மயிலாடுதுறை திருக்கடையூர் அமிர்தகடேஸ்வரர் கோயிலில் இன்று காலை இஸ்ரோ விக்ரம் சாராபாய் சிறப்பு பேராசிரியரும், இஸ்ரோ முன்னாள் தலைவருமான டாக்டர் சிவன் தனது மனைவி மாலதியுடன் ஆயுஸ் ஹோமத்தில் பங்கேற்றார். இதையடுத்து, மயிலாடுதுறையில் உள்ள பழைமை வாய்ந்த தருமபுரம் ஆதீனத்துக்கு வந்த அவர் தருமபுரம் ஆதீனம் 27-வது குருமகா சந்நிதானம் ஸ்ரீலஸ்ரீ மாசிலாமணி தேசிக ஞானசம்பந்த பரமாசாரிய சுவாமிகளை சந்தித்து அருளாசி பெற்றார். அவருக்கு ஆதீனகர்த்தர் திருக்குறள் விளக்கவுரை புத்தகத்தை வழங்கி அருளாசி கூறினார்.
தொடர்ந்து, செய்தியாளர்களைச் சந்தித்த இஸ்ரோ முன்னாள் தலைவர் சிவன், “தருமபுரம் ஆதீனம் நாட்டு மக்களுக்கும், இளைஞர்களுக்கும் உத்வேகத்தை ஏற்படுத்தும் வகையில் பல சேவைகளை செய்து வருகிறது. இஸ்ரோவும் இதுபோல சேவை நோக்கத்தோடு தொடங்கப்பட்டதுதான். தற்போது பெரிய ஆலமரமாக வளர்ந்து இந்திய மக்களுக்கு சேவையாற்றி வருகிறது. தருமபுரம் ஆதீனத்தின் சேவை மூலமாக புதிய வேலைவாய்ப்புகளும், புதிய கண்டுபிடிப்புகளுக்கான வாய்ப்புகளும் உண்டாகும். பாரத பிரதமர் அறிவியல் மற்றும் தொழில்நுட்பத்தில் புதிய கண்டுபிடிப்புகள் வேண்டும் என்று கூறியுள்ளார். பிரதமரின் முயற்சிகளுக்கு தருமபுரம் ஆதீனத்தின் பணிகளும் முக்கிய பங்காற்றுவதாக எனக்குத் தெரிகிறது.
இந்தியா உலகளவில் முதலிடத்தை பிடிக்கக்கூடிய நாள் வெகுதூரத்தில் இல்லை. அதற்கான முயற்சியில் மாநில, மத்திய அரசுகள் முறையாக செயல்பட்டு முன்னேறி வருகிறோம். புதிய கண்டுபிடிப்புகளை செய்வது அறிவியல். அறிவியல் வளர்ச்சியில் ஆன்மீகம் வருவதற்கு வாய்ப்புகள் உள்ளது. அதற்கான ஆராய்ச்சிகள் செய்யப்பட வேண்டும். அறிவியல் துறை என்பது ஸ்பேஸ் டெக்னாலஜி மட்டும் கிடையாது. விவசாயம் உள்ளிட்ட எல்லா துறைகளிலும் அறிவியல் உண்டு. பிரதமரின் முயற்சியால் அனைத்துத் துறைகளும் வளர்ச்சி அடைந்து வருகிறது. வெகுவிரைவில் தன்னிறைவு அடைவோம்.
வெளிநாடுகளில் இருந்து ரபேல் விமானம் போன்ற கொள்முதல் செய்து வருகிறோம். ஆனால் உள்நாட்டிலேயே அதிக அளவில் தயாரிக்கப்பட்டு வருகிறது. மொத்த தேவையில் அனைத்தையுமே வெளிநாட்டில் இருந்து இறக்குமதி செய்தது போய், தற்போது 90 சதவீதம் வரை நாமே தயாரித்து வருகிறோம். விரைவில் 100 சதவீதம் இந்தியாவிலேயே தயாரிக்கப்படும். மாணவர்களுக்கு ஏராளமான துறைகளில் தேவைகளும், வாய்ப்புகளும் அதிகமாக உள்ளன” என்றார்.