறைகளில் செய்யப்பட்ட மாற்றங்கள் குறித்தும் எடுத்துரைத்து நிரந்தர பொதுச் செயலாளர் நாற்காலியை கைப்பற்ற எடப்பாடி பழனிசாமி தீவிரம் காட்டுவார்.
அதேசமயம் ஓ.பன்னீர்செல்வம் தரப்பில் இருக்கும் ஆதரவு வட்டம், தொண்டர்களின் மனநிலை, அதிமுகவை பற்றி மக்கள் என்ன நினைக்கிறார்கள் போன்ற கேள்விகள் தொக்கி நிற்கின்றன. இவற்றுக்கு விடை தரக் கூடியது வரும் 2024ஆம் ஆண்டு மக்களவை தேர்தல். இது எடப்பாடி மற்றும் ஓ.பன்னீர்செல்வம் ஆகிய இருவருக்கும் அக்னி பரீட்சையாக இருக்கும் என்பதில் சந்தேகமில்லை. இந்த சூழலில் டெல்லி பயணம் எடப்பாடிக்கு பல்வேறு விஷயங்களை தெளிவுபடுத்தி இருப்பதாக அரசியல் பார்வையாளர்கள் கருதுகின்றனர். ஏனெனில் அதிமுகவின் எதிர்காலம் குறித்து அமித் ஷா சில விஷயங்களை சுட்டிக் காட்டியுள்ளார். அதாவது, 2019ஆம் ஆண்டு மக்களவை தேர்தலில் அதிமுக – பாஜக கூட்டணி போட்டியிட்டது.
அப்போது பாஜகவிற்கு 7 தொகுதிகள் வேண்டும் என்று அமித் ஷா டீலிங் பேசினார். ஆனால் பல்வேறு காரணங்களை கூறி 5 தொகுதிகளை மட்டுமே எடப்பாடி ஒதுக்கினார். இதன்மூலம் எடப்பாடியார் யார் என்பதும், அவரது கணக்குகள் என்னவென்பதும் அமித் ஷா நன்கு புரிந்து கொண்டார். இப்படிப்பட்ட சூழலில் டெல்லியில் எடப்பாடியிடம் பேசிய அமித்ஷா, 2024 மக்களவை தேர்தலில் அதிமுக 25 தொகுதிகளை கைப்பற்றியே ஆக வேண்டும். அதற்கான வியூகம் வகுத்து தற்போது முதலே செயல்படத் தொடங்குங்கள். ஒருவேளை திமுக கூட்டணி வெற்றி பெற்று விட்டால் உங்கள் எதிர்காலம் கேள்விக்குறியாகி விடும். அதிமுகவின் எதிர்காலமும் தான் என்று அறிவுறுத்தியுள்ளார்.
அதுமட்டுமின்றி கட்சியை கட்டுக்கோப்பாக வைத்திருக்க வேண்டிய அவசியம் இருக்கிறது. ஏற்கனவே டிடிவி தினகரன் தனிக்கட்சி தொடங்கி குறிப்பிட்ட சதவீத வாக்குகளை அதிமுகவில் இருந்து பிரித்து விட்டார். இதற்கிடையில் சசிகலா ஆதரவு ஓட்டுகள். தற்போது ஓபிஎஸ் தரப்பின் வாக்குகள். இப்படியே போனால் தோல்வி மட்டும் தான் மிச்சம். எனவே முக்கியமான நபர்களை அரவணைத்து செல்ல பாருங்கள். கூட்டணி கணக்குகளை சரிவரப் போடுங்கள். பலமான எதிரணியை வீழ்த்த முதலில் சிறிய கட்சிகளை வசப்படுத்த வேண்டும். பாமக, தேமுதிக, புதிய தமிழகம் உள்ளிட்ட கட்சிகளை விட்டு விடாதீர்கள். இந்த கணக்கு சரியாக நடந்தால் 2024 தேர்தல் களம் நமக்கு சாதகமாக மாறும்.
இல்லையெனில் அதிமுக முன்னாள் அமைச்சர்கள் மீதான வழக்குகளை தூசு தட்ட வேண்டிய கட்டாயம் ஏற்படும். எங்களை நெருக்கடியில் இட்டுச் செல்லாதீர்கள். இனி உங்கள் கையில் தான் என்று அறிவுறுத்தியதாக தெரிகிறது. எனவே எடப்பாடி செய்ய வேண்டியது மொத்தம் 4 விஷயங்கள். அதாவது, அதிமுகவின் ஒற்றை தலைமை, அதிருப்தி கோஷ்டிகளை ஒடுக்குதல், அனைத்து சமூக வாக்குகளையும் கவர வியூகம் வகுத்தல், சரியான கூட்டணி என லிஸ்ட் போடுகின்றனர் அரசியல் பார்வையாளர்கள். இதே விஷயத்தை தான் அதிமுகவின் ரத்தத்தின் ரத்தங்களும் முன்னிறுத்துவதால் அடுத்த இரண்டு ஆண்டுகளில் எடப்பாடி பழனிசாமியின் செயல்பாடுகள் மீது மிகுந்த எதிர்பார்ப்பு ஏற்பட்டுள்ளது. இதற்கிடையில் அமித் ஷாவின் அறிவுரைகளுக்கு பின்னால் வேறு விதமான அரசியல் கணக்குகளும் கண்டிப்பாக இருக்கும் என்கின்றனர்.