இந்தியாவின் மாநிலங்களுக்கு தமிழ்நாடு முன்னோடியாக இருப்பதோடு மட்டுமல்லாமல், பல்வேறு புரட்சிகர திட்டங்களும் இங்கிருந்தே தொடங்கப்பட்டுள்ளன. அதற்கு கிட்டத்தட்ட அரை நூற்றாண்டுகளுக்கும் மேலாக இங்கு ஆட்சிபுரிந்து வரும் திராவிட கட்சிகளே காரணம் என்றால் மிகையாகாது. திராவிட கட்சிகளை எதிர்ப்போர் கூட அத்தனை எளிதாக இதனை புறந்தள்ளி விட முடியாது. அந்த வகையில், திராவிட அரசியலை மிக வலுவாக எதிர்க்கும் பாஜக, திமுகவின் அனைத்து சாதியினரும் அர்ச்சகர் எனும் திட்டத்தை மேற்குவங்கத்தில் கையில் எடுத்துள்ளது.
கடவுள் மறுப்பை மிகத்தீவிரமாக பேசிய தந்தை பெரியார், அனைத்து சாதியினரும் கோயில் கருவறைக்குச் செல்ல அனுமதிக்க வேண்டுமென்றும் வலியுறுத்தி வந்தார். இதற்காக 1970ஆம் ஆண்டில் போராட்டம் ஒன்றை அறிவித்தார். இந்த அறிவிப்பையடுத்து, அப்போதைய முதல்வர் கலைஞர் கருணாநிதி அனைத்து சாதியினரும் அர்ச்சகராவதற்கான சட்டம் விரைவில் இயற்றப்படும் என்றும் பெரியார் தன் போராட்டத்தை தள்ளிவைக்க வேண்டும் என்றும் கேட்டுக்கொண்டார். அதன்படி போராட்டமும் தள்ளிவைக்கப்பட்டது; சட்டமும் இயற்றப்பட்டது.
ஆனாலும், இந்த சட்டத்தை எதிர்த்த வழக்குகளால் கலைஞர் கருணாநிதியால் அதனை நிறைவேற்ற முடியவில்லை. தொடர்ந்து, முதல்வராக பொறுப்பேற்ற ஸ்டாலின், இந்து சமய அறநிலையத் துறையின் கட்டுப்பாட்டில் இயங்கும் கோயில்களில் தலித் சமூகத்தினர் உட்பட அனைத்து சாதியை சேர்ந்த 28 பேரை பல்வேறு கோயில்களில் அர்ச்சகர்களாக நியமித்தார். இதனை எதிர்த்த வழக்கில் தீர்ப்பளித்த சென்னை உயர் நீதிமன்றம், அர்ச்சகர் நியமனம் தொடர்பாக தமிழ்நாடு அரசு விதித்த விதிகள் செல்லும் என்றும் ஆகம விதிப்படி இயங்கும் கோவில்களில் அந்த ஆகம விதிப்படி அர்ச்சகர்களை நியமிக்க வேண்டும் என்றும் தீர்ப்பளித்தது.
இந்த பின்னணியில், மேற்குவங்க பாஜக தனது வருடாந்திர ஐந்து நாள் துர்கா பூஜையை நடத்த பிராமணர் அல்லாத பெண் ஒருவரை முதன்முறையாக தேர்வு செய்துள்ளது. கொல்கத்தாவில் உள்ள சத்யப்ரியா ராய் கல்வியியல் கல்லூரியில் படித்து வரும் 28 வயதான சுலதா மோண்டல் என்ற இளம்பெண்ணை அக்கட்சி தேர்வு செய்துள்ளது. சாஸ்திரங்களைக் கற்றுக்கொண்டுள்ள 2018ஆம் ஆண்டு முதல் பூஜை உள்ளிட்ட சடங்குகளை நடத்தி வருகிறார். சரஸ்வதி பூஜை, காளி பூஜை, துர்கா பூஜைகளை நடத்தி வரும் அவர், திருமண விழாக்களையும் இறந்தவர்களுக்கு செய்யும் சடங்குகளையும் நடத்தி வருகிறார்.
