முதலமைச்சர் தலைமையிலான அமைச்சரவை தீபாவளி பண்டிகைக்கு முன்பு மாற்றி அமைக்கப்பட உள்ளதாக தகவல் வெளியாகி உள்ளது.
தமிழக முதலமைச்சராக,
தலைவர் மு.க.ஸ்டாலின் கடந்த 2021 ஆம் ஆண்டு மே மாதம் 7 ஆம் தேதி பதவி ஏற்றார். அதைத் தொடர்ந்து அவரது தலைமையிலான அமைச்சரவையும் பதவி ஏற்றது. அமைச்சரவையில், நடிகரும், திமுக இளைஞரணி செயலாளரும், முதலமைச்சர் மு.க.ஸ்டாலின் மகனுமான உதயநிதி ஸ்டாலினுக்கு இடம் அளிக்கக் கூடும் என எதிர்பார்க்கப்பட்ட நிலையில், வாய்ப்பு மறுக்கப்பட்டது.
இதைத் தொடர்ந்து, உதயநிதி ஸ்டாலின் விரைவில் அமைச்சர் ஆவார் என்றும், அந்த கருத்தை அனைத்து அமைச்சர்களும் ஆமோதித்தனர். எனினும், உதயநிதி ஸ்டாலின் அமைச்சர் ஆவதற்கு முதலமைச்சர் மு.க.ஸ்டாலின் இசைவு தெரிவிக்கவில்லை. தொடர்ந்து, படங்களில் மீண்டும் நடிக்க சென்று விட்டார் உதயநிதி ஸ்டாலின்.
முதலமைச்சர் மு.க.ஸ்டாலின் தலைமையிலான திமுக அரசு பொறுப்பேற்று ஒன்றரை ஆண்டுகள் கடந்து விட்டது. எனினும், அமைச்சரவை மாற்றம் நடைபெறவில்லை. சர்ச்சையில் சிக்கிய அமைச்சர் ராஜ கண்ணப்பனின் இலாகா மட்டும் மாற்றம் செய்யப்பட்டது. உதயநிதி ஸ்டாலின் அமைச்சர் ஆவதற்காக அமைச்சரவை மாற்றம் நடைபெற உள்ளதாக சமூக ஊடகங்களில் மட்டுமே தகவல் பரவியது. கடைசியில் அந்த தகவலும் பொய்த்துப் போனது.
இந்நிலையில், முதலமைச்சர் மு.க.ஸ்டாலின் தலைமையிலான அமைச்சரவை, விரைவில் மாற்றி அமைக்கப்பட உள்ளதாக தகவல் வெளியாகி உள்ளது. தீபாவளி பண்டிகைக்குள் அமைச்சரவை மாற்றம் நடைபெற வாய்ப்பு இருப்பதாகவும் கோட்டை வட்டாரத்தில் பரபரப்பாக பேசப்பட்டு வருகிறது.
ஒருசில அமைச்சர்களுக்கு சில இடங்கள் ஒதுக்கும் வேலைகள் நடந்து வருவதாகவும், ஒருசில எம்.எல்.ஏ.,க்களுக்கு அமைச்சரவையில் இடம் கிடைக்க உள்ளதாகவும், ஒருசில அமைச்சர்களுக்கு இலாகா மாற்றம் நடைபெற உள்ளதாகவும் கூறப்படுகிறது.
இதற்கிடையே, அமைச்சர்களின் செயல்பாடுகள் குறித்து முதலமைச்சர் மு.க.ஸ்டாலினுக்கு ரகசிய ரிப்போர்ட் கார்டு கிடைத்து உள்ளதாகவும், அதன் அடிப்படையில், அமைச்சரவை மாற்றம் இருக்கும் என்றும் தகவல் வெளியாகி உள்ளது. செயல்படாத அமைச்சர்களுக்கு, பதவி குறைப்பு நடவடிக்கையும் எதிர்பார்க்கலாம் என்றும் கூறப்படுகிறது.