கோவை மாவட்டதில் ஏற்பட்டுள்ள குண்டு வீச்சு தொடர்பான நடவடிக்கைகள் குறித்து மத்திய இணை அமைச்சர் எல்.முருகன் தனது கருத்தை தெரிவித்துள்ளார்.
இதுகுறித்து திருச்சி விமான நிலையத்தில் செய்தியாளர்களிடம் பேசிய மத்திய இணை அமைச்சர் எல்.முருகன், “கோவை மற்றும் அதன் சுற்றியுள்ள பகுதிகளை சேர்ந்த பாரதிய ஜனதா கட்சியின் முக்கிய நிர்வாகிகளின் வீடுகள், அலுவலகங்களை குறிவைத்து ஒரு கும்பல் தாக்குதல் நடத்துகிறது. அந்த தாக்குதலை யார் செய்தார்களோ அவர்கள் மீது தமிழ்நாடு அரசு நடவடிக்கை எடுக்க வேண்டும்.
தேசிய புலனாய்வு முகமையை அரசு தவறுதலாக பயன்படுத்தப்படுகிறது என
நிர்வாகி டி.கே.எஸ். இளங்கோவன் பேசி இருப்பது வன்மையாக கண்டிக்கத்தக்கது. தேச பாதுகாப்பு விஷயத்தில் தி.மு.க வாக்குவங்கி அரசியல் செய்ய கூடாது. எய்ம்ஸ் கட்டுவதற்கான ஆரம்ப கட்ட பணிகளில் 95 சதவீதமான பணிகள் முடிக்கப்பட்டுள்ளதாக தான் பாஜக தேசிய தலைவர் நட்டா தெரிவித்துள்ளார். இந்த விவகாரத்தில் தமிழக அரசியல்வாதிகள் வெற்று விளம்பரம் செய்ய கூடாது. 2026 ஆம் ஆண்டு தான் அந்த பணிகள் நிறைவடையும் என தெரிவிக்கப்பட்டுள்ளது.
ஆ.ராசா இந்து மக்களை அவமதித்ததை மக்கள் பொறுத்து கொள்ள மாட்டார்கள். ஓட்டுக்காக இந்து மக்களை ஏமாற்றும் செயலை தி.மு.க நிறுத்தி கொள்ள வேண்டும். ராகுல் காந்தி நடைபயணம் ஆரம்பக்கட்டத்திலேயே தோல்வி அடைந்துள்ளது. அவர் இந்த பயணத்தை தொடங்கிய போதே கோவாவில் காங்கிரஸ் எம்.எல்.ஏக்கள் சிலர் அக்கட்சியிலிருந்து வெளியேறிவிட்டார்கள் .
அவர் காஷ்மீர் செல்வதற்குள் காங்கிரஸ் கட்சியே காணாமல் போய்விடும். திருச்சி வானொலி நிலையம் பாரம்பரியமிக்கது. அது எந்த நேரத்திலும் இங்கிருந்து மாற்றப்படாது. வதந்திகளை யாரும் நம்ப வேண்டாம். தமிழ்நாட்டில் வன்கொடுமை தடுப்பு சட்டம் தவறாக பயன்படுத்தப்படுகிறது. அரசை கேள்வி கேட்பவர்களை இது போன்ற சட்டங்கள் மூலம் ஒடுக்கப்பார்க்கிறார்கள்” என்று மத்திய இணை அமைச்சர் எல்.முருகன் செய்தியாளர்களிடம் தெரிவித்தார்.