துர்கா பூஜை செய்ய தேர்வாகியுள்ளது தனது உற்சாகத்தை அளித்துள்ளதாக தெரிவிக்கும், சுலதா மோண்டல், பெண்கள் வீட்டில் பூஜை நடத்தலாம் என்றால், பொதுவெளியில் ஏன் செய்யக்கூடாது? பொதுநிகழ்வுகளில் ஆண்கல் மட்டும்தான் பூஜை செய்ய வேண்டுமா? என கேள்வி எழுப்பியதுடன், இந்த தடைகளை உடைக்க வேண்டும் எனவும் தெரிவித்துள்ளார்.
துர்கா பூஜைகளுக்கு பெண்களை களமிறக்குவதன் மூலம் மேற்குவங்கத்தில் தனது பிம்பத்தை மாற்ற பாஜக முயற்சிப்பதாக அரசியல் ஆய்வாளர் சௌர்ஜ்யா பௌமிக் கூறுகிறார். இதுகுறித்து அவர் கூறுகையில், “பாஜக உயர் சாதியினரின் கட்சியாக பார்க்கப்படுகிறது. அக்கட்சியை பொறுத்தவரை பூஜை சடங்குகளுக்கு பெண்கள் அனுமதிக்கப்படுவதில்லை. கடந்த காலங்களில் துர்கா பூஜையின் போது பெண்கள் ஒருசில தடவை பூஜைகள் செய்துள்ளனர். ஆனால், பரவலாக அது நடப்பதில்லை. இந்த முடிவின் மூலம் அரசியல் ரீதியாகவும், சமூக ரீதியாகவும் முற்போக்கானவர்கள் நாங்கள் என்று காட்ட பாஜக முயற்சிக்கிறது.” என்றார்.
பாஜகவின் இந்த நடவடிக்கை முற்போக்கானது என தெரிவிக்கும் பங்கபாசி கல்லூரியின் அரசியல் அறிவியல் பேராசிரியர் உதயன் பந்தோபாத்யாய், இருப்பினும், பாஜக உயர் சாதியினரின் கட்சி என்று ஒடுக்கப்பட்ட சாதியினர் கருதிவிடக் கூடாது என்ற செய்தியை வழங்குவதற்காக இந்த ஏற்பாடு செய்யப்பட்டுள்ளது என்கிறார்.
மேற்குவங்கத்தில் 2020ஆம் ஆண்டு சட்டமன்றத் தேர்தலுக்கு முன்னதாக அம்மாநில பாஜக முதன்முறையாக துர்கா பூஜை கொண்டாட்டங்களுக்கு ஏற்பாடு செய்தது. இந்த முயற்சி முகுல் ராய் மற்றும் சப்யசாச்சி தத்தா ஆகியோரால் மேற்கொள்ளப்பட்டது. அவர்கள் இருவரும் தற்போது மீண்டும் சொந்தக்கட்சியான திரிணாமூல் காங்கிரஸ் கட்சியில் இணைந்து விட்டனர். மேற்குவங்க பாஜகவால் ஏற்பாடு செய்யப்பட்ட முதல் துர்கா பூஜையை 2020ஆம் ஆண்டில் பிரதமர் மோடி தொடங்கி வைத்தார். கொரோனா காரணமாக 2021இல் நடைபெறவில்லை. மேற்குவங்கத்தில் எப்படியும் ஆட்சியை பிடித்து விட வேண்டும் என்ற பெருங்கனவோடு இருக்கும் உள்துறை அமைச்சர் அமித் ஷா துர்கா பூஜைகளை இந்த ஆண்டு தொடங்கி வைக்கவுள்ளார்.
இது ஒரு முக்கியமான தருணம் என கூறும் பாஜக எம்பி லாக்கெட் சட்டர்ஜி, பெண்கள் சக்திக்கான ஒரு பெருமையான தருணம். பெண்களுக்கு அதிகாரம் அளிப்பதை நாங்கள் வாயில் சொல்வதில்லை செயலில் காட்டுகிறோம். மம்தா பானர்ஜியை போன்று பெண்களின் மேம்பாடு பற்றி உதட்டளவில் நாங்கள் பேசவில்லை என்றும் தெரிவித்துள்ளார்.
