சட்டவிரோத பண பரிமாற்றம், மத நல்லிணக்கத்திற்கு எதிராக செயல்படுவது, பயங்கரவாத அமைப்புகளுடன் தொடர்பு, பிரதமர் மோடியை கொல்ல சதி என பல்வேறு காரணங்களுக்காக PFI எனப்படும் பாப்புலர் ஃப்ரண்ட் ஆஃப் இந்தியா அமைப்புக்கு இந்தியாவில் 5 ஆண்டுகள் தடைவிதிக்கப்படுவதாக மத்திய அரசு அதிரடியாக அறிவித்துள்ளது.
மத்திய அரசின் இந்த தடைக்கு காங்கிரஸ், விசிக. நாம் தமிழர் உள்ளிட்ட பல்வேறு கட்சிகளில் இருந்து எதிர்ப்புகள் எழுந்துள்ளன. ‘நாடு முழுவதும் இந்துத்துவாவை பரப்புவதில் ஆர்.எஸ்.எஸ் தீவிரமாக செயல்பட்டு வருகிறது. அத்துடன் பெரும்பான்மை சமூகத்தினரை முன்னிறுத்தி அரசியல் செய்து கொண்டிருக்கிறது. பெரும்பான்மை மற்றும் சிறுபான்மை ஆகியவற்றை வைத்து அரசியல் ஆதிக்கம் செலுத்த முயற்சிப்பது தவறு.
அப்படி பார்த்தால் பி.எஃப்.ஐ மற்றும் ஆர்.எஸ்.எஸ் இரண்டும் ஒன்று தான். எனவே இந்த இரண்டு அமைப்புகளையும் அரசு தடை விதிக்க வேண்டும்’ என்று வலியுறுத்தி உள்ளார் கேரள மாநிலம் மாவெலிக்கரா தொகுதி காங்கிரஸ் எம்.பி கொடிக்குன்னில் சுரேஷ்.
‘ஆர்.எஸ்.எஸ் மற்றும் வி.ஹெச்.பி ஆகியவையும் தான் வன்முறையில் ஈடுபட்டு வருகின்றன. வெறுப்புணர்வு, வன்முறையை பரப்புபவர்கள் யாராக இருந்தாலும் அவர்கள் மீது நடவடிக்கை பாய வேண்டும்’ என்று கூறியுள்ளார் காங்கிரஸ் மூத்த தலைவர் திக்விஜய் சிங். இதுபோன்று ஆர்எஸ்எஸ் தடை செய்ய வேண்டும் என்று பலதரப்பிலும் கோரிக்கைகள் எழுந்து வருகின்றன. இந்த கோரிக்கையை பிரதிபலிக்கும் விதமாக, #BanRSS என்ற ஹேஷ்டேக் தற்போது ட்விட்டரில் இந்திய அளவில் ட்ரெண்டாகி வருகிறது.
சிறுவர்களின் கையில் ஆயுதங்களை அளிக்கும் ஆர்எஸ்எஸ் அமைப்பு தடை செய்யப்பட வேண்டியது அவசியம். இந்த விஷயத்தில் சர்தார் படேல் செய்தது சரிதான் என்றொரு கருத்து ட்விட்டரில் பதிவிடப்பட்டுள்ளது.
இந்தியா முழுவதும் பல்வேறு மாநிலங்களில் நிகழ்த்தப்பட்டுள்ள பல குண்டுவெடிப்பு சம்பங்களில் ஆர்எஸ்எஸ் ஈடுப்பட்டுள்ளதாக அந்த அமைப்பில் இருந்தவரே நீதிமன்றத்தில் பிரமாணப் பத்திரம் தாக்கல் செய்துள்ளதாக மற்றொரு பதிவும் இடம்பெற்றுள்ளது.
கேரள மாநிலம் கன்னூர் குண்டுவெடிப்பு வழக்கில் ஆர்எஸ்எஸ் அமைப்பை சேர்ந்த 13 பேர் குற்றவாளிகள் என நீதிமன்றம் தீர்ப்பளித்துள்ளதாக இன்னொரு பதிவில் சுட்டிக்காட்டப்பட்டுள்ளது.
கன்னூரில் உள்ள ஆர்எஸ்எஸ் அலுவலகம் மீது குண்டுவீசியது குறித்த வழக்கில், இந்த அமைப்பை சேர்ந்த நபரே கைதி செய்யப்பட்டுள்ளார். இப்படி ஆர்எஸ்எஸ் அமைப்பின் வன்முறை வெறியாட்டத்துக்கு இன்னும் எவ்வளவு ஆதாரங்கள் வேண்டும்? என்ற கேள்வியுடன்கூடிய மற்றொரு பதிவு, ஆர்எஸ்எஸ் அமைப்புக்கு தடை விதிக்க வேண்டும் என்று வலியுறுத்தி உள்ளது.
1948 -காந்தி படுகொலை செய்யப்பட்டபோது, அவசர நிலை (1975-77) அமலில் இருந்தபோது மற்றும் 1992 – பாபர் மசூதி இடிக்கப்பட்டபோது என ஆர்எஸ்எஸ் அமைப்புக்கு இதுவரை மூன்று முறை தடைவிதிக்கப்பட்டுள்ளது.