வருகிற 2024ம் ஆண்டு பாராளுமன்ற தேர்தல் நடைபெற உள்ளது. இதில் வெற்றி பெற்று 3வது முறையாக ஆட்சி அமைப்பதற்கு பாஜக சார்பில் பல்வேறு வியூகங்கள் வகுக்கப்பட்டு வருகிறது.
அதே சமயம் பாராளுமன்ற தேர்தலுக்கு முன்பாக குஜராத், இமாச்சல பிரதேசம், கர்நாடகா, ராஜஸ்தான், மத்திய பிரதேசம் மற்றும் சத்தீஸ்கர் ஆகிய மாநிலங்களில் சட்டசபை தேர்தல்கள் நடைபெற உள்ளன.
இந்த தேர்தல்களில் வெற்றி பெறுவது குறித்தும் பாஜக ஆலோசித்து வருகிறது. இதையடுத்து தேர்தல் நடைபெற இருக்கும் மாநிலங்களுக்கு பாஜக பொறுப்பாளர்கள் நியமிக்கப்பட்டுள்ளனர்.
மேலும், இந்த மாநிலங்களில் கட்சி ரீதியாகவும் பல்வேறு மாற்றங்கள் செய்யப்பட்டு, புதிய நிர்வாகிகள் நியமிக்கப்பட்டு வருகின்றனர். அத்தோடு, மத்திய அரசின் 8 ஆண்டு கால சாதனைகளை மக்களிடம் எடுத்து கூறி தேர்தல்களில் வெற்றி பெற வியூகங்களை அமைக்குமாறு, பொறுப்பாளர்களுக்கு கட்சித் தலைமை அறிவுறுத்தி இருக்கிறது.
இதனுடன் சேர்த்து தாமரை மலரவே மலராது என கூறப்பட்டு வந்த தமிழ்நாட்டில் 4 பேர் எம்எல்ஏக்களாக தேர்வு செய்யப்பட்டிருப்பது, பாஜகவுக்கு புத்துணர்ச்சியை அளித்துள்ளதாகவே கூறப்படுகிறது.
இதையே உந்துசக்தியாக கொண்டு வர இருக்கும் 2024ம் ஆண்டு பாராளுமன்ற தேர்தலில் தமிழ்நாட்டில் இருந்து சில எம்.பி.க்களை பெற்று விட வேண்டும் என்பதில் பாரதிய ஜனதா கட்சி மிக தீவிரமாக உள்ளது.
இதற்காக விரிவான ஆய்வு நடத்தி கன்னியாகுமரி, தென்காசி, மதுரை, சிவகங்கை, கரூர், ஈரோடு, கோவை மற்றும் நீலகிரி ஆகிய 8 தொகுதியை பாஜ குறிவைத்து காய்களை நகர்த்தி வருவதாக தகவல் வெளியாகி உள்ளது.
இந்த 8 தொகுதிகளில் வட இந்திய தேர்தல் பார்முலாவை பின்பற்ற பாஜக திட்டமிட்டு உள்ளது. அதன்படி இந்த 8 தொகுதிகளிலும் பாஜக மூத்த தலைவர்கள் மற்றும் நிர்வாகிகள் அடுத்தடுத்து படையெடுத்து மக்கள் மத்தியில் மத்திய அரசின் சாதனையை விளக்க உள்ளனர்.
இந்த பார்முலா ஏறக்குறைய திண்ணை பிரச்சாரத்தை போல தான் இருக்கும். அதன்படி ஒவ்வொரு நாடாளுமன்ற தொகுதியிலும் பாஜக மூத்த தலைவர்கள் மற்றும் முக்கிய நிர்வாகிகள் முகாமிட்டு, அப்பகுதியை பாஜக ஆதரவு நிலைப்பாட்டுக்கு கொண்டு வருவது தான் இவர்களது இலக்கு.
பாஜகவின் இந்த திட்டம் ஓரளவுக்கு கை கொடுக்கும் என டெல்லி மேலிடம் கருதுவதால் அதை நிறைவேற்றிக் காட்டிட, தமிழக பாஜக நிர்வாகிகள் மும்முரமாக களத்தில் இறங்கி உள்ளதாக கூறப்படுவதால் தொண்டர்கள் மத்தியில் எழுச்சியை காண முடிகிறது.