பெண்கள் துர்கா பூஜை செய்வது ஒரு புதிய நிகழ்வு அல்ல என்றும், மேற்கு வங்கத்தைப் பற்றி பேசுவதற்கு முன்பு பாஜக தாங்கள் கட்சி ஆளும் மாநிலங்களில் பெண்களுக்கு எதிரான கொடுமைகளை சற்று திரும்பிப் பார்க்க வேண்டும் என திரிணாமூல் காங்கிரஸ் தலைவர் சந்திரிமா பட்டாச்சார்யா பதிலடி கொடுத்துள்ளார். “மம்தா பானர்ஜியின் திறமையான தலைமையின் கீழ், இங்குள்ள பெண்கள் சமூக ரீதியாகவும், பொருளாதார ரீதியாகவும் ஏற்கனவே அதிகாரம் பெற்றுள்ளனர். பெண்களுக்கான பல வளர்ச்சித் திட்டங்களை அவர் கொண்டு வந்துள்ளார். இது வங்காளத்தின் முற்போக்கான மனநிலையை எடுத்துக்காட்டுகிறது.” என அவர் தெரிவித்துள்ளார்.
தமிழகத்தில் பெண்கள் உள்பட அனைத்து சாதியினரும் அர்ச்சகராகும் திட்டத்தை எதிர்க்கும் பாஜக, மேற்குவங்கத்தில் இந்த திட்டத்தை கையில் எடுப்பது பற்றி கருத்து தெரிவிக்கும் அரசியல் விமர்சகர்கள், இதுதான் பாஜகவின் அரசியல் ஸ்டண்ட் என்கிறார்கள். “பெண்களை வைத்து பூஜை செய்வதன் பின்னணியில் பாஜகவிடம் பெரிதாக எந்த முற்போக்கான திட்டமும் இருக்காது; இது முற்றிலும் அரசியலுக்கான நடவடிக்கையே” என்றும் அவர்கள் தெரிவிக்கிறார்கள்.
மம்தா பானர்ஜி தலைமையிலான திரிணாமூல் காங்கிரஸ் கட்சிக்கு பெண்கள் மத்தியில் ஒரு தனித்துவமான ஆதரவு உள்ளது. பெண்களை மையமாக கொண்ட பல்வேறு நலத்திட்டங்கள் பெண் வாக்காளர்களிடையே அக்கட்சிக்கு உறுதியான ஆதரவை ஏற்படுத்தித் தந்துள்ளது.
குழந்தை திருமணத்தை தடுக்க மாணவிகளுக்கு நிதியுதவி வழங்கும் கன்யாஸ்ரீ, மாணவிகளுக்கு இலவச சைக்கிள்கள் வழங்கும் சபூஜ் சதி, பெண்ணின் திருமணத்திற்கு உதவும் நிதி உதவித் திட்டமான ரூபாஸ்ரீ, , குறைந்த வருமானம் கொண்ட குடும்பங்களில் உள்ள பெண்களுக்கான மாதாந்திர பண உதவித் திட்டமான லக்ஷ்மிர் பந்தர் உள்ளிட்ட திட்டங்கள் இதில் அடங்கும்.
2021ஆம் ஆண்டு மேற்குவங்க சட்டமன்றத் தேர்தலின்போது, “வங்காளத்திற்கு அதன் சொந்த மகளே (மம்தா பானர்ஜி) வேண்டும்.” என்ற முழக்கத்தை திரிணாமூல் கட்சி முன்வைத்தது. பெண் வாக்காளர்களை கவரும் வகையில் வடிவமைக்கப்பட்டிருந்த இந்த முழக்கம், அக்கட்சியின் வெற்றிக்கும் வித்திட்டது என்பது குறிப்பிடத்தக்கது.